Amăng rơbêh 1 thun laih rơgao, ayong Ja Si Môn, Khua ping gah plơi Ha Wai, să Đơn Dương, tơring čar Lâm Đồng ƀu hơmâo mông pơdơi pơdă ôh, abih pran jua kơ bruă mă. Hlâo kơ hrơi pơmut hrŏm tơring čar, lui hĭ gưl tơring glông hăng pơmut hrŏm sang să, neh met wa djuai ania Chu Ru ƀơi tơring glông Đơn Dương hơđăp ăt hơmâo lu tơlơi pơmin mơn. Thâo rơđah tơlơi pơtrun mơ̆ng Ping gah, bruă kiăng pok pơhai mơ̆ng Kơnuk kơna laih anun gong gai, hăng tơlơi hmư̆ hing, hơmâo mơnuih ƀôn sang đăo kơnang, ayong Ja Si Môn nao tơl sang phang tơl adring či pơtô ba, djru neh wa thâo hluh djơ̆, thâo rơđah, mơ̆ng anun tŭ ư gum ngă. Hlâo kơ hrơi ngă lơphet krĕp 1 thun gong gai dua gưl, Khua ping gah Ja Si Môn pơtrut tui tơlơi gơgrong bruă mơ̆ng ñu lơ̆m hyu pôr pơthâo, iâu pơthưr mơnuih ƀôn sang ngă tui tơlơi pơtrun dăp glăi, pơmut hrŏm 3 boh plơi: Ha Wai, Ma Đanh hăng Thôn Mới hăng abih tih ñu 1.000 boh sang anŏ: “Bruă pơmut hrŏm plơi pla amăng mông hơduah tơña, mă tơlơi pơgôp hiăp mơ̆ng neh met wa, jing gơñu tŭ ư biă. Neh met wa gum pơhiăp, kiăo tui tơlơi pơtrun mơ̆ng Kơnuk kơna pơ anăp anai plơi pla jai hrơi bơwih ƀong đĭ kyar hloh”.

Să Đơn Dương, tơring čar Lâm Đồng hơmâo akŏ pơdong mơ̆ng tơring kual Thạnh Mỹ, să Dạ Ròn hăng să Tu Tra mơ̆ng tơring glông Đơn Dương hơđăp. Să hơmâo 33 boh plơi, jing hơmâo truh 17 boh plơi pơkă hơnong yŭ kơ 300 boh sang anŏ. Ngă tui tơlơi pơtrun dăp glăi aset ƀiă anom bruă čar, pơđĭ tui bruă wai lăng, ngă bruă ƀơi să, să Đơn Dương dăp glăi, akŏ pơdong 15 boh plơi phrâo hăng pioh hơnong 1 boh plơi, hrŏ trun truh 17 boh plơi pơhmu hăng mơ̆ng hlâo. Ơi Nguyễn Văn Vinh, Khua jơnum min djŏp djuai ania mơnuih mơnam Việt Nam să Đơn Dương, brơi thâo, amăng mông dăp glăi plơi pla kiăng gêh gal či wai lăng, 12 čô tha plơi, mơnuih ană plơi kơnang amăng să jing yom biă mă kiăng hơmâo abih bang mơnuih tŭ ư, ngă kjăp tui pran jua đăo kơnang mơ̆ng djŏp djuai ania ƀiă hăng Ping gah, Kơnuk kơna: “Gơmơi pơsit mơnuih ană plơi kơnang, hơmâo kơdrưh, pơhiăp ană plơi hmư̆ ƀơi să Đơn Dương jing pô pơtruh brơi Mơnuih ƀôn sang hăng Ping gah laih anun Kơnuk kơna. Gơñu yơh pô ƀing gơmơi đăo kơnang, pơhiăp ană plơi hmư̆, ba hơdôm tơlơi pơtrun, tơlơi phiăn mơ̆ng Ping gah hăng Kơnuk kơna truh hăng neh met wa, biă ñu lĕ mơnuih ƀôn sang djuai ania ƀiă. Gơñu yơh mơnuih ba gru rơđah bơngač kiăng neh met wa amăng plơi hla tui”.

