Amăng mrô ƀing čơđai blung a amăng sang hră gru grua kông ang mơnuih ƀôn sang II hơmâo amon Y Gió M’lô, čơđai hrăm anih 10, djuai ania M’nông, dŏ amăng ƀuôn Drang Phốk, să Buôn Đôn, tơring čar Dak Lak. Amĭ ama ñu rơngiă yua ruă kă, 5 adơi ayong hơdip gơnang nao rai hăng lu tơlơi tơnap tap. Amai ñu lĕ Nguyễn Thị Ngân M’lô khŏm pơdơi sang hră kiăng kơ ngă anih gơnang nao mơng adơi đet. Yua anun, hrơi Y Gió čơkă mă hră pơ-ar mut hrăm Sang hră gru grua kông ang mơnuih ƀôn sang II ăt lĕ hrơi sang anŏ ñu hơmâo dong tơlơi čang rơmang. Amai Nguyễn Thị Ngân M’lô brơi thâo: “Rĭm thun hrăm phrâo kiăng hơmâo hră, sum ao, anih hrăm. Yua sang hră pơ anai ataih hơdôm hơpluh km, anai lĕ tơlơi bơngô̆t kơ sang anŏ. Kâo hrăm hơdơ̆ anih 9 laih anun lui sang hră. Tơdơi kơ hơmâo hră mơ-it kơ adơi kâo dưi mut hrăm sang hră kông ang, sang anŏ gơmơi hok mơ-ak biă, anai lĕ tơlơi čang rơmang mơng sang anŏ gơmơi”.

Hăng Y Gió, hơdôm hrơi blung a ƀơi sang hră lĕ sa tơlơi pơplih prong. Ataih mơng sang anŏ, ƀing nai, gơyut gơyâo phrâo laih dong dŏ đăm glăi, ñu ăt hluh rơđah tơlơi glăm ba mơng ñu laih dong mơnuih amăng sang anŏ: “Kâo pap biă mă kơ ayong amai adơi sang anŏ gơmơi. Kâo amra gir run hrăm hră kiăng tơdơi anai jing anih gơnang nao mơng sang anŏ”.

Ăt pơphun thun hrăm phrâo ƀơi Sang hră gru grua kông ang mơnuih ƀôn sang II, amon Hoàng Ngọc Hoa, čơđai hrăm anih 10, dŏ ƀơi să Ea Wer, tơring čar Dak Lak, ñu lĕ sang anŏ lu tơnap tap. Ơi ñu đưm hlâo djru blah wang, djơ̆ jrao hret. Ama ñu rơwen rơwo djô găn, amĭ ñu rơngiă yua rơdêh jrŏm. Mơng anet, Hoa hrăm hră rah, wai lăng, čem rông ba ama hăng adơi anet. Hăng sang anŏ Hoa, bruă ñu dưi mut sang hră phrâo lĕ tơlơi dưi kiăng ñu gir run hrăm thâo ƀiă. Ƀu djơ̆ kơnong hơmâo dong tơlơi gal hrăm hră, anih hrăm phrâo ăt pơtrut pơsur kiăng Hoa ngă tui tơlơi čang rơmang mơng dŏ anet. Mơng tơlơi kiăng jing kông ang, ñu jai gir run lơm dưi hrăm amăng sang hră yôm phăn tui anai: “Mơng dŏ anet kâo čang rơmang dưi ngă kông ang, kâo ăt aka ƀu thâo amra dưi ngă hă ƀŭ, samơ̆ ră anai dưi mut hrăm sang hră kông ang laih, kâo pơmĭn năng ai ñu ƀiă dưi laih, tơdơi anai jing mơnuih sang anŏ gơnang nao laih dong amăng pran jua kiăng pơgang brơi plơi pla hơđong”.

