Nao ngă tơhan mơng 14 thun, tơhan hơđăp Lâm Xuân Quang, thun anai 70 thun brơi thâo.

“Bơyan bơnga thun 1969 lơm kâo glăk ƀơi tơdron blah wang kual Ngŏ, kâo hmư̆ Khua mir sir Hồ Chí Minh pơpŭ thun phrâo hăng boh pia…Hmư̆ đok wa mơ-ak biă mă ngă kâo ol kơdol pran jua, pơtrut pơsur amra pơkra sa anih pioh pơpŭ kơ wa Hô”.

50 thun pơmĭn nai kơ bruă anai, ĕp pơƀut glăi hră pơ-ar, truh thun 2018, tơdơi kơ pơkra ming sang glăk dŏ ră anai, ñu gir run pioh ha tal kiăng kơ ngă anih djă pioh gru grua Khua mir sir Hồ Chí Minh. Hmư̆ pơpă hơmâo hră pơ-ar lăi nao Khua mir sir Hồ Chí Minh ñu amra tui nao mơtăm, ƀudah hmư̆ amăng brô̆, tivi, hră pơhing lăi nao Khua mir sir Hồ Chí Minh, ñu amra čih pioh mơtăm.

Ba ƀing gơmơi nao lăng anih pơdă prưng rơhaih giăm 300 met karê, ơi Quang brơi thâo hơdôm pok rup, hră pơ-ar pơƀut glăi mơng lu anih. Sit biă ñu, rup rap kơ jơlan Trường Sơn, rup rap rơdêh asar tul rơbuh amăng jang Dinh Độc Lập yang hrơi dong lơ 30/4/1975 hrŏm hăng lu rup rap gru grua hing ang hơmâo ơi Quang tol yôl dua bơnah pơnăng sang ñu:

“Yak mut amăng sang blung hlâo ƀuh boh rŏng lŏn tơnah, čih glăi glông jơlan đuăi hyu ĕp jơlan pơklaih rơngai lŏn ia mơng wa Hô lơm găn nao giăm 40 boh dêh čar. Mơng anai, Khua mir sir Hồ Chí Minh tŭ mă tơlơi thâo thăi, pran pơtrut pơsur hơmâo tơlơi rơnuk rơnua-rơngai djuai ania, tơlơi thâo thăi mơng Hồ Chí Minh kiăng glăi git gai ngă hơkrŭ truh kih. Bơ anai lĕ Pác Bó, ia krông Lênin, kơčong čư̆ Các-Mác, anai lĕ Jơnum Diên Hồng thun 1945…Bơ ƀơi anai lĕ 2 gơnam hơđăp mơ̆ wa yua lu hloh anun lĕ măi čoh hră hăng radio…Bơ anai lĕ rup rap hơdôm boh sang mơng kual Kơdư, Dơnung, hăng ia krông, pin ia, song nan…hơmâo dưm tong krah anih pơdă prưng, kar hăng kiăng pơdah pran khăp mơng mơnuih ƀôn sang kual Dơnung čơkă Khua mir sir Hồ Chí Minh lơm lŏn ia tal pơlir hơbit”.

Ƀu djơ̆ kơnong pok amăng amăng bơyan ngui ngor đôč ôh, anih djă pioh gru grua Khua mir sir Hồ Chí Minh mơng ơi Quang lêng kơ pok bah amăng na nao. Ñu ăt ngă rah mơnuih pơblang brơi kiăng lăi pơthâo hơdôm gơnam sô hơđăp hrŏm hăng hơdôm tơlơi bơră ruai mơ-ak bơdjơ̆ nao wa. Hoàng Ánh Ngọc, dŏ ƀơi ƀôn prong Hồ Chí Minh, nao lăng anih djă pioh gru grua Hồ Chí Minh brơi thâo:

“Kâo hrŏm hăng amĭ ama hăng ƀing neh met wa, ƀing tơhan hơđăp, nao čuă lăng “Anih djă pioh gru grua Hồ Chí Minh” kơ wa Quang. Kâo ol kơdol biă mă…Ring bruă anai hơmâo wai pơkra hiam biă mă. Wa Quang lĕ mơnuih pioh abih pran jua kah hăng dưi pơkra ring bruă tui anai. Rơnuk hlăk ai kar hăng kâo dưi hluh rơđah dong kơ Khua mir sir Hồ Chí Minh, kơ tal ngă hơkrŭ mơng djuai ania kiăng ba glăi tơlơi rơngai brơi lŏn ia ră anai”.

Lơm 70 thun laih, ơi Lâm Xuân Quang čang rơmang dưi man pơkra “Anih djă pioh gru grua Hồ Chí Minh” hăng boh thâo ia rơgơi 4D kiăng pơdah glăi rup rap, hră pơ-ar kơ wa djru mơnuih ƀôn sang Việt Nam hăng gơyut gơyâo jar kmar nao pel ĕp kơ gru grua Khua mir sir Hồ Chí Minh pơƀuh glăi sit nik, djop mơta. /.