Adai či tlam laih, jơlan ƀêtông rô nao rai amăng plơi Lầu Nàng, să Ia Lôp, tơring čar Dak Lak hmư̆ ik ăk tơlơi pơhiăp puăi tlao mơ̆ng ƀing rơbat tơkai, ƀing rơjang drơi jăn. Lơ̆m adai hmyum či mơmŏt tui, apui bơngač bral pơčrang rơđah, pơkĕ hăng pil pơ-iă yang hrơi. Yă Vi Thị Phương, mơnuih ƀôn sang plơi Lầu Nàng hơ̆k mơak lăi: tơlơi pơblih phrâo hiam klă anai, phrâo hơmâo ha mơkrah blan hăng anai đôč, dơ̆ng mơ̆ng hơmâo ring bruă jơlan yua ƀing hlăk ai pơyơr pran jua pô ngă, dưm truă gong apui bơngač ter jơlan amăng plơi. Ring bruă laih ngă giong, jing jơlan hiam, anih mơnuih ƀôn sang dŏ pơtum, bưp nao rai, pơtop rơjang drơi jăn, rơbat tơkai kiăng găng añrăng.

“Mơak biă mă, abih bang amăng plơi djop pô mơak soh mơ̆n, yua  hơmâo apui bơngač ƀơi jơlan, rô nao rai mơmŏt mlam mơak hăng amuñ laih, ƀuh tui anun plơi pla hiam rô̆ hloh. Abih bang amăng plơi pla hơmâo gum hrŏm pơgang brơi ring bruă kiăng kơjăp na nao, jơlan hiam klă, gong apui bơngač amăng mơmŏt mlam”.

Jơlan bơngač hơmâo apui anai sa amăng lu ring bruă dưi pok pơhai amăng Tal hlăk ai nao djru ană plơi pla amăng bơyan pơdơi prong thun 2026 yua khul čơđai sang hră gưl prong Nam Cần Thơ ngă hrŏm hlăk ai amăng plơi pla pô ngă bruă ƀơi dua boh să Ia Lôp hăng Ea Rok, tơring čar Dak Lak. Hơdôm bruă mă kah hăng pơkra pơhrêp pưk sang răm yua hơkruah yâo, man pơdong anih hrăm hră kơ čơđai sang hră ƀun rin, pơkra tơdron đă boh lông, tơdron pah boh lông ƀudah pơphun hyu rơmet djah djâo kơsu pơblih mă gơnam, lêng kơ hơmâo ƀing hlăk ai hyu jak ba ngă, mơnuih ƀôn sang kiăo tui soh, anun pơblih hiam biă mă tơlơi thâo pơgang anih hơdip jum dar hăng pơgang tơlơi suaih pral kơ mơnuih ƀôn sang.

Ayong Ngân Văn Thành, Kơ-iăng khua Khul wai lăng djop djuai ania mơnuih mơnam Việt Nam să, ngă rah khua hlăk ai tơdăm dra mut phung să Ia Lôp, brơi thâo, hơdôm ring bruă anai lêng kơ hơmâo mơnuih ƀôn sang gum hrŏm, wai lăng, djă pioh, djru kơ bruă ngă mơ̆ng ƀing hlăk ai pơyơr pran jua dưi pioh lui kơjăp sui hloh.

“Ƀing gơyut hlăk ai, tơdăm dra djru ba mơnuih ƀôn sang hơmâo akŏ pơjing lu ring bruă tŭ yua biă mă, ƀuh črăn bruă ƀơi anăp ba glăi kơ mơnuih ƀôn sang amăng plơi pla. Lu ring bruă pơdong gong apui bơngač pơkĕ hăng pơ-iă yang hrơi ter jơlan amăng plơi, ană plơi pla bơni biă mă, laih anun tơdron pah boh lông ăt ba glăi ngă anih pơkơjăp drơi jăn brơi kơ ƀing tơdăm dra, čơđai muai amăng plơi hăng mơnuih ƀôn sang”.

Hăng ƀing gơyut hlăk ai ƀing tơdăm dra pơyơr pran jua hơmâo ba glăi tơlơi găn rơgao, mă bruă tŭ yua biă mă ƀơi kual giăm guai tơring čar Dak Lak. Lu čơđai sang hră gưl prong, anai lĕ tal blung a nao pơ kual giăm guai, bưp tơhan pơgang guai, ngă bruă hrŏm ƀuh tơlơi hơdip mơda tơnap tap mơ̆ng mơnuih ƀôn sang. Tơdăm čơđai sang hră gưl prong Nguyễn Phú Quý, sang hră gưl prong Nam Cần Thơ kah pơpha.

“Lơ̆m kâo rai mă bruă anun, kâo ƀuh mơak biă mă hăng ƀing gơyut djru hrŏm. Hăng kâo lĕ sa čô hlăk ai hơmâo pran jua, hơmâo tơlơi hur har hăng thâo pơčeh phrâo amra gum tơngan hrŏm hăng ƀing gơyut pioh djru ană plơi pla”.

Rim kơ ring bruă ƀu kơnong sa črăn bruă anet đôč ôh, samơ̆ sit ngă djơ̆ hăng tơlơi či kiăng mơ̆ng mơnuih ƀôn sang laih anun ngă bruă hăng abih pran jua tơlơi glăm ba mơ̆ng tơdăm dra hlăk ai, hơdôm tơlơi pơgôp pran jua ngă bruă anun hlăk pơjing rai anŏ pơblih phrâo plơi pla ala ƀôn ƀơi kual giăm guai tơring čar Dak Lak.