Hrŏm hăng Y Gió hăng Ngọc Hoa, ƀing čơđai tơnap tap hloh pơkŏn ăt glăk jing ƀing čơđai blung a nao hrăm sang hră gru grua kông ang mơnuih ƀôn sang mrô II. Thun hrăm 2026-2027, sang hră ĕp pơmut čơđai ƀơi Dak Lak, Gia Lai, Lâm Đồng hăng Quảng Ngãi, hăng pok 34 anih hrăm, rơbêh 1.000 čô čơđai. Anai lĕ sang hră pơtô phara dŏ đăm glăi mơng gưl I truh gưl III, brơi kơ ƀing čơđai sang anŏ tơnap tap, amăng anun hơmâo ƀing ană bă tơhan rơka, tơhan djai pơsăn drơi, ană bă sang anŏ tui hơdră djru tơnap tap, ană bă mơnuih djuai ania ƀiă lĕ hơdôm sang anŏ ƀun rin, giăm ƀun rin hăng čơđai arăng djru ba pơkŏn.

Hơnong pơkă mơng sang hră ƀu djơ̆ kơnong lĕ ba čơđai nao hrăm hră đôč ôh mơ̆ ăt lĕ čem rông, pơtô pơjuăt brơi djop mơta. Anih hrăm đôm lăm djru brơi ƀing čơđai thâo hơdip hrŏm, jê̆ giăm hăng nai pơtô, hơmâo tơlơi đing nao, thâo tơlơi čang rơmang hăng tơlơi hơdip kiăng kơ hơmâo jơlan gah pơtô hrăm lăp djơ̆. Hơdôm bruă ĕp lăng, pơhrăm boh thâo phrâo hăng hơdôm bruă mă tui khul grup ăt amra pơphun, djru brơi ƀing čơđai ƀơƀrư̆ thâo hluh, khin hơtai. Đại tá Mai Hữu Vạn, Khua sang hră gru grua kông ang mơnuih ƀôn sang mrô II brơi thâo, sang hră pơsit tong bruă pơjing bruă pơtô brơi tơlơi hơdip, tơlơi rơnuk rơnua, phiăn juăt lĕ bruă jao akŏ phun: “Sang hră gru grua kông ang mơnuih ƀôn sang II amra gir run jing anih hrăm mơ-ak klă-anih ƀing čơđai hơmâo čem rông ba, pơtô pơjuăt hăng pơsur pran jua găn rơgao tơnap tap”.

Hơdôm hrơi blung a mut hrăm, ƀing čơđai ăt lu sư̆ rơbư̆. Samơ̆ gah tlôn rĭm čô čơđai sang hră lĕ sa boh sang anŏ tơnap tap hăng sa tơlơi lăi nao phara hăng sa tơlơi čang rơmang mơng rĭm čô. Hăng ƀing čơđai hlâo anun ƀiă lui sang hră yua sang anŏ tơnap tap ƀudah sang ataih ayaih, sang hră phrâo pok rai jơlan phrâo dong. 

Mơng hơdôm boh sang anŏ ƀun rin truh pơ anih pơtô hrăm, dŏ đăm glăi hơđong mơ-ak, tơlơi mơ̆ ƀing čơđai ƀuh ƀu djơ̆ kơnong lĕ anih hrăm hră gêh gal đôč ôh mơ̆ ăt lĕ tơlơi čang rơmang kiăng tŏ tui yak nao pơ anăp. Sa boh sang hră phrâo hơmâo čơkă ƀing čơđai blung a, hăng hrŏm hăng hơdôm hrơi blung a bưp ƀing nai, gơyut gơyâo phrâo ngă pơsur pran jua. Hăng Y Gió, anai lĕ tơlơi čang rơmang kiăng jing anih gơnang nao mơng sang anŏ. Hăng Ngọc Hoa, anai lĕ dưi ngă tui tơlơi hor jing sa čô tơhan kông ang. Bơ hăng lu sang anŏ, tơlơi čang rơmang yôm hloh lĕ ană bă dưi hrăm hră, hơdip hiam hăng tơdơi anai amra thâo mă bruă./.