Blan 4 bơyan phang Dap Kơdư pơ-iă kah hăng apui čuh. Ƀơi lan pơtŏp tơhan, hơdôm pluh čô tơhan gah Anom bruă tơhan rŭi hyu hơdeč Kông an tơring čar Dak Lăk ăt dŏ gir pơtŏp hrăm đôč. Ječ ameč uă ia hâ̆o, Trung úy Hứa Văn Hòa brơi thâo:“Pô kâo hrŏm hăng abih bang ƀing khua, ling tơhan amăng tơhan rŭi hyu hơdeč hmar lêng kơ gir pơtŏp hrăm bruă, kjăp bruă kơđi čar. Gơmơi juăt pơhrăm taih, boh thâo blah ngă, ăt kah hăng mă yua rơguăt djŏp djuai phao kơtuang prăp lui blah ngă, gơgrong ngă bruă hăng dưi ngă truh kih djŏp bruă hơmâo jao”.

Kjăp blah ngă amăng rơnuk phrâo, biă ñu amăng blan 6/2023, tơhan rŭi hyu hơdeč Dak Lăk ječ ameč hrŏm hăng hơdôm anom bruă kiăo mă abih ƀing ngă pirăt djă phao ƀơi Čư̆ Kuin. Tui hăng Thượng tá Vũ Thành (77 thun) - Khua hơđăp Anom bruă tơhan rŭi hyu hơdeč Kông an tơring čar Dak Lăk lăi, Dak Lăk lăi hơjăn hăng kual Dap Kơdư lăi hrŏm jing anih yôm kơ rơnuk rơnua, juăt hơmâo ƀing soh sat ĕp jơlan pơblư̆ kơnuk kơna. Rơbêh 30 thun mă bruă amăng khul tơhan rŭi hyu hơdeč, ƀuh lu tơlơi hŭi rơhyưt, tơlơi ngă ơi Vũ Thành hơdor hloh lĕ tal hyu kiăo mă ƀing Fulro thun 1977, hơmâo mă Hoàng Huân, sa čô khua Fulro ƀơi tơring glông Dak Mil:“Hoàng Huân mơ̆ng să Đức Minh, Đức Mạnh hrŏm hăng rơdêh dua pluh čô tơhan Fulro đuăi nao pơ glai ngă gŏp hăng Trung đoàn 64 Fulro mơ̆ng Y K’Lơng. Phun ñu lĕ kiăng ĕp jơlan pơblư̆ gong gai tơring glông Dak Mil. Ƀing gơmơi pơphun ngă 2 tal hyu kiăo mă, 5h mông mơguah lơ 6/4/1977, gơmơi kah jing 2 bơnah hyu ĕp mơ̆ng yang hrơi mơguah truh hrơi drong kah mơ̆ng ƀuh kru. Kâo hmư̆ jua brô̆ yua ƀing gơñu pok, laih anun him lăng ƀing ayăt yơh anun, jing kâo nao giăm, dơmư lăng ƀuh Huân, jing kâo pơnah 3 asar phao, Huân djơ̆ boh phao giong anun rơbuh đih, jing kâo hơmâo mă hlao. Tơña Hoàng Huân jing ñu pơhaih abih, thâo abih grup mă bruă mơ̆ng ƀing gơñu, hơdôm pluh čô tơbiă nao rơkâo tơlơi soh mă ƀing gơñu”.

Thượng tá Cao Tiến Phu - Khua anom bruă tơhan rŭi hyu Kông an tơring čar Dak Lăk brơi thâo, 50 thun rơgao, hrŏm hăng ngă truh kih bruă hơmâo jao pơgang rơnuk rơnua kjăp kơ anom bruă čar, bơwih ƀong, mơnuih mơnam yôm phun mơ̆ng gơnong dlông truh pơ plơi pla, tơhan rŭi hyu hơdeč Dak Lăk pơkơdong glăi tŭ yua djŏp mơnuih ngă soh hŭi rơhyưt kah hăng dŏp kưp, pơdjai mơnuih, ma túy..., ngă hơđong plơi pla. Hơdôm thun tơdơi kơ lŏn ia rơngai, anom bruă hơmâo pơphun hơdôm rơbâo wơ̆t hyu kiăo mă tơhan Fulro, pơdjai hăng mă hơdip hơdôm rơtuh čô mơnuih pơblư̆ kơnuk kơna, mă pơhrui lu phao kơtuang, hră pơ-ar yôm. Kơnong bruă ngă pirăt lơ 11/6/2023 ƀơi Čư̆ Kuin, ƀing tơhan hơmâo kiăo mă 11 čô mơnuih ngă pirăt, pơhrui lu phao kơtuang, gơnam yua mơ̆ng ƀing tơhan pirăt.
Thượng tá Cao Tiến Phu brơi thâo, ling tơhan amăng anom bruă hrăm na nao, ngă kjăp tui pran jua, hrăm bruă kơđi čar kjăp, apăn bruă, kjăp bruă pơkơdong glăi djŏp mơnuih ngă soh.  
“Gơmơi pơtrut tui na nao gru grua tơhan sông kơtang hăng tơlơi djă pioh yôm mơ̆ng djŏp rơnuk khua mua Anom bruă tơhan pơgang hlâo adih, Tơhan rŭi hyu hơdeč rơnuk anai laih anun lêng kơ pơtrut pran jua kơ ƀing khua, ling tơhan amăng anom bruă. Gơmơi pơphun pơtŏp bruă kơ ƀing khua, ƀing tơhan đah mơ̆ng kjăp bruă hloh, pơtô čih pơkra hơdră ngă bruă pơsir hĭ tơlơi truh tơdah hơmâo, pơhlôm rơnuk rơnua hơđong amăng plơi pla”.

Hơdôm thun rơgao, hăng lu bruă hơmâo ngă, Anom bruă tơhan rŭi hyu hơdeč - Kông an tơring čar Dak Lăk pơ-ư pơ-ang hơmâo Ping gah, Kơnuk kơna brơi hră bơni Tơhan sông kơtang blah ngă, Miđai blah ngă mrô Sa, Miđai tơhan ngă bruă truh kih mrô 3 hăng lu gơnam yôm pơkŏn. Ƀing tơhan rŭi hyu hơdeč hmar Kông an tơring čar Dak Lăk hrơi anai glăk tŏ tui gru grua tơhan sông kơtang, djơ̆ hăng anăn “khiơl pơsơi” pơhlôm hơđong rơnuk rơnua amăng plơi plơi djŏp djuai ania ƀơi Dak Lăk.