Amăng mông mă bruă, Khua pơ ala Sang bruă Ring bruă jar kơmar Anom mrô 2 jơlan rơdêh treng Khač čang rơmang tơring čar Lâm Đồng lăi pơhing kơ pơkă kual bơdjơ̆ nao jơlan rơdêh treng Đà Lạt – Tháp Chàm, ngă gal brơi pioh anom bruă tŭ mă, pok pơhai hơdôm yak kiăng hloh anăp nao ngă giong hră čih lăi pơthâo glăi kơsem min ngă tui pioh dưi hơkrŭ glăi jơlan rơdêh treng anai.

Hrŏm hăng anun, Sang bruă Ring bruă jar kơmar Anom mrô 2 jơlan rơdêh treng dêh čar Khač ăt rơkâo mơn tơring čar Lâm Đồng hơduah ĕp, lăi pơthâo nao rai gum hrŏm pioh pơtrut pok pơhai rơwang bruă pok prong jơlan por jar kơmar tô nao rai Đà Lạt – Singapore, Đà Lạt – Siem Reap hăng sa dua bôh dêh čar kual Đông Bắc Á kah hăng Japan, Hàn Quốc. Tui hăng ơi Trần Hồng Thái – Khua Jơnum min mơnuih ƀôn sang tơring čar Lâm Đồng, bruă hơkrŭ glăi jơlan rơdêh treng Đà Lạt – Tháp Chàm ăt kah hăng pok prong hơdôm jơlan por jar kơmar leng kơ kiăng biă, lăp djơ̆ hăng hơdôm tơlơi pơkă hmâo pơsit laih./.