Sang glông pơdong tong krah plơi prong jưh jom Hà Nội lĕ anih wa Hô dŏ hơdip hăng mă bruă sui hloh lơ̆m glăk djru ngă hơkrŭ. Ƀơi anai djă pioh glăi lu gru grua hing ang đưm hlâo adih, yôm phăn biă mă amăng thun blan tuč rơnuč amăng tơlơi hơdip, ngă hơkrŭ mơng wa Hồ. Amăng sang anai, amăng hơdôm thun blah ayăt Mi glêh tơnap ƀơi kual kơdư, lơ 17/7/1966, wa Hô dŏ čih tơlơi iâu pơthưr abih bang mơnuih gir run blah kơdong glăi ayăt Mi. Ăt ƀơi anai mơn, dong mơng thun 1965 truh 1969, wa pioh hrơi mông čih glăi hră pioh hơdor hing ang mơng anun pioh glăi lu tơlơi kiăng khăp brơi abih bang mơnuih, Ping gah, khul ling tơhan, brơi hlăk ai čơđai anet. Hăng ăt ƀơi anai lĕ anih ñu tơ̆i pran. Hơmâo 4 thun ngă tơhan wai pơgang wa Hô hăng rơbêh 30 thun tơdơi anun pơlir hăng bruă djă pioh, lăi pơthâo gru grua Khua mir sir Hồ Chí Minh, amăng anih djă pioh gru grua Ƀirô Khua mir sir, ơi Trần Viết Hoàn, Khua anih djă pioh gru grua Khua mir sir Hồ Chí Minh ƀơi Ƀirô Khua mir sir pơsit tong:

“Sang glông wa Hô mă bruă amăng 11 thun, anai lĕ thun blan yôm phăn hăng Ping gah kah hăng lŏn ia. Wa lơ̆m anun ngă Khua mir sir. Anai ƀu djơ̆ sang prong rơhaih, samơ̆ sang glông wa Hô jing anih hing ang. Sang glông wa Hô hơmâo 3 anih dŏ, mơ̆ pran jua wa Hô lơ̆m anun pơmĭn nao bruă hơkrŭ yua anun sang anet anai ăt jing anih thưt angĭn hăng bơngač, ia bơnga ƀâo hiam por hyu jum dar. Amăng sang anai, wa Hô lu mơmŏt mlăm mơdưh pơmĭn nao bruă ngă hơkrŭ pơ kual Dơnung, tơlơi pơmĭn kơ bruă ngă hơkrŭ kual Kơdư hăng pơmĭn nao bruă mut hrŏm jar kmar. Hơdôm thun ƀơi anai wa Hô hơmâo ba tơbiă tơlơi črâo ba blah wang, hơdră bruă kiăng pơhlôm ba bruă ngă hơkrŭ Việt Nam hơmâo lu tơlơi dưi prong prin”.

Kơ-iăng nai tha prin Hoàng Chí Bảo brơi thâo, sang glông anai pơdah tong ten tơlơi hơdip hiam klă hăng ƀu kiăng hơget prong ôh mơng wa:

“Tơlơi hơdip ƀu kiăng hơget prong đơi ôh, lĕ tơlơi yôm hloh pơdah gru hơdip hiam mơng Khua mir sir Hồ Chí Minh. Lơ̆m dŏ hơdip, găn rơgao rơbêh 60 thun ngă hơkrŭ hăng lu tơlơi glêh tơnap glăm ba mơng wa mơ̆ wa Hô ăt hơdip tui pran ñu hor buh sum ao kaki sô, truh hrơi ñu rơngiă ăt buh sum ao kaki mơn, čut jĕp kơsu pioh glăi tơlơi yôm hing ang truh ră anai, hơdôm gơnam yôm mơng đưm hlâo pơdah ñu lĕ sa čô Khua apăn akŏ - sa čô mơnuih hơdip ƀu kiăng tơlơi pơdrong asah ôh”.

Ră anai, sang glông pơdong amăng anih djă pioh gru grua Khua mir sir Hồ Chí Minh ƀơi Ƀirô khua mir sir jing anih yôm, anih pơdah bă blai pran khăp mơnuih ƀon sang Việt Nam hăng ƀing mơnuih khăp tơlơi rơnuk rơnua amăng rŏng lŏn tơnah. Khua git gai Ping gah dêh čar hơđăp Nguyễn Văn Linh juăt lăi: Wa pơdah ñu lĕ mơnuih gir run abih pran jua hăng hơdip tui tơlơi pơmĭn pơdrong asah ƀu dưi pơhưč, rin rơpa ƀu ngă tơpư̆ lư̆, kơdrưh ang ƀu dưi ngă pơplih pran gir run, tơpă sit. Ñu hơdip tui pran ñu hor đôč. Bruă mă, tơlơi pơmĭn hăng gru hơdip mơng wa djă pioh na nao, hăng hơmâo mơnuih ƀon sang kiăng khăp biă mă”. Bơ Khua mir sir Nga ơi Putin, Khua apăn akŏ dêh čar blung a amăng rơwang thun 21 hơmâo nao čuă anih dŏ hơdip mơng Khua mir sir Hồ Chí Minh hơmâo čih glăi: “Ñu ăt lăng yôm lơ̆m ƀuh anih dŏ hơdip mơng sa čô nai hing ang mơng mơnuih ƀon sang Việt Nam. Sa čô mơnuih rơgơi kơhnâo amăng rŏng lŏn tơnah”.