Dak Lak ră anai hơmâo rơbêh 41.000 ektar đang pla sầu riêng, amăng anun giăm 30.000 ektar glăk amăng thun pĕ pơhrui, boh sầu riêng pĕ amăng bơyan anai him lăng giăm 500.000 tơ̆n. Samơ̆, đơ đam tơring čar Dak Lak phrâo hơmâo 280 mrô kual pla hăng giăm 7.500 ektar hăng 42 mrô anih anung gơnam hơmâo gah dêh čar Khač tŭ yap. Ră anai dŏ 165 glăk dŏ tơguăn anom bruă wai lăng sĭ mơdrô pơ tač rơngiao dêh čar Khač (GACC) sem lăng.

Tui Jơnum min mơnuih ƀon sang tơring čar Dak Lak, mah abih bang hră pơ-ar anai hơmâo tŭ yap, đơ đam đang hmua hơmâo mrô kual pla ăt kơnong giăm 40% pơhmu hăng đang hmua glăk pĕ pơhrui. Tơlơi anai amra ngă giăm 295.000 tơ̆n sầu riêng ăt dong ƀơi anăp kơ tơlơi ngă glêh tơnap mơng anih anom blơi pơhrui.

Hrŏm hăng Dak Lak, hơdôm boh tơring čar Gia lai, Lâm Đồng, Quảng Ngãi ăt ƀuh lu tơlơi tơnap tap lơm pok pơhai tơlơi pơtrun mrô 38 kơ mrô kual pla sầu riêng hăng anih anung gơnam. hơdôm boh tơring čar rơkâo tañ hơmâo tơlơi črâo ba pơmut hrŏm kơ tơhnal pơkă tơlơi dưi ba sĭ mơdrô pơ tač rơngiao, laih dong pơgiong anih wai lăng hră pơ-ar tơdơi kơ tơlơi pơtrun pơsit dưi ngă tui.

Ơi Nguyễn Hoàng Hiệp, Kơ-iăng Khua ding jum ngă hmua hăng ayuh hyiăng brơi thâo, Ding jum glăk kơsem min pơplih pơkra tơlơi pơtrun mrô 38 tui tơlơi git gai mơng Khua dêh čar tui jơlan gah pơplih hơdeč ƀiă; laih dong dưm amăng măi mok kơ bruă jao mrô kual pla hăng anih anung gơnam, pơplih kơtang mơng pel ĕp hlâo hơdai nao pel ĕp tơdơi dong kiăng pla ƀiă hră pơ-ar brơi mơnuih ƀôn sang hăng anom bruă sĭ mơdrô.

Hăng bơyan pĕ pơhrui sầu riêng thun anai, Ding jum ngă hmua hăng ayuh hyiăng amra gum hrŏm hăng djop ding jum, gơnong bruă mă bruă hăng dêh čar Khač kiăng pơtrut jao mrô kual pla, anih anung gơnam; laih dong pơsur pơđĭ kyar sĭ mơdrô pơ tač rơngiao sầu riêng dưm amăng kơthung rơ-ơ̆. Samơ̆, hơdră bruă phun khŏm kiăng gơnong bruă sầu riêng pơđĭ kyar hơđong kjăp kah mơng dưi pơjing pran đăo gơnang mơng anih anom blơi pơhrui hăng bruă pla pơjing klă hloh. Ơi Nguyễn Hòang Hiệp lăi rơđah: “Kiăng pơjing pran đăo gơnang mơng anih blơi pơhrui, djop gơnam kiăng thâo tong ten anih pla, thâo pô hlơi pla, bruă pla pơjing hiưm pă hăng lơm hơmâo tơlơi ngă soh ăt kiăng hơmâo pô glăm ba. Lơm bruă ĕp pơƀuh anih phun dưi ngă tui djop, ƀing gơmơi amra hrŏm hăng ƀon lan ngă tui ha amăng plĕ kơ bruă anai./.