Thun 2023, phun kông ty Tân cảng Sài Gòn, anom bruă ling bruă sĭ mơdrô yua anom bruă gah ling tơhan sơlup ngă pô, djru hrŏm pơtrut anom pơtô bruă ping gah hơdôm tơring čar : Kon Tum, Gia Lai hăng Dak Nông kiăng pôr pơthâo, pơtô pơblang kơ ia rơsĭ, bul pơtâo plao ia rơsĭ brơi mơnuih ƀôn sang ƀơi kual Dap Kơdư thâo. Ƀơi mông pôr pơthâo, hơmâo pơthâo brơi kơ 4000 čô mơnuih hmư̆ tơlơi pơhing kơ kual ia rơsĭ, djop bul pơtâo plao ia rơsĭ. Ngă hrŏm bruă hơdor tơngia tla pran laih anun djru ba tơlơi hơdip mơda mơnuih ƀôn sang amăng kual, anom bruă anai hơmâo man pơdong brơi 15 boh sang hơdor tơngia: Tŭ jum lăng ba 28 čô neh wa amĭ Việt Nam sông kơtang, sang anŏ tơhan djai pơsăn drơi jăn kơ lŏn ia; Ƀơk gơnam kơ sang anŏ ƀun rin, sang anŏ hơmâo anăn kơnuk kơna djru hăng abih tih rơnoh prăk lĕ 2 klai.

Kĭ pơkôl bruă mă ngă hrŏm amăng thun 2024, phun kông ty Tân cảng Sài Gòn hăng anom pơtô bruă ping gah klâo boh tơring čar Kon Tum, Gia Lai hăng Dak Nông hơmâo pơsit ngă hrŏm pơtô pơblang lu hloh kơ djop anom bruă ping gah, mơnuih apăn bruă kơnuk kơna, mơnuih ƀôn sang, čơđai sang hră thâo jơlan hơdră tơlơi pơtrun mơ̆ng ping gah, kơnuk kơna, pơtô lăi hăng hơdră pơdah rup, pơblang tong ten amăng mông jơnum, pơplông mă bruă, čih ĕp kơ ia rơsĭ, bul plao ia rơsĭ; Pơtrut kơtang bruă mă jĕ giăm, jak iâu mơnuih ƀôn sang, pơhlôm ba tơlơi hơdip mơda kơ mơnuih ƀôn sang amăng tơring čar.