Anai lĕ anih hlâo kơ thun 2018 dưi lăng jing anih hang amăng tơngia kơ tơlơi soh sat ma túy amăng kual Kơdư yŭ, samơ̆ ră anai jing kual lŏn rơnuk rơnua mơak hlak, tơlơi bơwih ƀong huă-mơnuih mơnam pơđĭ kyar, laih dơ̆ng ană plơi pla trơi pơđao, yâo mơak, pơhưč ƀing tuai rơnguai nao ngui lu amăng dêh čar hăng mơ̆ng tač rơngiao. Pơ ala kơ ping gah, kơnuk kơna, mơ-it hiăp pơtruh brơi ƀing khua mua nao jơnum hăng abih bang ană plơi pla ƀuh ƀô̆ mơta amăng mông jơnum hăng tơlơi tơña bla, mơak hrom hiam klă hloh, khua ping gah, khua mir sir ơi Tô Lâm lăi pơtong, găn rơgao 21 thun Hrơi mơak prong abih bang mơnuih ƀôn sang gum hrŏm pơgang tơlơi rơnuk rơnua dêh čar, jing hĭ bruă ngă pơphun rim thun, yom pơphăn mơak hlak, djru pơtrut tơlơi pơmin pran jua ngă hơkrŭ lŏn ia laih anun thâo khăp kơ dêh čar, tơlơi pơ-ư ang, pran jua kơtang mơ̆ng djuai ania. Ñu lăi lĕ, ngă tui bruă pơgang tơlơi rơnuk rơnua lŏn ia jing dưi ngă tui akŏ pơjing anih anom hiam mơak kơ bruă pơđĭ kyar bơwih ƀong huă-mơnuih mơnam.

Khua ping gah, khua mir sir ơi Tô Lâm, rơkâo plơi Loóng Luông, să Vân Hồ lăi pha, tơring čar Sơn La hnun mơ̆n, kiăng akŏ pơdong, pok pơhư prong lu hơbô̆ bruă hiam klă, djơ̆ lăp pơtrut bơwih ƀong huă mơnuih mơnam amăng rim sang anŏ, rim čô mơnuih ƀôn sang, kiăng hơmâo tơlơi hơdip mơda hiam klă, trơi pơđao hloh, tơhnal pơkă lĕ Mơnuih ƀôn sang dưi rơnuk rơnua hơđong, hơmâo tơlơi hơdip mơda hiam klă hloh. Ƀrô djơ̆ tal anai, Khua ping gah, khua mir sir ơi Tô Lâm hrŏm hăng ƀing khua mua ping gah, kơnuk kơna hơmâo jao lu gơnam brơi kơ anom bruă ping gah, gong gai kơnuk kơna hăng mơnuih ƀôn sang ƀơi Vân Hồ; mơnuih arăng đăo kơnang, tha plơi, khua ƀôn hơmâo bruă ngă hiam klă hur har hloh amăng bruă pơtrut pơgang rơnuk rơnua lŏn ia hrŏm hăng ƀing tơhan pơgang tơlơi rơnuk rơnua amăng plơi pla; hơdôm sang anŏ hơmâo gum kơnuk kơna bruă hơkrŭ, sang anŏ ƀun rin tơnap tap.