Hrŏm hăng bruă wai lăng, pơgang ba jơlan guai dêh čar glông rơbêh 292km, tơhan pơgang guai ƀơi Kon Tum ăt gum djru prong mơn hăng bruă “Pơhrăm ană mơnuih” ƀơi guai dêh čar. Tơdah mơng hlâo adih, lu khua mua, tơhan pơgang guai hơmâo mơnuih ƀon sang iâu hơ-on jing “Nai pơtô buh ao mơtah”, ră anai gơñu jing ama rông lu čơđai ƀơi Puih kơđông tơhan pơgang guai laih anun čung ba ƀing čơđai sang anŏ tơnap tap dưi nao hrăm hră.

Tơdơi kơ hơmâo tơlơi rơngôt rơngiă ama, amĭ đuăi hĭ, adơi A Ứng, djuai ania Jarai, ƀơi plơi Grập, să Mo Rai, tơring glông Sa Thầy, tơring čar Kon Tum hơmâo ƀing khua, ling tơhan pơgang guai Mo Rai tŭ glăi ngă ană rông. Amăng 4 thun rơgao, A Ứng hrăm anih 7 laih, juăt laih hăng tơlơi hơdip amăng puih kơđông tơhan. A Ứng ăt ngă tui 11 mơta tơlơi pơkă amăng ha hrơi, laih anun 3 tơlơi pơkă amăng ha wơ̆t hrơi tơjuh kah hăng sa čô tơhan mơn. Mơng anet ñu lil biă, ƀu khin ôh, yua hơmâo ƀing tơhan pơgang guai Mô Rai lăng ba, pơtô ba jing A Ứng jai hrơi khin hiăp tui laih:

“Rim hrơi ƀing ayong lăng ba kâo, ƀing ayong tơnă asơi hơbai añăm brơi kâo ƀong. Kâo huă asơi giong kâo hrăm hră. Ƀơi anŏ ñu kâo hmao lĕ kâo kih rơmet sang, djru ƀing ayong ngă bruă. Kâo hor hrăm Toán, pơgi kơdih anai kâo kiăng ngă tơhan tui hăng ƀing ayong ƀing amet anai mơn či pơgang ba Lŏn ia ta”.

Jing mơnuih hơmâo khua git gai tơhan pơgang guai Mo Rai jao bruă ba nao pơgiăng glăi, pơtô ba ană amon A ứng hrăm hră, Trung uý Hoàng Như Thanh, Khua grup tơhan blah ngă brơi thâo: A Ứng rơgơi biă, gir hrăm hră. Kiăng dưi ngă bruă arăng jao kơ sa čô ama, Trung uý Hoàng Như Thanh khŏm hyu ĕp, hla tui arăng dong kiăng thâo rông ană hiư̆m pă:

“Kâo phrâo hrăm giong đôč, hlăk 23 thun đôč mơn, aka ƀu pơmin ngă ama ôh, samơ̆ yua kơ bruă arăng jao ta khŏm gir yơh. Kâo ăt hrăm, lăng tui arăng čem rông pơtô ană bă hiư̆m pă. Truh mông ƀơi kiăng pơtô tơlơi hơget, kâo ăt gir yơh, kiăo tui tơlơi pơtô ba mơng ƀing ayong ƀing anong amet dong”.

Truh ră anai hơmâo laih 14 puih kơđông ƀơi tơring čar Kon Tum čơkă rông ba 15 čô čơđai anet. Ƀing čơđai lêng kơ ană drit droai soh, pap grap biă mă. Hăng ƀing čơđai sang anŏ tơnap tap, gir hrăm hră, ngă tui jơlan hơdră “čung ba tơkai adơi nao hrăm hră”, ƀing khua, ling tơhan puih kơđông tơring čar Kon Tum hơmâo čơkă rông ba 75 čô, rim blan djru kơ rim čô čơđai 500.000 prăk.

Hrŏm hăng jơlan hơdră “Čung ba tơkai adơi nao hrăm hră - Ană rông tơhan pơgang guai”, amăng hơdôm thun rơgao, tơhan pơgang guai Kon Tum ăt djru ba lu čơđai ƀơi 13 boh să guai dêh čar mơng tơring čar dưi nao hrăm hră hăng lu bruă djru hmao tlôn hăng sit nik. Amai Y Ly, djuai ania Brâu, sang ñu pơ plơi Đăk Mế, să Pờ Y, tơring glông Ngọc Hồi, brơi thâo tơdah ƀu hơmâo tơlơi djru ba mơng Tơhan pơgang guai bah amăng jang jar kmar Bờ Y, ană dra ñu lĕ adơi Y Uyên glăk hrăm anih 8 amra khŏm pơdơi hrăm laih:

“Ƀing adơi ayong djru brơi prăk kơ ană kâo hrăm, wơ̆t hăng prăk ƀong huă, braih huă ƀing gơ̆ mơn blơi brơi. Sang anŏ kâo bơni biă mă kơ ƀing adơi ayong. Dua rơkơi bơnai gơmơi ăt pơtă laih ană bă kiăng hrăm truh anih đah mơng huăi ngă rơngiă pran jua adơi ayong djru ba”.

Mơng tơlơi lăng ba, gum djru mơng ling tơhan pơgang guai tơring čar Kon Tum, ƀing ană amon ngă ană rông mơng puih kơđông, gah Jơlan hơdră “Čung ba čơđai nao hrăm hră” ƀudah čơđai sang anŏ tơnap tap triang hrăm hră hăng gir hrăm. Amăng hơdôm thun rơgao, hrŏm hăng bruă wai lăng, pơgang ba hơđong kơjăp guai dêh čar glông rơbêh 292km giăm dua boh dêh čar Lao hăng Kur, tơhan pơgang guai Kon Tum ăt gum djru yôm hăng bruă “Pơjing ană mơnuih” ƀơi guai dêh čar./.