Tui hăng tơlơi pơtrun mơ̆ng Jơnum min mơnuih ƀôn sang tơring čar Quảng Ngãi, bruă pơhrua nao mrô čơđai mut hrăm tal anai kiăng djop mrô čơđai sang hră yau tơdơi kơ jŭ yap glăi rơnoh tŭ jum čih anăn pơmut hrăm pơkă hăng anih hrăm, sang hră hlăk hơmâo ăt djop mơ̆n, wơ̆t mrô nai pơtô laih anun anŏ či kiăng pơđĭ anŏ tŭ yua bruă pơtô hrăm. Jơnum min mơnuih ƀôn sang tơring čar Quảng Ngãi jao kơ Khua Gơnong bruă Pơtô hăng pơjuăt lăng nao boh tơhnal jŭ yap glăi laih anun tơlơi gêh găl tŭ jum, čih pơmut hrăm, kiăng pơsit mrô čơđai mut hrăm djơ̆ lăp amăng sang hră gưl klâo laih anun amăng sang hră anih pơtô hrăm re se. Bruă čih anăn iâu pơmut anai, khom pơhaih rơđah rơđong, tơpă ară, djơ̆ tơlơi phiăn hăng ba yua hiam klă djop mơta gơnam yua pơtô hrăm, wơ̆t ƀing mrô nai pơtô hrăm hră hlăk hơmâo ră anai.

Ơi Nguyễn Ngọc Thái, Khua Gơnong bruă Pơtô hăng Pơjuăt tơring čar Quảng Ngãi brơi thâo, bruă pơtong glăi tơhnal pơkă iâu pơmut lĕ lăng nao kơ tơlơi pơtrun mơ̆ng Kơnuk kơna pơkă; laih dơ̆ng jŭ yap glăi tong ten tui hluai tơlơi gêh găl hơmâo amăng rim sang rhă, anih hrăm, gơnam yua hrăm hră hăng khul nai pơtô ƀơi sang hră. Thun hrăm laih rơgao, mrô čơđai sang hră hrăm abih anih 12 lu hloh pơkă hăng thun hlâo kơ anun, anun yơh tơlơi kiăng mut hrăm sang hră gah kơnuk kơna ngă pô ăt jai hrơi lu tui mơ̆n.

Tơdơi kơ pôr pơthâo boh tơhnal pôr pơthâo iâu pơmut tal 1, mrô čơđai sang hră djơ̆ anăn mut hrăm anih 10 djop sang hră kơnuk kơna lu biă mă. Gơnong bruă Pơtô hăng Pơjuăt tơring čar Quảng Ngãi hơmâo jŭ yap glăi djop anŏ gêh găl rim sang hră, anih pơtô hrăm, biă mă ñu anih mut hrăm hăng mrô nai pơtô, djơ̆ hnơ̆ng pơkă mơ̆ng Ding jum Pơtô hăng pơjuăt, hơmâo tơlơi rơkâo pơhrua dơ̆ng iâu pơmut čơđai mut hrăm djơ̆ găl. Ơi Nguyễn Ngọc Thái, Khua Gơnong bruă Pơtô hăng Pơjuăt tơring čar Quảng Ngãi brơi thâo dơ̆ng:

“Tơ tă anai dŏ 4 boh sang hră aka čih anăn pơmut djop tui mrô či kiăng, anun lĕ sang hră gưl klâo Kơnuk kơna čem rông jing Sang hră đôm lăm gưl klâo Măng Đen; sang hră gưl klâo Đinh Tiên Hoàng, tơring glông Sơn Tây hơđăp, sang hră gưl klâo Tây Trà, tơring glông Trà Bồng hơđăp hăng sang hră gưl dua hăng gưl klâo Phạm Kiệt, tơring glông Sơn Hà hơđăp. Hăng hơdôm sang hră anai, Gơnong bruă Pơtô hăng Pơjuăt amra tŭ mă hră pơar rơkâo hăng pơhrua nao dơ̆ng mrô čơđai sang hră, ruah puang mơ̆ng lu trun pơ aset, jing mơ̆ng dlông trun pơyŭ, kiăng bơkơnar djơ̆ tui tơlơi jao mơ̆ng Jơnum min mơnuih ƀôn sang tơring čar. Laih dơ̆ng, Gơnong bruă Pơtô hăng Pơjuăt ăt amra tŭ ư hrom hăng djop sang hră ngă tui bruă čih anăn iâu pơmut pơhrua nao dơ̆ng”.

Bruă čih anăn iâu pơmut pơhrua nao giăm 2000 čô čơđai sang hră mut hrăm anih 10 sang hră kơnuk kơna lĕ kiăng djop hăng mrô čơđai sang hră aka ƀu hơmâo anih mut hrăm laih anun pơđĭ tui boh tŭ yua pơtô hrăm kơ mơnuih mă bruă, ngă gêh găl kơ ƀing čơđai sang hră dưi hrăm hră tui hăng Hră pơtrun mrô 71 mơ̆ng Ding jum kơđi čar amăng bruă pơblih glăi jơlan hơdră, bruă pơtô hăng pơhrăm, kiăng ngă djơ̆ tơlơi kiăng pơđĭ kyar lŏn ia ta amăng rơnuk phrâo.