Sang măi ngă rơ-ơ̆ gơnam, pơkra gơnam đang hmua ba sĭ pơ tač rơngiao pơdong ƀơi kual tuh tia pơkra ming Tâm Thắng, să Čư̆ Jŭt, tơring čar Lâm Đồng, prong 22.000 met karê. Sang măi hơmâo abih tih prăk tuh pơ alin 150 klai prăk, dưi ngă rơ-ơ̆ brơi 15.000 tơ̆n sầu riêng hăng pơkra 13.000 tơ̆n boh kruăi hrĕ rĭm thun, ĕp brơi bruă mă kơ giăm 250 čô mơnuih mă bruă amăng ƀon lan. Pô pơ ala anom bơwih ƀong, yă Nguyễn Thị Thái Thanh brơi thâo, sang măi amra pok pơhai mă yua tui jơlan gah pơkra lu gơnam. Rơngiao kơ boh sầu riêng, boh kruăi hrĕ, amra hơmâo lu gơnam pơkŏn dong. “Ƀing gơmơi kĭ pơkôl ngă hrŏm hăng bơnah ngă hrŏm mơng dêh čar Australia, anom bruă juăt blơi pơhrui, pơkra hơdăng Biochar mơng hơđuh sầu riêng hăng boh kruăi hrĕ. Tơlơi anai ngă ƀing gơmơi hyu blơi pơhrui hơđuh boh kruăi hrĕ hăng sầu riêng, mơng anai amra pơjing glông rô nao rai amăng ngă hmua brơi klă ƀiă”.

Đĭ pơhiăp amăng mông ngă lơphet pok mă yua sang măi, ơi Lê Trọng Yên, kơ-iăng Khua ding jum ngă hmua hăng ayuh hyiăng brơi thâo, sĭ mơdrô gơnam đang hmua pơ tač rơngiao mơng Việt Nam truh 70 klai đôlar Mi; kơnong kơ sầu riêng giăm 4 klai đôlar Mi. Amăng 8 blan thun anai, sĭ mơdrô sầu riêng truh 2 klai đôlar Mi, đĭ 26% pơhmu tui tơđar thun hlâo. Ding jum amra tŏ tui gum hrŏm hăng hơdôm boh ƀon lan pơjing gơnong bruă ngă hmua brơi klă tui, đĭ tui nua gơnam đang hmua, amăng anun hơmâo boh sầu riêng.

Kơ-iăng Khua ding jum ngă hmua hăng ayuh hyiăng rơkâo hơdôm anom bơwih ƀong, hơdôm khul grup hăng mơnuih ngă hmua ƀơi kual Dap kơdư kiăng kơtưn pơjing glông pơlir hơbit gơnam hơmâo nua, anăp nao pơkra gơnam brơi klă; laih dong tañ thâo tơlơi kiăng mơng anih anom blơi pơhrui kiăng pơjing anăn apăn sĭ mơdrô brơi kơ gơnam đang hmua. “Ƀing ta dưi pơkra brơi klă hloh hăng tui hơnong pơkă mơng anih anom blơi pơhrui kiăng hơget, ƀing ta amra đing nao tơlơi anun, kiăng pơjing anăn apăn gơnam đang hmua Việt Nam lăi hrŏm hăng gơnong bruă sầu riêng lăi phara. Ƀing ta kiăng pơplih hơmâo gơnam sĭ djop bơyan, ƀu djơ̆ kơnong ngă rơ-ơ̆ boh sầu riêng đôč ôh mơ̆ ăt kiăng pok prong ba sĭ boh ƀơr, pơhăng, boh kruăi hrĕ…hăng hơdôm gơnam pơkŏn dong. Mơng anun, pơjing kjăp hơdôm gơnam đang hmua ba sĭ pơ tač rơngiao mơng Việt Nam”.

Tơdơi kơ pok mă yua, anom bruă hơmâo kĭ pơkôl ngă hrŏm hăng sa, dua anom bruă blơi pơhrui gơnam đang hmua mơng dêh čar Australia, Khač hăng Prang, anăp nao pơjing glông pơlir hơbit pơkra gơnam đang hmua sir klĕp. Sit biă ñu, anom bơwih ƀong hơmâo ba sĭ boh sầu riêng dưm kơthung rơ-ơ̆ blung a pơ dêh čar Khač, hơmâo 2 boh rơdêh container hăng abih tih 54 tơ̆n./.