Hăng anô̆ pha ra mơ̆ng neh wa Dap Kơdư lu ñu hmâo tơlơi hơdip ƀu pơdah rơđah, biă ñu hơdip hăng bruă ngă đang hmua ƀơi plơi pla, lu mơnuih akă ƀu tơbiă mơ̆ng plơi pla amăng lu thun. Yua anun, bruă lăi pơhing, biă ñu lăi pơhing kơ ia rơsĭ bul ia rơsĭ khom thâo, hăng lu jơlan gah, pơkĕ hrŏm kơplah wah lăi pơhing hăng pơtô ba mơnuih ƀôn sang. Phun akha sang bruă Tân Cảng Sài Gòn hmâo gum hrŏm hăng hơdôm bôh tơring čar, anom bruă pơphun hơdôm pluh mông lăi pơhing kơ ia rơsĭ, bul ia rơsĭ, ngă pơhưč mơnuih mă bruă brơi rơbêh kơ 4.000 čô mơnuih apăn bruă, mơnuih ping gah, ling tơhan hơđăp, mơnuih ƀôn sang, mơnuih mă bruă kơ sang bruă, sang măi, čơđai gưl dlông hăng čơđai sang hră ƀơi Dap Kơdư. Ơi A Bớt, Kơ-iăng Khua git gai Ping gah tơring čar Kon Tum brơi thâo:

 “Tân Cảng Sài Gòn hmâo pơkiăo nao laih mơnuih mă bruă nao pơ̆ hơdôm bôh tơring glông ataih yaih mơ̆ng tơring čar pioh lăi pơhing djru brơi mơnuih apăn bruă mơnuih ping gah, mơnuih ƀôn sang, biă ñu ƀing čơđai sang hră thâo dơlăm kơ bruă ia rơsĭ, bul ia rơsĭ Việt Nam. Jơnum lĕ tal pioh Grŭp pơtô bruă Ping gah hơdôm bôh tơring čar pơsit glăi tơlơi ngă tui bruă gum hrŏm hăng pơbưp hrăm tui, lăi pơthâo nao rai tơlơi găn rơgao hơdôm hơdră ngă klă amăng ngă tui bruă kơđi čar mơ̆ng Ping gah hăng Kơnuk kơna”.

Bruă hơduah ĕp lăng mơ̆ng ataih “Tân Cảng Sài Gòn 35 thun hrưn đĭ tơhnal rŏng lŏn tơnah, tô nao rai đơ đam rŏng lŏn tơnah” hmâo ngă pơhưč giăm truh 50 rơbâo wot čô mơnuih ƀơi 63 bôh tơring čar, ƀôn prong gum hrŏm; pơjing pran lar hyu gah anih anom, bruă mă tơhnal yôm phăn mơ̆ng ia rơsĭ, bul ia rơsĭ Việt Nam ƀơi đơ đam dêh čar lăi hrŏm hăng mơ̆ng Tân Cảng Sài Gòn lăi ha jăn. Kiăng pơđĭ bruă gum hrŏm lăi pơhing ia rơsĭ, bul ia rơsĭ hăng hơdôm anih anom, ơi Huỳnh Thế Mạnh, Khua Grŭp pơtô bruă Ping gah tơring čar Gia Lai rơkâo đĭ:

 “Pơkiăo nao mơnuih mă bruă djru brơi Grŭp pơtô bruă Ping gah nao pơ̆ hơdôm bôh tơring glông lăi pơhing kơ tơlơi pơhing phrâo, anih anom bruă mă yôm phăn mơ̆ng bul ii rơsĭ Việt Nam, tơlơi ia rơsĭ ngŏ ră anai... Pơphun dong bruă pơplông hơduah ĕp hmâo bôh tŭ yua sit nik, lar hyu tơlơi kiăng khăp ia rơsĭ bul ia rơsĭ hăng mơnuih ƀôn sang”.

