Čơtlăm lơ 7/4, Grŭp hyu mă bruă mơng Ding jum ia jrao yua kơ Kơ-iăng Khua ding jum Trần Văn Thuấn ngă Khua Grŭp hmâo laih mông mă bruă hăng Jơnum min mơnuih ƀôn sang tơring čar Dak Lak kơ bruă pok pơhai ngă tui rơwang bruă pơdŏng Sang ia jrao prong dêh čar ta ƀơi Dăp Kơdư. Rơwang bruă Sang ia jrao prong dêh čar ƀơi Dăp Kơdư gah Ding jum ia jrao hăng rơnoh prong 500 bôh sưng đih kơ mơnuih ruă, pơkă lăng hlâo pơdŏng ƀơi phường Tân An, plơi prong Buôn Ma Thuột, tơring čar Dak Lak hăng kual lŏn prong 15,6 ektar.

Tơring čar hmâo pel ĕp, pơdŏng jơlan gah pơ ala glăi, pơdŏng glăi plơi pla, đang hmua hơđong, pơkă hlâo amra mă yua 147 klai prăk. Amăng mông mă bruă, ƀing khua pơ ala đing nao bơkơtuai kơ bruă pơsir anom pioh pơdŏng sang ia jrao; prăp lui hăng pơtô juăt mơnuih mă bruă kơjăp kơ Sang ia jrao; pel ĕp pơplih anăn Sang ia jrao kiăng bĕ bơrơkua hăng hơdôm anom pơkon; Kơ-iăng Khua Ding jum ia jrao Trần Văn Thuấn pơsit yôm bruă gum hrom mơng tơring čar Dak Lak pioh kơ bruă prăp lui tuh pơplai pơdŏng Sang ia jrao prong dêh čar ƀơi Dăp Kơdư. Ñu čăng rơmang pơ̆ anăp anai tơring čar hmâo dong hơdôm tơlơi gum djru Ding jum ia jrao pơtrut tañ rơnoh ngă tui hơdôm hră pơ-ar djơ̆ phiăn kiăng pok pơhai rơwang bruă, bruă pơsir anih anom mă yua pioh pơdŏng./.