Quân đoàn 3 dưi akŏ pơdong lơ 26/3/1975 tŭ mơ̆ng bruă pơmut hrŏm abih bang khul ling tơhan blah ngă ƀơi tơdron blah kual Dap Kơdư jing khul tơhan blah ngă phun. Quân đoàn 3 hơmâo ngă pô gơgrong phun, djru prong prin amăng bruă blah pơklaih rơngai kual DapKơdư laih anun kơsung nao blah pơklaih rơngai hlom bom amăng kual dơnung, pơlir hĭ lŏn ia ta jing sa amăng lơ 30/04/1975. Laih dơ̆ng, khul ling tơhan quân đoàn ăt djru hrŏm blah ngă pơgang guai dêh čar gah dơnung yŭ, kơdư yŭ hăng djru mơnuih ƀôn sang dêh čar Kur tơbiă đuăi mơ̆ng tơlơi djai đut djuai yua tơhan Pol Pot pô ngă.

Amăng bruă akŏ pơdong kjăp glăi bruă tơhan hăng pơgang lŏn ia, Quân đoàn 3 jĕ giăm tong ten biă mă hăng djop anom bruă ping gah, gong gai kơnuk kơna laih anun ană plơi pla djop djuai ania ƀơi anih pơdong anom bruă puih kơđông tơhan; djru hrŏm lu amăng bruă pơđĭ kyar bơwih ƀong huă, pơgang tơlơi rơnuk rơnua ƀơi tơring čar Gia Lai lăi pha, hơdôm tơring čar amăng kual Dap Kơdư hnun mơ̆n.

Hăng boh tơhnal tŭ mă blah dưi laih anun boh tŭ yua hing ang amăng rơnuk blah ayăt hăng amăng thun blan akŏ pơdong laih anun pơgang lŏn ia, Quân đoàn 3 dưi hơmâo ping gah hăng kơnuk kơna apah bơni hăng miđai pơ anăn Tơhan khin hơtai mơ̆ng mơnuih ƀôn sang lơ 20/12/1979; dưi apah bơni hăng 3 miđai yôm pơphăn djă anăn miđai Hồ Chí Minh, 57 mơta miđai ling tơhan blah dưi, 242 mơđai blah kơtang djop mơta hrŏm hăng lu pri apah bơni yôm pơkŏn; yua kơnuk kơna dêh čar Kur ƀơk, kah hăng tơlơi bơni anăn Angkor; 81 grup tơhan hăng 47 čô khua mua, ling tơhan dưi hơmâo ping gah, kơnuk kơna pơpŭ bơni anăn Tơhan khin hơtai blah ngă mơ̆ng mơnuih ƀôn sang. Amăng anun hơmâo 9 grup dưi pơpŭ bơni tơhan khin hơtai tal dua; khul tơhan Lữ đoàn CB7 hăng trung đoàn BB66 dưi pơpŭ bơni hăng anăn tơhan khin hơtai tal klâo amăng rơnuk pơblih phrâo.

Djă pioh kru hing ang anun rơgao 49 thun pơ klôn akŏ pơdong, blah ngă hăng pơđĭ kyar, khua mua, ling tơhan Quân đoàn 3 tong ten na nao hăng Ping gah, hăng dêh čar laih anun mơnuih ƀôn sang, pơđĭ tui hơdôm boh tŭ yua hiam pran jua klă mơ̆ng tơhan rơnuk Wa Hô, čih pioh tŏ tui dơ̆ng hơdôm boh tơhnal blah dưi kiăng pik jă tui 12 boh hră mah anăn “Khom dưi, pơčeh phrâo, gum pơgôp, sa pran jua, tơpă , run pô” mơ̆ng khul ling tơhan khin hơtai sông kơtang, kjăp hlom bom.

Pơhiăp ƀơi mông bưp, Trung tướng Nguyễn Doãn Anh pơpŭ bơni kơ boh tơhnal, tŭ yua mơ̆ng tơhan Quân đoàn 3, laih dơ̆ng pơtruh hiăp kơ djop anom bruă pơ anăp anai, ăt khom jĕ giăm tong ten hăng tơlơi pơmin, pran jua, jơlan hơdră mơ̆ng Ping gah, Kơnuk kơna pơkă kơ ling tơhan, pơgang dêh čar. Đing nao ngă klă bruă pơtô hrăm kơđi čar, tơlơi pơmin, pran jua kiăng pơ-ư ang gah ling tơhan Quân đoàn amăng rơnuk phrâo, nao hlâo amăng bruă ngă tui  jơlan hơdră, tơlơi pơtrun mơ̆ng ping gah ling tơhan, Ding jum ling tơhan pơkă thun 2024. Trung tướng Nguyễn Doãn Anh-ding kơna apăn bruă ping gah dêh čar, Kơ-iăng Khua git gai ling tơhan mơnuih ƀôn sang Việt Nam lăi:

"Kâo đăo sit lĕ, ƀing khua mua, ling tơhan khul tơhan Quân đoàn 3 amra gir run hloh, tŭ mă lu boh tơhnal tŭ yua klă hloh amăng djop bruă mă, hrŏm hăng khua mua ping gah, gong gai kơnuk kơna laih anun mơnuih ƀôn sang tơring čar pơkra hơdră či ngă bruă kơtang hloh ƀơi kual Dap Kơdư hăng tơhan kual 5 pơtrut bơwih ƀong huă ngă pơdrong kơtang laih anun kjăp bruă kơđi čar, pơgang hơđong tơlơi rơnuk rơnua dêh čar, pơhlôm brơi mơnuih ƀôn sang; djru hrŏm abih bang amăng ping gah, mơnuih ƀôn sang, ling tơhan akŏ pơdong truh kih laih anun pơgang tong ten kjăp lŏn ia Việt Nam XHCN amăng rơnuk phrâo”.

Trung tướng Nguyễn Doãn Anh ăt pơtrun hiăp kơ Quân đoàn đing nao pơđĭ tui boh tŭ yua pơhlôm djop mơnong ƀong huă, gơnam yua mă bruă măi mok phrâo bơwih brơi kơ bruă mă; ngă klă tơlơi anăp nao mă bruă “Ngă tui tơpă, khin hơtai” pơtrut bruă ngă rah hmua pla pơjing, pơkrem kơdeng, djru lăng ba tơlơi hơdip mơda kơ ling tơhan hăng ngă mơak pran jua ling tơhan blah ngă; pok pơhai tŭ yua bruă mă pơtô lăi, jĕ giăm ană plơi, biă mă ñu plơi pla kual ataih, kual tơnap tap, djru hrŏm man pơdong tơdron blah kjăp amăng pran jua ană plơi pla.