Đại tá Nguyễn Năng Toàn, Khua git gai Ping gah, Khua Phun akha Sang bruă Tân Cảng Sài Gòn pơtŏng sit: Amăng thun 2024, Phun akha Sang bruă Tân Cảng Sài Gòn lăi ha jăn pơsit amra kơtưn hloh dong hơdôm jơlan hơdră gum hrŏm hăng Grŭp pơtô bruă Ping gah hơdôm bôh tơring čar kual Dap Kơdư wot rơnoh hăng mrô ñu. Amăng anun đing nao pơplih phrâo, pơplih lu mơta hơdôm hơdră lăi pơhing, đing nao pok prong dong mơnuih pioh lăi pơhing, hrŏm hăng anun pơkĕ hrŏm pơphun bruă lăi pơhing kơ ia rơsĭ, bul ia rơsĭ hăng bruă mă “Hơdor tơngia tla pran”, djru hơđong tơlơi hơdip mơda mơnuih mơnam, pioh pơđĭ dong anô̆ kơjăp hăng bôh tơhnal kơ bruă lăi pơhing truh lu mơnuih ƀôn sang.

 “Amra kơtưn đĭ mrô mơnuih nao mă bruă pơ̆ hơdôm anih anom, pơplih phrâo dong jơlan gah lăi pơhing, pôr pơhing truh lu mơnuih hloh hăng neh wa Dap Kơdư, pok prong dong mơnuih kiăng hmư̆ tơlơi pơhing, đing nao truh ƀing čơđai sang hră, čơđai gưl dlông, anom bơwih ƀong, gum hrŏm, mơnuih tuh pơplai hăng ngă tui pran kơtang lu mơta, iâo pơhrui đut hlah djop ngăn rơnoh pioh pơđĭ tui bôh tơhnal bruă lăi pơhing”.

Khua wai lăng bruă tơhan ia rơsĭ Đỗ Văn Yên, Kơ-iăng Khua git gai Ping gah Khul ling tơhan brơi thâo: Ping gah, Ƀirô pơtrun bruă ling tơhan ia rơsĭ gum hrŏm kơjăp dong, pok pơhai ngă tui ba glăi bôh tơhnal hăng hloh kơ tơhnal pơkă, bruă mă ba tơbiă, kơsem min dong bôh yôm, hơdră, jơlan gah phrâo; pơkĕ hrŏm hăng pơtrut kơtang bruă “Yua kơ ia rơsĭ, bul ia rơsĭ Việt Nam” hăng bruă “Đơ đam dêh čar yua kơ Trường Sa, Trường Sa yua kơ đơ đam dêh čar”.

 “Bruă pơgang ia rơsĭ bul ia rơsĭ amăng rơnuk phrâo ba tơbiă tơlơi kiăng prong hloh hăng bruă lăi pơhing. Khul ling tơhan ia rơsĭ tô̆ tui dong pơ̆ anăp anai gum hrŏm hăng hơdôm bôh tơring čar, ƀôn prong grŭp gơnong bruă dêh čar ta pơđĭ dlông bruă lăi pơhing ia rơsĭ, bul ia rơsĭ, pơsit anai lĕ bruă mă phun...".

Phun akha Sang bruă ngă tui ba glăi bôh tơhnal hơdră bruă, hơđong tơlơi hơdip mơda mơnuih mơnam ƀơi 3 bôh tơring čar hmâo kĭ pơkôl; rông ba truh kơ djai hăng 28 čô Amĭ Việt Nam Sông Kơtang, sang anô̆ ling tơhan pơsăn drơi yua kơ lŏn ia ƀơi tơring čar; djru pơdŏng 15 bôh sang dô̆ hơdor tơngiă; ƀơk prăk djru hrăm hră “Ngă bơngač tơlơi čang rơmang” brơi ƀing čơđai sang hră ƀun rin yak rơgao tơlơi tơnap hrăm rơgơi. Ƀơk gơnam kơ mơnuih gah hơdră bruă, mơnuih djru ngă hơkrŭ đưm, neh wa tơnap tap, ling tơhan rơka, duam ruă ƀơi tơring čar./.