Tơring čar Lâm Đồng ră anai hơmâo 49 phung djuai ania hơdip hrŏm, amăng anun mơnuih ƀôn sang djuai ania ƀiă hơmâo rơbêh 17% mrô mơnuih. Tơring čar hơmâo 883 čô mơnuih hơmâo mơnuih ƀôn sang khăp ƀu-eng, đăo kơnang, pơpŭ biă, laih anun jing pô ană plơi kơnang kjăp biă mă. Hrơi blan rơgao, tơlơi gơgrong mơ̆ng tha plơi, mơnuih ană plơi đăo kơnang ƀơi Lâm Đồng jai hơmâo pơsit rơđah lơ̆m gơñu yơh hla gru ba jơlan hlâo amăng bruă dăp glăi, pơmut plơi pla, sang să, mă yua boh thâo ia rơgơi ngă hmua, djă pioh tơlơi phiăn hiam đưm hlâo, gru ama grua amĭ, bong kjăp rơnuk rơnua plơi pla, akŏ pơjing khul gum pơgôp abih bang mơnuih. Ayong Ban Niêng Ha Dang, djuai ania K’Ho Lạch, phường Lang Biang - Đà Lạt brơi thâo, yua hơmâo tha plơi pơčrâo brơi mơn, mơnuih ƀôn sang gir bơwih ƀong, plơi pla jai hrơi rơnuk rơnua, yâo mơak: “Hăng tơlơi rơnuk rơnua amăng plơi pla, ƀing tha plơi jing mơnuih yom biă. Tha plơi pơ anai jing mơnuih ană plơi đăo kơnang, pơtô brơi hlăk ai čơđai muai, giong anun plơi pla hơmâo hơđong rơnuk rơnua, biă ñu tơlơi răm ƀăm, bruă đĭ rơdêh bơrơkiăo, đuăi kơtang, mơñum tơpai măt hyu mơmot mlăm, klĕ dŏp hai hui laih. Tha plơi yơh pô pơtruh tơhan wai lăng phường gum hrŏm bong kjăp tơlơi hơđong amăng plơi”.

Hơdip amăng plơi pla, thâo hluh tơlơi kiăng khăp, čang rơmang mơ̆ng rim čô mơnuih, ƀing tha plơi, mơnuih ană plơi kơnang ƀơi Lâm Đồng jing pô pơtruh kjăp brơi tơlơi pơmin mơ̆ng Ping gah hăng pran jua mơnuih ƀôn sang. Ya Cil Bri, Kơ-iăng khua gơnong bruă Djuai ania hăng Tơlơi đăo tơring čar Lâm Đồng brơi thâo, pơhmư̆ tơlơi pơgôp hiăp mơ̆ng tha plơi, mơnuih ană plơi kơnang, anom bruă hơmâo lăi pơhmư̆ hăng tơring čar pok pơhai lu jơlan hơdră đĭ kyar bơwih ƀong huă - mơnuih mơnam, pơtrut tui gru grua djơ̆ hăng tơlơi hơmâo sit nik hăng tŭ yua. Ăt sit mơ̆ng hơdôm tơlơi pơgôp hiăp mơ̆ng tha plơi, mơnuih hiăp ană plơi hmư̆, tơring čar Lâm Đồng pioh prăk tuh pơ alin kơ kual ataih yaih, hăng kual mơnuih ƀôn sang djuai ania ƀiă đah mơ̆ng pơđĭ tui tơlơi hơdip mơnuih ƀôn sang, plai ƀiă phara plơi pơdrong hăng rin: “Mơnuih ƀôn sang djuai ania ƀiă hăng čư̆ siăng tui hơdră lĕ pơƀut akŏ phun, lăng mơnuih ƀôn sang yơh akŏ phun hăng bruă gơñăm kiăng pơđĭ tui anŏ klă tơlơi hơdip mơda. Hơdôm tơlơi hơmâo pơƀut pơsir hĭ hơdôm bruă gah jơlan nao rai, pơtô hrăm, ia jrao, bơwih ƀong hăng pơđĭ tui mơnuih mă bruă rơgơi. Yom hloh dong, hơmâo tơlơi gêh găl kiăng mơnuih ƀôn sang djuai ania ƀuă pơtrut tui tơlơi hơmâo, anŏ kơtang, mut dlăm hloh amăng bruă đĭ kyar mơ̆ng tơring čar”.

Hăng hơdôm tơlơi pơplih kơtang mơ̆ng plơi pla Lâm Đồng hrơi anai, tha plơi, mơnuih ană plơi kơnang ăt jing gong tơmeh hơdip amăng plơi, jing anih kơnang gah pran jua mơ̆ng mơnuih ƀôn sang djŏp djuai ania. Hăng tơlơi kơdrưh, thâo rơgơi, rơguăt bruă, ƀing ñu yơh pơtruh brơi tơlơi pơtrun mơ̆ng Ping gah hăng pran jua mơnuih ƀôn sang gum ba jơlan hơdră mơ̆ng Ping gah, tơlơi pơtrun mơ̆ng Kơnuk kơna mut amăng tơlơi hơdip, ngă kjăp tui khul gum pơgôp djuai ania, bong kjăp gru grua, hăng akŏ pơdong plơi pla jai hrơi đĭ kyar./.