Rĭm boh tơring čar amăng kual lêng kơ hơmâo mơng 5 truh 6 čô khua mua nao Jơnum hlăk ai ba gru ngă tui tơlơi pơtô mơng Wa tal VIII ƀơi ƀôn prong Hồ Chí Minh. Ƀrô tal anai, Khul hlăk ai tơring čar Dak Nông pơphun pơpŭ bơni 28 čô hlăk ai ba gru ngă tui tơlơi pơtô mơng wa hăng 17 čô mơnuih Ping ga hlăk ai ba gru tơring čar Dak Nông rơwang thun 2023-2025.

Ăt ƀrô tal anai, Khul apăn bruă hlăk ai gơnong glông jao hră pơpŭ brơi 2 čô mơnuih, 1 grup hăng Khul hlăk ai Gia Lai jao hră pơpŭ brơi 5 čô mơnuih, 5 grup yua ngă truh kih amăng ngă tui jơlan hơdră tui hơnong pơkă dêh čar man pơdong plơi pla phrâo rơwang thun 2021-2025. Ayong Kpuih Rung-Khua khul hlăk ai să Ia Hla, tơring glông Chư Pưh, tơring čar Gia Lai brơi thâo sa, dua bruă mă amăng ƀon lan.

“Tal pioh hơdor hrơi tơkeng wa Hô, Khul hlăk ai să Ia Hla pơphun lu bruă mă yôm phăn hăng sit nik. Sit biă ñu Khul hlăk ai să gum hrŏm hăng Khul đah kơmơi hăng hơdôm khul grup pơphun pơbưp, pơlăi nao rai bruă mă tui anăn pơphun bơdjơ̆ nao wa,  hơdor glăi gru grua ngă hơkrŭ, pơphun ngui adôh suang, bơrơguăt drơi jăn anun lĕ adôh pơpŭ kơ wa Hô hăng ngui pah boh lông…Laih dong, pơphun ƀơk gơnam brơi čơđai drơi jăn ƀu klă, nao čuă hăng ƀơk gơnam brơi ling tơhan hơđăp, sang anŏ tui hơdră djru”.