Mơng mông iâu telephôn ječ mơng să kual čư̆ siăng hmâo pok pơphun brơi sa bruă mă phara hajăn mơng Grup klơi pơƀut glăi tơlang tơleh tơhan djai pơsăn drơi jăn Grup K51, anom bruă git gai ling tơhan tơring čar Dak Lak. Amăng hrơi blan ngă bruă kơtang tui “Hăng hơdră ngă bruă 500 hrơi mlăm klơi pơƀut glăi tơlang tơleh tơhan djai pơsăn drơi”, rĭm tơlơi lăi pơthâo mơng mơnuih ƀôn sang lĕ sa tơlơi pơtrut pơsur ling tơhan nao ngă bruă. Anih nao tal anai lĕ sa blah đang hmua pơ dơnung rôk jơlan guai lŏn ia kual ngă hơkrŭ đưm Dinh Điền – să Khuê Ngọc Điền hơđăp, ră anai lĕ să Krông Bông – kual blah wang glêh tơnap đưm hlâo adih.

Tơdơi kơ 3 km rôk tui jơlan hmua hăng giăm 1 km rơbat tơkai đĭ kriang čư̆, ƀing ling tơhan hơmâo nao truh đang kơphê ƀơi tơkai Čư Yang Sin. Klơi đĭ lŏn tui tơlơi lăi pơthâo mơng mơnuih ƀôn sang, ƀing gơñu hok mơ-ak lơm ƀuh ia tăng, yu tơhan phŏ laih hơmâo ĕp ƀuh. Đại úy Nguyễn Duy Thuận, ding kơna grup K51 brơi thâo: “Ƀing gơmơi ngă bruă ten biă mă, yua tơngan, yua ƀai kor lŏn brơi ñu pơsăn, đa ƀuh tơgơi, boh tơamleč phŏ laih, lăng ăt pap biă mă mơn. Adơi ayong ĕp ƀuh tui anai ăt ngă mơ-ak hăng ol kơdol amăng pran jua mơn”.

Tơlơi blah wang sui laih, samơ̆ tơlơi ruă hăng bruă gơgrong hăng ƀing mơnuih djai pơsăn drơi jăn ăt tŏ tui na nao. Hăng Đại úy Y Nhai Drao, pô hơmâo giăm 20 thun pơlir hăng bruă klơi pơƀut glăi tơlang tơleh tơhan djai pơsăn drơi jăn, rĭm wŏt tek djơ̆ tơlang tơleh mơng ƀing ling tơhan lĕ sa wŏt ngă amăng pran jua ñu ol kơdol ƀu thâo lăi hiưm pă lơi. “Lơm ĕp ƀuh tơlang tơleh tơhan, ƀing gơmơi hok mơ-ak biă, ăt lăng kar hăng tơlang tơleh mơnuih amăng sang anŏ. Ƀing gơmơi lĕ ană tơčô ngă bruă jao, ha bơnah dong ngă hăng pran khăp pap…Kâo pô lơm tek djơ̆ tơlang tơleh tơhan amăng pran jua ol kơdol ăt ƀu thâo lăi hiưm pă lơi, ngă ƀlĕ ia mơta”.

Bruă klơi pơƀut glăi giong lơm yang hrơi dong amăng kual glai rưng. Boh than ba glăi, ƀing tơhan hơmâo klơi ƀuh 2 per tơlang tơleh tơhan djai pơsăn drơi, hrŏm hăng lu gơnam yua anun lĕ ia tăng, baih, sa, dua gơnam pioh pơhiăp nao rai hrŏm hăng lu gơnam yua pơkŏn yua sui thun phŏ laih.

Adung dưm tơlang tơlang lêng hơmâo ling tơhan klon sir hăng pran jua pơpŭ biă mă. Ơi Nguyễn Hòang Quang, kơ-iăng Khua Jơnum min mơnuih ƀon sang să Krông Bông pơsit tong pran gir run prong hloh: “Anai lĕ hrơi mông ngă tui hơdră bruă 500 hrơi mlăm. Krông Bông lĕ kual blah wang hơđăp, tơlơi blah ngă đưm hlâo adih kơtang biă mă. Hluai tui tơlơi lăi pơthâo mơng mơnuih ƀôn sang hăng tơlơi gum hrŏm mơng grup K51, ƀing gơmơi amra tŏ tui pơtrut kơtang bruă pơtô pơblang, ngă hiưm pă kiăng ba glăi boh tŭ yua hloh, kiăng kơ klơi ba tơhan djai pơsăn drơi glăi pơ plơi pla, glăi pơ ƀing gŏp gơñu”.

Kiăng djru brơi bruă ĕp anăn krăn pô, anom bruă bơdjơ̆ nao hơmâo mă tơgơi, tơlang kiăng kơ pơčrang lăng ADN. Tơdơi kơ pơgiong bruă klơi pơƀut, 2 per tơlang tơleh tơhan hrŏm hăng hơdôm gơnam yua hơmâo ba glăi pơ pơsat dor tơhan djai pơsăn drơi Krông Bông. Bruă klơi ĕp ƀuh 2 per tơlang tơleh tơhan lĕ boh than ba glăi mơng tơlơi gum hrŏm kjăp phik kơplah wah ling tơhan hăng gưl Ping gah, gong gai ƀon lan, sit biă ñu lĕ hơdôm tơlơi črâo brơi yôm phăn mơng mơnuih ƀôn sang. Rĭm tơlơi pơhing, mah aset amra jing atur phun yôm phăn djru brơi bruă hyu ĕp anih dor, pơgôp ba tơhan glăi pơ ƀing gŏp, glăi pơ plơi pla.

Ră anai Grup K51 tŏ tui pok prong bruă hyu ĕp ƀơi kual čư̆ siăng Đá Đen hluai tui hơdôm tơlơi lăi pơthâo mơng mơnuih ƀôn sang, hăng tơlơi gir run hyu ĕp, klơi pơƀut glăi djop per tơlang tơleh tơhan glăk dor glăi ƀơi tơdron blah wang đưm hlâo, pơgôp ngă tui klă hơdră djru tui tlôn mơng ling tơhan hăng pran hơdip “Mơñum ia hơdor kơ pô klơi, ƀong boh hơdor kơ pô pla” mơng djuai ania ta.

Hrơi mông ngă tui hơdră 500 hrơi mlăm hyu ĕp tơlang tơleh tơhan djai pơsăn drơi ăt glăk tŏ tui. Laih dong amra dŏ lu mrô telephô iâu hyu dong ƀơi kual čư̆ siăng. Hăng ƀing pô mă măi lĕ ƀing tơhan Grup k51-tơring čar Dak Lak, amra tŏ tui bak adung, nao ngă bruă. Hăng ƀing gơñu, anai ƀu djơ̆ kơnong lĕ bruă jao đôč ôh mơ̆ ăt mơng tơlơi pơsur amăng hơtai boh dong./.