Ñu lăi lăi pơtong anai ƀu kơnong jơlan hơdră mă bruă đôč ôh, dŏ jing jơlan hơdră djuai ania, jơlan hơdră pơhrŏ ƀun rin, jơlan hơdră pơđĭ kyar ană mơnuih hăng ngă kơjăp tơlơi đăo kơnang mơ̆ng mơnuih ƀôn sang. Khua git gai ping gah, khua mir sir pơtrun hiăp: Pơtô hrăm bruă mă hăng pơtô hrăm tơlơi thâo thăi amăng bruă mă khom lir hơbit hăng anŏ či kiăng hơmâo sit nik ƀơi rim kual, rim djuai ania, rim plơi pla kiăng ngă djơ̆ anŏ či kiăng hrŏm abih bang, ƀu dưi pơtô hrăm tŭ kơ hơmâo kiăo tui đôč.

Kiăng đing nao pơtô hrăm bruă ngă hmua, bơwih ƀong huă pơgang glai rưng, pla phun jrao akha kyâo, čem rông hlô mơnong, djă pioh bruă pơkra ming gơnam gru grua đưm, čơkă tuai hyu ngui amăng plơi pla laih anun wai pơgang glai rưng; pok pơhư prong anih anom sĭ mơdrô, ba tuai hyu ngui pơsir bruă mă brơi kơ mơnuih ƀôn sang djuai ƀiă. Kơnuk kơna djru brơi prăk čan kơmlai ƀiă, djru ba tơlơi pơhing, pơtô hrăm hăng lăi pơthâo tơlơi phiăn pơkă; sang bruă mơdrô, sang bruă ngă hrŏm, anih pơkra ming, lir hơbit blơi abih gơnam sĭ mơdrô laih anun pơtô ba tơlơi thâo, hơdră či mă bruă; čih anăn pơgang ba anăn gơnam sĭ mơdrô tŭ yua; gong gai plơi pla pơphun brơi ĕp anih pơsir bruă mă rơnuk rơnua, pơgăn bruă ngă tŭ kơ hơmâo, tui anŏ kiăng ƀu găl, kiăng huăi lê̆ luh ƀing soh sat plư, ĕp bruă mă, ba hyu tă tăn plư pleč leč pơdar.