Hăng mơnuih ƀôn sang djŏp djuai ania, Tê̆t rơngai lŏn ia ƀu kơnong jing hrơi hơdor glăi gru grua hing ang đưm hlâo, pơpŭ bơni kơ ơi yă anong wa đôč ôh ăt jing tơlơi pơtrut kiăng gum pơgôp kjăp hloh, đĭ kyar plơi pla. Ƀơi Anih gru đưm dêh čar Kơnua čư̆ 722 - Dak Săk, tơring čar Lâm Đồng, hơdôm hrơi blan Čơpăn hơdor glăi rơnuk blah ngă tuh drah pơčah asar mơ̆ng tơhan hăng mơnuih ƀôn sang amăng hơdôm thun 1965-1975, biă ñu, Blah rơngai Đức Lập, bơyan mơyan thun 1968. Hăng ơi Y Dơi, tơhan hơđăp djuai ania M’nông, ƀơi ƀon Dăk Săk, bruă blah ngă đưm dŏ kơđŏm glăi amăng pran jua ñu na nao đôč: “Kâo nao ngă tơhan mơ̆ng 18 thun. Hơdôm thun blah ayăt Mi, gơmơi hơdip amăng glai rưng Dăk Prĭ, Nâm Nung, djơ̆ anŏ ñu nao truh pơ čar Kur. Tơ tă anai dŏ hơdip mơn, hơmâo čơkă Hrơi akŏ pơdong kơnuk kơna, lăng plơi pla pơplih tui, ană bă hơdip jơnap mơn, kâo mơak biă. Kâo hơmâo Ding jum ling tơhan man brơi sang, rim blan hơmâo djru 6-7 klăk prăk dong, bơ ƀing gŏp tơhan gơmơi đưm ƀu thâo ƀuh dong tah hrơi lŏn ia rơngai, rơngôt biă. Hơdip amăng rơnuk anai, kâo lăng yom biă, laih anun hning kơ ƀing gŏp djai drơi kơ lŏn ia”.

Mơ̆ng hrơi mơak amăng Hrơi akŏ pơdong Kơnuk kơna, mơnuih ƀôn sang djŏp djuai ania ƀơi Dap Kơdư jai thâo rơđah hloh hơdôm tơlơi pơplih amăng tơlơi hơdip anai. Ƀơi să Ia Tul, tơring čar Gia Lai, hơmâo lu ring bruă glăk pơphun ngă kah hăng jơlan prong tŏ Jơlan 25 hăng să, ia yua hơdjă ƀơi ƀôn Biah A, jơlan bê tông xi măng nao truh pơ hmua ƀôn Tơ Khê̆. Hơdôm glông jơlan, anih ƀŏp ia pơkĕ apui lơtrik, hơmâo bơnư̆, king ia ƀơi ƀôn Tơ Khê̆, Ƀon Biah A, Ƀôn Biah B ăt hơmâo man pơkra mơn, kiăng huăi ia dăo, pioh či ngă hmua. Ơi Nay Hao, mơnuih ană plơi kơnang ƀơi ƀôn Jư̆, să Ia Tul, lăi nao kơ anŏ yom hrơi Akŏ pơdong Kơnuk kơna: “Hrơi akŏ pơdong Kơnuk kơna kơnôl 2/9, hrơi Wa Hồ pơđok Hră rơngai lŏn ia, laih anun anai jing hrơi prong, yom biă mă mơ̆ng djuai ania ta. Hơmâo tơlơi rơngai kah mơ̆ng hơmâo tơlơi hơđong, trơi pơđao yâo mơak kar hăng rơnuk anai. Kâo lăng lŏn ia ta glăk hrưn đĭ kơtang biă, pok prong ngă hrŏm hăng djŏp dêh. Hơdôm thun giăm anai, yua kơ hơmâo hơdră djru ba lăp djơ̆, pran jua gum pơgôp amăng plơi pla jai hrơi kjăp. Neh met wa hlơi hlơi leng kơ sa pran kiăo tui tơlơi pơčrâo jơlan mơ̆ng Ping gah, gum hrŏm bơwih ƀong, akŏ pơjing plơi pla jai hrơi pơdrong sah, klă hiam”.

Ƀơi plơi Kdang, să Anh Hùng Kdang, tơring čar Gia Lai, anih hơmâo 256 boh sang anŏ djuai ania Bahnar, bruă čơkă hrơi Akŏ pơdong kơnuk kơna dik dak mơtăm. Hla gru čar ta hơmâo akă yôl đĭ ƀơi anăp sang. Neh met wa pơphun bruă ngui ngor bơkjăp drơi jăn, kiăng mơak mơ-ai, gum pơgôp amăng plơi pla. Ơi Xuin, mơnuih amăng plơi Kdang lăi: “Amăng kơnôl 2/9, sang anŏ gơmơi hăng abih bang ană plơi leng kơ akă hla gru čar, ngui ngor mơak hrơi Akŏ pơdong kơnuk kơna. Hlâo kơ hrơi jơnum prong, rim bohn sang pơčruh prăk či blơi ană bơbui, tơpai čeh ngui ngor, mơñum ƀong, kiăng mơak, rơnuk rơnua hăng kiăng neh met wa khăp ƀu-eng kjăp hloh. Thun anai, ngui đă boh lông amăng plơi, hơmâo tơdăm dra, ƀing čơđai hai mơ-ak biă; abih bang leng kơ hơmâo pran jua, pơtrut pơsur čơđai gir hrăm hră hloh tơdơi kơ hrơi pơdơi”.