Bơyan tŭ jum tơhan thun 2025 anai ƀơi Dak Lak hơmâo 2.553 čô tơhan mut ngă bruă amăng djop puih kơđông tơhan blah ngă hăng tơhan pơgang guai dêh čar amăng tơring čar. Đại tá Niê Ta, Khua anom bruă khua tơhan tơring čar, kơ-iăng khua khul tŭ jum tơhan tơring čar Dak Lak brơi thâo, amăng bơyan pơtô pơhrăm tơhan thun anai, djop anom bruă, puih kơđông, khua mua, ling tơhan ngă klă bruă kơđi čar hăng kơjăp tơlơi pơmin, pơđĭ tui tơlơi gơgrong ba amăng bruă mă pơtô hrăm tơhan blah ngă.

Hrơi mông anai, djop puih kơđông hơmâo tŭ jum djop mrô tơhan arăng ba nao laih anun pok pơhai hơdră pơtô hrăm, rup rap pơhmutu kiăng ngă djơ̆ boh tŭ yua  pơtô hrăm tơhan phrâo thâo kơ tơlơi blah ngă djă phao kơtuang. Hăng ƀing tơhan phrâo, hơđong pran jua, tơlơi pơmin tơdơi kơ abih bơyan ngui ngor čơkă thun phrâo, pơčlah hăng sang anŏ laih anun prăp lui pran jua nao hrăm amăng tơdron blah.