Ră anai, Ding jum pơtô pơjuăt hơmâo akŏ pơjing 63 grup pel ĕp, wai lăng, čom puang ƀơi 63 boh gơnong bruă pơtô pơjuăt. Ding jum ăt amra akŏ pơjing 10 grup pel ĕp dơlăm dong kơ bruă prap lui tal pơplông brơi 20 boh ƀon lan amăng đơ đam dêh čar. Kơ bruă pel ĕp bruă wai lăng ƀơi ƀon lan, Ding jum pơtô pơjuăt hơmâo akŏ pơjing 63 grup nao pel ĕp pơ 63 boh gơnong bruă pơtô pơjuăt (ƀu yap wŏt hơdôm grup mơng Khul git gai dêh čar).

Ăt tui ơi Nguyễn Đức Cường, Khua khul pel ĕp Ding jum pơtô pơjuăt, mrô mơnuih apăn bruă aset hloh ngă bruă pel ĕp ƀơi anih amăng hơdôm hrơi wai lăng ƀơi sa anih pơplông thun anai hơmâo pơplih hrŏ trun lăp djơ̆ hăng tơlơi gal sit nik. Kiăng pơplông bruă pel ĕp ngă tui djơ̆ tơlơi pơkă, Ding jum pơtô pơjuăt pơphun hơdôm tal jơnum pơtop hrăm brơi ƀing apăn bruă phun ƀơi hơdôm boh sang hră gưl prong, gơnong bruă pơtô pơjuăt kơ bruă wai lăng, čom puang, tơdơi anun ƀing pô anai lĕ ƀing akŏ phun kiăng pơphun hơdôm tal jơnum pơtop hrăm ƀơi ƀon lan.