
Rơnuč blan 3/1975, lơ̆m tơdrŏn blah ƀơi hơdôm anih anom blah wang kual Dơnung pơplih tañ, Đại tướng Võ Nguyên Giáp hmâo črâo ba Ƀirô pơtrun bruă Quân khu 5 hăng Ƀirô pơtrun bruă Ling tơhan ia rơsĭ tañ tlaih rơngai kual bul ia rơsĭ Trường Sa. Tơdơi kơ anun, sa anom ngă tui bruă jao phara ha jăn dưi pơjing, hmâo khul tơhan Lữ đoàn 126 Tơhan mơbruă ia rơsĭ gum hrŏm hăng ling tơhan ƀơi kơdư, tơlơi pơhing, hơdôm bôh anom djru gah tlôn gah Quân khu 5.
Kiăng pơhlôm tơlơi hơgom, tô̆ tơnô̆, hơdôm bôh ƀat tô pơgiăng ling tơhan dưi pơhrô̆p jing ƀat tô hyu mă akan hơdang dêh čar tač rơngiao. Ling tơhan dŏp pô amăng hơdôm rơwang hong ƀat tô, amăng anih dưm gơnam, gir mă bruă amăng tơlơi ia rơsĭ tơglăk hăng bă kơ tơlơi huĭ rơhyưt. Čơtlăm lơ 13/4/1975, hơdôm bôh ƀat tô mơ̆ng ta hmâo nao giăm laih bul ia rơsĭ Song Tử Tây. Sing bring mơguah hrơi tơdơi, khul tơhan ia rơsĭ, ling tơhan mơ̆ng kơdư ha amăng plĕ pơanah phao, pok tal kơsung blah tañ nao pơ̆ bul ia rơsĭ. Khă bưp tơlơi kơdŏng glăi kơtang samơ̆ kơnang kơ tơlơi gum hrŏm kơjăp, tơlơi tô̆ tơnô̆, kơnong kơ 30 mơnit blah wang, khul ling tơhan tlaih rơngai hmâo ngă pô bul ia rơsĭ Song Tử Tây. Anun lĕ jua phao pok phun kơ bruă blah tlaih rơngai đơ đam bul ia rơsĭ Trường Sa.
Ơi Trần Đăng Ninh, 70 thun, plơi pla Hải Hậu, tơring čar Nam Định, ling tơhan hơđăp gum hrŏm blah tal anun hơdor glăi:
“Tal blah anun lĕ hơgom, tô̆ tơnô̆ nao giăm bul ia rơsĭ, gah khul ling tơhan Sài Gòn ƀu pơmin nao ƀing ta hmâo nao giăm tañ tui anun. Lơm anun, tơlơi ƀơi lŏn drŏn dô̆ hmâo lu tơlơi ƀu hơđong, ƀơi ia rơsĭ lu bôh ƀat tô ayăt rô nao rai, đa hmâo wot tơlơi lăng nao mơ̆ng gah rơngiao dong. Tơdơi kơ lơ 14/4, khul tơhan kơhnâo ƀing gơmơi dô̆ glăi wai lăng bul ia rơsĭ, bơ̆ grŭp pơgiăng ling tơhan rơka ruă, ling tơhan dô̆ mơnă pơwot glăi Đà Nẵng”.

Tô̆ tui pran gơgrong truh kih, lơ 21/4/1975, ling tơhan ia rơsĭ tal 2 yak rơgao jơlah ia mut nao amăng krah ia, nao giăm hăng amăng ƀrư̆ tlaih rơngai hơdôm bôh bul ia rơsĭ Sinh Tồn, Nam Yết, Trường Sa, Sơn Ca... Lơ 29/4/1975, hơdôm bul ia rơsĭ gal kual bul ia rơsĭ Trường Sa dưi tlaih rơngai. Trung úy Nguyễn Văn Mỹ, ling tơhan hơđăp hyu krâ̆o lăng gah Sư đoàn 2 mơ̆ng Lữ đoàn 126 ruai glăi, čơtlăm lơ 30/4, djop mơnuih hmư̆ hing tlaih rơngai Sài Gòn tui tơlơi pơhing phara ha jăn mơ̆ng Gong phun jua pơhiăp dêh čar Việt Nam, ol kơdol pran jua tơnap lăi pơthâo:
“Lơ̆m anun, ƀing gơmơi glăk ƀơi bul ia rơsĭ Song Tử Tây, lăi pơthâo nao rai tơnap tap biă. Lơm Gong phun jua pơhiăp dêh čar Việt Nam lăi pơthâo hmâo tlaih rơngai laih đơ đam kual Dơnung dêh čar, hlă khăn gru ding Độc Lập, adơi ayong hơk mơ-ak biă, pah tơngan, klao hŏk. Lơm thâo tlaih rơngai, ƀing gơmơi dô̆ hơdip hning hơngôt ƀing gŏp pơsăn drơi hlâo kơ mông rơnuk rơnua”.

Tơdơi kơ 50 thun dưi tlaih rơngai, tơring glông Trường Sa ră anai glăk hrưn đĭ pô kơtang amăng bruă bơwih ƀong gah ia rơsĭ, jing “hơtai bôh” amăng krah Ia Rơsĭ, djru pơđĭ tơhnal gơgrong lŏn ia ƀơi hla kak ia rơsĭ, bul ia rơsĭ jar kơmar. Ơi Nguyễn Tấn Tuân, Khua Jơnum min mơnuih ƀôn sang tơring čar Khánh Hòa brơi thâo, pơ̆ anăp anai, tơring čar ngă giong dong bruă kơđi čar, pơđĭ kơjăp tơlơi hơdip mơda kơ ling tơhan hăng mơnuih ƀôn sang ƀơi bul ia rơsĭ; pơtrut kơtang lăi pơhing, pơđĭ tơlơi pơmin kơ Trường Sa amăng mơnuih mơnam.

Ơi Nguyễn Tấn Tuân pơtŏng sit, tơhnal ba tơbiă lĕ ngă brơi Trường Sa jing anih anom phun bơwih ƀong – mơnuih mơnam rơnuk anai amăng krah ia rơsĭ Ngŏ, hrŏm hăng anun lĕ phao kơnong gơgrong kơjăp pơgang Lŏn ia pô:
“Pơhlôm klă, sa ƀô̆ mơta hơdôm tơlơi djru, hơdră bruă, mơta pơkon khom pơjing jơlan pơhrui prăk ƀơi anih mơnuih ƀôn sang dô̆. Hơdôm bôh sang anô̆ gum hrŏm rah bruă bơwih ƀong huă ngă đang hmua, gum hrŏm rah bruă pơgang ia rơsĭ, bul ia rơsĭ. Khul tơhan ia rơsĭ, tơring čar Khánh Hòa gum hrŏm bơwih brơi tơring glông bul ia rơsĭ. Anun lĕ jơlan pơsur prong pran jua, pioh djop mơnuih ƀôn sang amăng kual lŏn drŏn ăt kah hăng ƀơi bul ia rơsĭ ƀuh lĕ tâ̆o klă hloh lĕ pô dưi, rơngai hơjăn mơ̆ng Lŏn ia”./.
Viết bình luận