Tơlơi  ră ruai kơ sa čô “Apăn akŏ” pơ anăn mă mơ̆ng phung FULRO, tom ngă rung răng amăng plơi pla djuai ania ƀiă kual Dap Kơdư anun lĕ Y Bome, juăt iâu Jana 68 thun, dŏ plơi Ring Rai, să Hà Bầu, tơring glông Đak Đoa, tơring čar Gia Lai. Blan 2/2001, yua Ksor Kơk hlăk anun pô pơtrut, ñu yơh pô ba akŏ phung FULRO dŏ pơ dêh čar Mi, lu mơnuih ƀôn sang  djuai ƀiă nao ngă greo pơrung pơrăng. Tơdơi kơ tal anun, Jana arăng mă krư̆  12 thun dŏ amăng sang mơnă yua tơlơi soh "Phă pơrai jơlan hơdră gum pơgôp djuai ania". Hơdôm thun dŏ pơ sang mơnă, Y Bome thâo hluh tong ten tơlơi soh ñu ngă. Tơdơi kơ abih thun krư̆, glăi pơ sang anŏ, ñu hur har mă bruă hăng akŏ pơdong tơlơi hơdip mơda phrâo.

"Hlăk nao ngă greo rung răng, ră anai hơdor glăi tơlơi anun, kâo ƀlĕ ia mơta. Pô răm djai yua  ană plơi pla soh, kâo tơl dŏ amăng sang mơnă. Ră anai glăi pơ plơi pla kâo lăi pơthâo ană plơi thâo tơlơi gum pơgôp djuai ania hiư̆m pă, anŏ yom ñu kar hơgĕt, tơlơi yom gum pơgôp yơh dưi hĭ hăng djop tơlơi”.

Bơ hăng Siu Un, 59 thun, dŏ ƀơi plơi Tân Điệp 1, să Ia Ake, tơring glông Phú Thiện, arăng krư̆ 16 thun amăng sang mơnă, tơlơi hơdip tơđar hrơi yơh tơhnal ñu ngă kơjăp glăi tơlơi đăo kơnang. Blan 6/2022, ñu glăi jơnum hrŏm sang jơnum đăo phrâo hiam plơi, gah khul đăo Tin lành Truyền giáo Cơ đốc- sa tơlơi đăo yap găl tơlơi phiăn. Siu Un ră anai huăi mlâo, yĕl glăi dơ̆ng tah, huăi hŭi ƀing ngă tơhan pơblư̆ lŏn ia mơ̆ng dêh čar tač rơngiao plư ôh. Ñu juăt ră ruai kơ tơlơi ñu tom găn rơgao, rơbat jơlan soh sat sat jrôk jơlan laih anun pơwơ̆t glăi hăng tơlơi đăo, djru ană plơi pla amăng ƀôn thâo krăn jơlan tơpă, bruă soh sat:

“Ta khom pơwơ̆t glăi tơlơi đăo đôč, glăi hăng tơlơi đăo tơpă. Lơ̆m glăi, Ping gah, Kơnuk kơna, khua mua apăn bruă puăi hrŏm ta klă mơ̆n. Kâo ăt kiăng ană plơi pla ieo gah, djop anih pơkŏn kah hăng pơ Dak Lak, Gia Lai...hlơi pô tek djơ̆ kiăo tui đăo Tin lành Đêga lĕ lui bĕ, glăi đăo tơpă hiam klă hăng tơlơi đăo găl kơnuk kơna pơsit, ping gah ta tŭ ư anun tŭ ƀiă”.

Kiăng hơmâo jơlan glăi hăng plơi pla, hăng tơlơi đăo tơpă hơnơ̆ng sit mơ̆n atw pok pơhư prong đôč, hơdôm thun rơgao, tơring čar Gia Lai hơmâo pok pơhai ngă tui hơbô̆ bruă anăn “Pơwơ̆t glăi hăng tơlơi đăo, pơgang rơnuk rơnua plơi pla”, hơmâo tơlơi gum hrŏm ƀing apăn bruă, ling tơhan 4 bruă: Mơnuih ping gah, mơnuih arăng đăo kơnang, ƀing apăn akŏ tơlơi đăo hăng ƀing tom lê̆ luh ƀing FULRO plư.

Sa čô mơnuih apăn bruă ngă khua sang yang pơtô tơlơi đăo phrâo hiam Tin lành Miền Nam Việt Nam, ăt ngă rah khua khul djop djuai ania plơi Sô Ama Lơng, să Čroh Pơnan, tơring glông Phú Thiện, tơring čar Gia Lai, brơi thâo, ñu hăng djop gưl gong gai kơnuk kơna hyu pơtô lăi, jak iâu brơi lui tơlơi đăo soh Tin lành Đêga, kiăng glăi đăo hăng ngă yang tơpă tui pran jua thâo khăp, djơ̆ găl hăng tơlơi phiăn kơnuk kơna.

“Gong gai kơnuk kơna plơi pla đing nao biă mă kơ ƀing gơmơi, ngă gêh găl brơi gơmơi jơnum kơkuh pơpŭ amăng tơlơi đăo huăi gun ôh. Iâu pơthưr ƀing adơi ayong hlơi tom jrôk jơlan laih, pơwơ̆t glăi bĕ. Blung hlâo gơmơi čơkă jum 13 boh sang anŏ đôč, samơ̆ ƀrư̆ ƀrư̆ lu tui truh 300 čô mơnuih. Hơdôm ƀing tom jrôk jơlan soh glăi, gơmơi pơtô ba tơlơi đăo hăng ngă hrŏm Siu Un nao tơl sang phyiang tơl adring, jak iâu, pơtrut pran jua kiăng ngă tui djơ̆ jơlan hơdră Ping gah, tơlơi phiăn kơnuk kơna”.

Tui hăng ơi Rahlan Čung (Rah Lan Chung), Kơ-iăng khua ping gah, Khua Jơnum min mơnuih ƀôn sang tơring čar Gia Lai, hăng hơdôm tơlơi pơtô hiam klă djơ̆ hơnơ̆ng, hơdră “Pơwơ̆t glăi hăng tơlơi đăo kơnang, pơgang rơnuk rơnua plơi pla” ƀơi tơring čar hơmâo ngă gêh găl brơi sang anŏ ƀing tom jrôk jơlan soh glăi dưi bơwih ƀong huă, hơdip mơda tơpă, pơđĭ tui mơnong ƀong huă hơdip mơda mơak kơ ta pô hăng djru hrŏm pơđĭ kyar plơi pla:

“Thun blan laih rơgao, hơmâo pơtum lu pran jua ngă hrŏm djop glông bruă kơđi čar, pơsir tơlơi tơnap tap brơi kơ ƀing soh glăi tom kiăo tui ƀong ngă Fulro, lơ̆m glăi hăng plơi pla, pơtô lăi, pơhrăm ba, kiăng lui hĭ bruă pơkơdong glăi kơnuk kơna laih anun mă bruă tơpă đôč. Amăng djop tơring glông lơ̆m tơring čar hơmâo ngă tui hơbô̆ bruă “Pơwơ̆t glăi tơlơi đăo kơnang pơgang rơnuk rơnua plơi pla” ƀing gơmơi ƀuh yom biă mă ba glăi tŭ yua sit nik. Hơbô̆ bruă anai Ding jum kông an bơni laih anun tơring čar Gia Lai jing ruah sa amăng hơdôm anih ngă tui hlâo hăng pok pơhư prong ƀu kơnong amăng Gia Lai đôč ôh, khom tar ƀar amăng kual Dap Kơdư dơ̆ng”.