Amăng sang măi phrâo pok mơng kông TNHH ƀeñ tia pơsơi Trần Hồng Quân, kual tuh tia pơkra ming Nhân Cơ, tơring čar Lâm Đồng, hơdôm măi mok glăk pok pơhai đuăi laih. Tơdơi kơ tuk brơi lik, añôm lik arăng tuh nao amăng khuông, pioh brơi rơ-ơ̆ hăng ngă tŏ tui glông pơkra jing hơdôm tơlŏ añôm blung a djă ba anăn apăn gơnam mơng Việt Nam.

Ơi Trần Hồng Quân, Khua kông ti TNHH ƀeñ tia pơsơi Trần Hồng Quân brơi thâo, hơnong pơkă blung a mơng sang măi lĕ 450.000 tơ̆n ha thun, dưi pơđuăi hruaih. Pơhrui him lăng đĭ 300.000 tơ̆n ha thun amăng rơwang tal IV thun anai hăng dưi ngă tui abih bang amăng rơwang tal I/2027. Gah tlôn hơdôm tơlŏ ñôm blung a anun lĕ tơlơi găn rơgao rơbêh hơpluh thun tơnap tap kơ prăk tuh pơ alin, gơnam măi mok hăng anih anom. “11 thun dŏ tơguăn, truh ră anai, kông ti ƀeñ tia pơsơi Trần Hồng Quân pơ-ư ang lăi pơthâo hơdôm tơlŏ ñôm blung a mơng Việt Nam. Amăng bruă man pơdong sang măi bưp lu tơnap tap, gun găn. Samơ̆, hăng tơlơi đing nao git gai mơng Ping gah, kơnuk kơna, tơlơi gum hrŏm mơng gong gai ƀon lan, hơdôm khul grup prăk kak, bơnah ngă hrŏm hăng abih bang mơnuih apăn bruă, mơnuih mă bruă, ƀing gơmơi hơmâo ƀơƀrư̆ găn rơgao tơnap tap kiăng pơgiong akŏ bruă anai”.

Tơlŏ ñôm blung a ƀu djơ̆ kơnong tơlơi kơđŏm glăi gơnam phrâo pơkra rai amăng dêh čar. Lơm dưi pơkra rai rĭm thun 450.000 tơ̆n, rơnoh pơkra mơng akŏ bruă anai dưi pơhrui truh 1 klai 400 rơbâo đôlar Mi rĭm thun, dưm dưm 36.000 klai prăk. Hrŏm hăng 1.000 čô mơnuih mă bruă thâo rơgơi, rơguăt bruă hăng thâo wai lăng, akŏ bruă anai dưi ĕp brơi mơng 3.500-4.000 bruă mă amăng ĕp pơƀut gơnam pơkra, apui lơtrik, pơdŭ pơgiăng, logistics, ƀeñ tia pơsơi, bơwih bơwang hăng sĭ mơdrô.

Hăng Nhân Cơ, hơdôm mrô jŭ yap anun glăk pok rai sa anih pơđĭ kyar phrâo. Tơlơi kiăng ră anai lĕ mơnuih mă bruă yua boh thâo măi mok, sang dŏ. pơdŭ pơgiăng, logistics, sĭ mơdrô, bơwih bơwang amra kiăng lu tui lơm sang măi pok prong. Ƀon lan ăt glăk prap lui lŏn mơnai kiăng čơkă mă hơdôm akŏ bruă tuh pơ alin phrâo dong.

Tui ơi Phan Anh Tuấn, Khua git gai Ping gah să Nhân Cơ, ƀing mơnuih mă bruă hlăk ai hơmâo ba nao pơtô hrăm kiăng kơ prap mă bruă ƀơi sang măi. Sui pơ anăp, ƀon lan glăk pơmĭn man pơdong kual tuh tia pơkra ming Nhân Cơ 2 giăm 400 ektar; laih dong prap lui anih dŏ brơi ƀing kông ñơn, ƀing rơgơi bruă, logistics, sĭ mơdrô hăng hơdôm akŏ bruă pơkra gơnam klă hloh tơdơi kơ ñôm. “Sui pơ anăp, hăng Nhân Cơ, ƀing gơmơi ăt hơmâo prap lui djop tơlơi gal kiăng pơhưč tuh pơ alin, pơsur tuh pơ alin, jak iâu hơdôm anom bruă tuh pơ alin rai pơkra klă ƀiă dong ñôm. Ră anai sang măi phrâo pơkra rai ñôm tơlŏ đôč, aka ƀu dưi pơkra gơnam klă ƀiă dong…ƀing gơmơi hơmâo prap lui kual lŏn mơnai, dưm dăp kual tuh tia pơkra ming, logistics, bơwih bơwih sĭ mơdrô kiăng čơkă tuh pơ alin kiăng pơđĭ kyar dong pơ anăp anai”.

Ƀu djơ̆ kơnong pơkra ñôm tơlŏ, sang măi amra pok prong hơdai nao hơmâo dong hơdôm anih pơkra kiăo tui tlôn. Ñôm amra jing gơnam pơkra brơi gơnong bruă ƀeñ tia pơsơi, gơnam pơkra phrâo, gơnam pơkĕ măi mok, pơdŭ pơgiăng hăng apui lơtrik pơkra phrâo. Anai ăt lĕ jơlan gah pơđĭ kyar Lâm Đồng ba tơbiă tơdơi kơ tơlơi kơđŏm glăi mơng bruă pơkra ñôm tơlŏ blung a. Ơi Y Thanh Hà Niê Kdăm, Ding kơna Ping gah dêh čar, Khua git gai Ping gah tơring čar Lâm Đồng pơsit tong: “Mơng hơdôm tơlŏ ñôm blung a, ƀu djơ̆ kơnong jing tơlơi yôm kơ bruă pơkra gơnam đôč ôh mơ̆ ăt pok rai tơlơi dưi pơjing glông rơnoh yôm amăng bruă tuh tia pơkra ming, pơhưč amăng gơnong bruă ƀeñ tia ñôm pơsơi, gơnam pơkra phrâo, tuh tia pơkra gơnam dưm truă, gơnam pơkĕ măi mok, pơdŭ pơgiăng, apui lơtrik phrâo hăng lu bruă tui boh thâo phrâo hơmâo pơđĭ kyar ƀơi tơring čar Lâm Đồng kah hăng kual Dap kơdư”.

Mơng kual lŏn drơ̆t baza truh pơ hơdôm tơlŏ ñôm jing bruă ba hơdôm eh pơsơi jing gơnam hơmâo nua. Lơm bruă tuk pơkra ñôm ƀơi Nhân Cơ, Lâm Đồng tŏ tui na nao ƀơi hơdôm boh sang măi pơkra, rơnoh mơng bauxite kual Dap kơdư ƀu djơ̆ kơnong jŭ yap hăng hơdôm gơnam mă đĭ mơng atur lŏn đôč ôh mơ̆ ăt hăng bruă tuh tia pơkra ming, mă bruă hăng rơnoh pơhrui glăi hơmâo pơjing rai mơng kual lŏn anai mơtăm./.