Tơring čar Dak Nông dưi akŏ pơdong glăi lơ̆m lơ 01/01/2004. Găn rơgao 20 thun man pơdong hăng pơđĭ kyar, tơring čar Dak Nông hơmâo tŭ mă lu boh tơhnal lăp bơni biă mă gah tơlơi bơwih ƀong huă mơnuih mơnam, pơgang rơnuk rơnua lŏn ia hăng anŏ tŭ yua hiam amăng tơlơi hơdip mơda mơnuih ƀôn sang, tơbiă anăn mơ̆ng tơring čar ƀun rin, kaih pơđĭ kyar. Rơnoh gơnam pơhrui glăi yap truh abih thun 2023 giăm 24.000 klai prăk, lu hloh 12 wơ̆t pơkă hăng 20 thun pơ klôn adih; rơnoh prăk pơhrui glăi pơkă rim čô mơnuih mă bruă sa thun 60 klăk prăk, đĭ hloh 12 wơ̆t pơkă hăng thun lơ̆m phrâo akŏ pơdong tơring čar.

Ngă lơphet hơdor glăi 20 thun akŏ pơdong tơring čar, lăng sa bruă mă lăp hơdor pioh yôm pơphăn biă mă. Ƀrô djơ̆ tal anai, tơring čar pok pơhai lu bruă mă kiăng pơtô pơblang pôr pơthâo kơ gru phun čih pioh, gru grua hiam tơring čar, pơtrut pran jua thâo pơ-ư ang  khăp kơ djuai ania, khăp kơ lŏn ia laih anun ngă kjăp tơlơi đăo kơnang mơ̆ng djop gưl mơnuih ƀôn sang amăng bruă git gai wai lăng mơ̆ng ping gah, gong gai kơnuk kơna tơring čar.