Tơdơi kơ lăi pơthâo Hră pơtrun mrô 57, tơlơi thâo hluh mơ̆ng ƀing khua mua, mơnuih apăn bruă ping gah hăng mơnuih ƀôn sang kơ tơlơi glăm ba, gơgrong phun amăng bruă mă, lăng yom boh thâo ia rơgơi hăng anŏ pơčeh phrâo, ba yua mrô ăt dưi pơđĭ tui. Kơ hră klah čun mrô 123, kơtưn rơnoh pơđĭ kyar 8% pơngŏ thun 2025, Lâm Đồng hơmâo ngă lu hră pơtrun git gai pơčrâo bruă pơkŏn, brơi ngă tui lu hơdră pơsir kiăng pơtrut bơwih ƀong huă dưi pơđĭ kyar amăng thun 2025 mơ̆ng 9-10%.

Pơhiăp git gai jơnum, ơi Nguyễn Hòa Bình Kơ-iăng Khua dêh čar pơtă pơtăn, tơlơi gir run, glăm ba, pơčrâo bruă, gum pơgôp sit nik ngă tui jơlan hơdră prong mơ̆ng ping gah pơtrun ƀơi tơring čar Lâm Đồng. Laih dơ̆ng, rơkâo khul khua mua apăn bruă phun ping gah tơring čar Lâm Đồng čih pioh tơlơi pơgôp hiăp amăng mông jơnum. Lăi nao kơ tơlơi bơngơ̆t amăng sang bruă kơnuk kơna laih pơhrŏ hĭ, mrô mơnuih mă bruă aset tui, ƀing dŏ glăi lĕ lu kơ ƀing ƀu rơgơi ôh, ƀing ƀu thâo bruă, Kơ-iăng khua dêh čar ơi Nguyễn Hòa Bình lăi pơtong, djop gưl anom bruă hăng khua anom bruă khom glăm ba amăng bruă anai.