Tui khul wai lăng akŏ bruă man pơdong ring bruă mơnuih ƀôn sang hăng tuh tia pơkra ming tơring čar Dak Lak, tlâo akŏ bruă ƀơi hơdôm boh să Ƀuôn Đôn, Ia Rvê hăng Ia Lốp lêng glăk pơgiong 80% bruă mă. Hơdôm anom bruă man pơdong glăk đing nao pơgiong bruă man dưm truă gơnam măi mok hăng gir run pơgiong hlâo kơ kơnôl 6/8. Kiăng pơhlôm djơ̆ hrơi mông, Khul wai lăng akŏ bruă pok pơhai tal man pơdong tañ hloh “70 hrơi mlăm ƀu pơdơi”, pơkiăo nao ƀing apăn bruă nao wai lăng tơl anih; Anom bruă git gai ling tơhan tơring čar Dak Lak ăt pơkiăo nao mơnuih djru man pơdong. Hrŏm hăng anun, Khul wai lăng akŏ bruă glăk pơgiong hră pơ-ar tuh pơ alin man pơdong sang hră kơnuk kơna čem rông ba pơlir dua gưl să Ea Bung. Ơi Võ Văn Lợi, kơ-iăng Khua khul wai lăng akŏ bruă tuh pơ alin man pơdong ring bruă mơnuih ƀôn sang hăng tuh tia pơkra ming tơring čar Dak Lak brơi thâo: “Hăng djop anom bruă, hơmâo găn rơgao tơlơi tơnap tap kơ mơnuih mă bruă, tơnap kơ ayuh hyiăng sat, tơnap kơ bruă pơdŭ pơgiăng gơnam kiăng lăp djơ̆ hrơi mông man pơdong hrŏm. Ră anai 3 boh sang hră lêng man pơdong giong 80% bruă mă. Hăng bruă man pơdong tui anai, him lăng truh kơnôl 15/7 djop mơta amra pơgiong hĭ abih, hơmâo wŏt bruă dưm truă gơnam măi mok pioh pơtô hrăm. Pơhlôm djơ̆ tơlơi git gai mơng Ding jum kơđi čar kah hăng Ping gah tơring čar, Jơnum min pơ ala mơnuih ƀôn sang hăng Jơnum min mơnuih ƀon sang tơring čar”.

Tơring čar Lâm Đồng ăt glăk pok pơhai man pơdong 5 boh sang hră kơnuk kơna čem rông ba pơlir dua gưl ƀơi hơdôm boh să giăm guai hơmâo Quảng Trực, Thuận An, Tuy Đức, Thuận Hạnh hăng Đắk Wil, hăng abih tih prăk tuh pơ alin rơbêh 1.140 klai prăk. Hơdôm boh ƀon lan glăk gir run pơgiong hơdôm akŏ bruă anai djơ̆ hrơi mông ƀudah tañ ƀiă tui hrơi pơkă, pơhlôm brơi anih pơtô hrăm mơng akŏ thun hrăm phrâo mơtăm.

Amăng anun, dua akŏ bruă Sang hră kơnuk kơna čem rông ba pơlir dua gưl ƀơi hơdôm boh să Quảng Trực hăng Thuận An glăk pơtrut man pơdong tañ hloh. Truh ră anai, gong tơmeh hơmâo man pơkra giong, hơdôm anom bruă man pơdong pơtum pơƀut lu mơnuih, măi mok, man pơdong tơhrơi kah mlăm kiăng pơgiong hlâo kơ kơnôl 15/8, tañ ƀiă 15 hrơi pơhmu hăng hrơi pơkă. Yă Lê Thị Bích Liên, Khua gơnong bruă pơtô pơjuăt tơring čar Lâm Đồng brơi thâo: “Gơnong bruă pơtô pơjuăt hơmâo mă bruă hăng hơdôm boh să lu wŏt laih hăng hơmâo bơtŭ ư hrŏm hăng să kơ hơdră kah pơpha čơđai hrăm hră hăng gơnong bruă hơmâo pơgiong hơdră kah pơpha čơđai hrăm. kơ nai pơtô Gơnong bruă pơtô pơjuăt hơmâo ngă giong bruă kah pơpha biên chế mơng kual Bình Thuận hăng Lâm Đồng ĕp pơhrua brơi nai kơ 2 boh sang hrăm kual giăm guai”.

Bruă ječ ameč man pơdong hơdôm boh sang hră kơnuk kơna čem rông ba ƀơi hơdôm să giăm guai ƀơi kual Dap kơdư ƀu djơ̆ kơnong lăp djơ̆ hăng tơlơi rơkâo ƀơi anăp kơ anih pơtô hrăm amăng thun hrăm phrâo đôč ôh mơ̆ ăt pơdah tơlơi đing nao mơng Ping gah hăng Kơnuk kơna hăng bruă pơtô pơjuăt ƀơi kual giăm guai. /.