Tơlơi pơhing kơ bruă man pơkra jơlan rơdêh đuăi hmar mơng Pleiku nao pơ Buôn Ma Thuột găn nao Gia Nghiã, glăk hơmâo lu tơlơi đing nao mơng mơnuih ƀôn sang kual Dap kơdư, anih hơmâo tơlơi dưi prong kơ ngă hmua hăng kiăng pơdŭ pơgiăng hyu lu gơnam. Ayong Nguyễn Phúc Lâm mơnuih mơgăt rơdêh mơng Gia Lai-ƀôn prong Hồ Chí Minh brơi thâo: “Phrâo anai hmư̆ tơlơi pơhing kơ bruă man pơkra jơlan rơdêh đuăi hmar Pleiku-Dak Lak-Gia Nghĩa, tơdah dưi ngă ăt yôm biă mă. Yua gơnam pơgiăng hyu amăng jơlan rơdêh đuăi hmar amra tañ hăng gêh gal ƀiă”

Ơi Vũ Duy Hùng, mơnuih ƀôn sang să Gào, tơring čar Gia Lai hur har pran jua dŏ tơguăn jơlan tañ man pơkra: “Kâo hok mơ-ak biă mă, yua blung hlâo lĕ bruă nao rai gêh gal, hrŏ ƀiă mông, gơnam đang hmua pơgiăng hyu tañ ƀiă. Mơnuih ƀôn sang čang rơmang, lŏn ia ta pơđĭ kyar, tơlơi hơdip mơnuih ƀôn sang đĭ đăi ƀiă mơn”.

Tui bruă kơsem min, jơlan rơdêh đuăi hmar Pleiku-Buôn Ma Thuột-Gia Nghĩa lĕ ha bơnah amăng ară jơlan rơdêh đuăi hmar kơdư-Dơnung gah yŭ. Ară jơlan glông abih tih giăm 258 km, prong 4 boh rơdêh đuăi nao rai, abih tih prăk tuh pơ alin him lăng giăm 77 rơbâo klai prăk. Akŏ jơlan him lăng tơkuh nao jơlan mrô 19 ƀơi kual Bàu Cạn, găn nao tơring čar Gia Lai, Dak Lak hlâo kơ găn nao kual Gia Nghĩa hăng jơlan rơdêh đuăi hmar Gia Nghĩa-Chơn Thành, tơring čar Lâm Đồng.

Ơi Thái Đại Ngọc, Ding kơna Ping gah gơnong glông, Khua git gai Ping gah tơring čar Gia Lai brơi thâo, jơlan rơdêh đuăi hmar ƀu djơ̆ kơnong pơtrut pơđĭ kyar bơwih ƀong huă đôč ôh mơ̆ ăt pơgôp kơtưn pơlir nao rai, pơhlôm rơnuk rơnua-hơđong brơi kual Dap kơdư. “Ƀing ta dưi pơsit ară jơlan rơdêh đuăi hmar amra tơkuh nao rai amăng kual hăng ngă pơtrut pơđĭ kyar tlâo boh tơring čar, tŏ tui hơdôm gơnam đang hmua pla pơjing yua boh thâo phrâo. Amra pơlir kjăp amăng bruă wai pơgang rơnuk rơnua, hơđong hăng hơdôm boh dêh čar ha guai tui jơlan gah pơđĭ kyar yôm phăn sui thun. Hăng Gia Lan, jơlan glông 56,7 km, tơdah pơhlôm pơhrui ngăn drăp rĭm thun, ƀing gơmơi amra dưi ngă”.

Ră anai, ară jơlan rơdêh đuăi hmar Pleiku-Buôn Ma Thuột-Gia Nghĩa glăk kơsem min, rơkâo tuh pơ alin. Mah kiăng dŏ tơguăn hlâo kơ pok pơhai, samơ̆ mơnuih ƀôn sang hăng gong gai ƀon lan ƀơi kual Dap kơdư čang rơmang jơlan anai amra tañ man pơkra, ngă gêh gal brơi bruă nao rai, pơdŭ pơgiăng gơnam hăng pok rai tơlơi dưi pơđĭ kyar bơwih ƀong huă amăng kual./.