Jing tơlơi juăt laih, rĭm mơguah, ơi Pang Tin Sin (djuai ania K’ho) dŏ amăng phương Lang Biang-Đà Lạt, tơring čar Lâm Đồng lêng kơ hmư̆, pơđok tơlơi pơhing amăng măi telephôn. Ñu pok măi, mut amăng plang mơnuih mơnam mơng Gong phun jua pơhiăp dêh čar Việt Nam laih anun mut nao ĕp amăng jơlan hơdră pơtui hăng tơlơi K’ho. Hơdôm tơlơi pơhing pơƀuh amăng măi telephôn hăng tơlơi djuai ania pô. Ñu ruah sa tơlơi pơhing mut pơđok: “VOV.K’ho: Grup khua mua Ping gah Cộng sản Việt Nam yua ơi Lê Hồng Quang, kơ-iăng Khua anom djru bruă gơnong glông ba jơlan hlâo nao čuă hăng mă bruă ƀơi Brazil”.

Sui mơng anai 25 thun, jơlan hơdră pơtui jua pơhiăp hăng tơlơi K’ho mơng Gong phun jua pơhiăp dêh čar Việt Nam pôr pơhing. Hrŏm hăng pôr pơhing tui hơđăp, hơdôm jơlan hơdră hơmâo ba pơmut amăng website hăng hơdôm plang mơnuih mơnam. Anih pơdah amăng Facebook hăng anăn “Tiếng K’ho VOV Tây Nguyên” ră anai hơmâo rơbêh 9.300 čô mơnuih kiăo tui lăng. Ơi K’Si Môn-Khua anom bruă djop djuai ania mơnuih mơnam plơi Lộc Bảo, să Bảo Lâm 5, tơring čar Lâm Đồng brơi thâo: hơdôm tơlơi pơhing lăi nao tơlơi hơdip, hơdră bruă mơng Ping gah, Kơnuk kơna hăng hơdôm tơlơi bơră ruai lăi nao gru grua pôr pơhing hăng tơlơi djuai ania pô amăng plang mơnuih monam mơng Gong phun jua pơhiăp dêh čar Việt Nam, djru brơi neh met wa tañ hluh hăng amuñ tŭ mă djop tơlơi pơhing. “Kâo hmư̆ jơlan hơdră pơtui jua pơhiăp hăng tơlơi K’ho blung a mơng facebook. Mơng anun kâo thâo lu dong tơlơi pơhing hăng tơlơi K’ho gơmơi. Kâo pô ăt juăt mut pơđok hăng hmư̆ hơdôm tơlơi pơhing hăng tơlơi K’ho, Mạ, yua anun kâo kah mơng thâo lu ƀiă dong lu tơlơi pơhing. Čang rơmang neh met wa djuai ania K’ho, Mạ dưi mut hmư̆ kiăng thâo lu tơlơi pơhing hăng tơlơi djuai ania pô, mơng anun pơgôp djă pioh, tŏ tui hăng ngă hiam tui tơlơi djuai ania K’ho, Mạ”.

Ƀu djơ̆ kơnong ba tơlơi pơhing tơl neh met wa, jơlan hơdră hăng tơlơi K’ho mơng Gong phun jua pơhiăp dêh čar Việt Nam ăt pơgôp djă pioh boh pơhiăp mơng djuai ania pô. Ơi Cil Poh, kơ-iăng Khua jơnum min mơnuih ƀôn sang phường Lang Biang-Đà Lạt, tơring čar Lâm Đồng brơi thâo, tơlơi anai jai yôm phăn amăng tơlơi hơdip ră anai, lơm lu mơnuih djuai ania K’ho glăk ƀơƀrư̆ wơr hĭ boh pơhiăp ƀudah ƀu thâo čih tơlơi djuai ania pô. “Ră anai lu mơnuih djuai ania K’ho ƀu thâo pơhiăp, ƀu thâo čih tơlơi djuai ania pô. Gong phun jua pơhiăp dêh čar Việt Nam pôr pơhing hăng tơlơi djuai ania K’ho lĕ bruă ngă yôm phăn biă. Pơtô pơblang hăng tơlơi K’ho djru neh met wa tañ hluh. Kâo čang rơmang Ping gah, Kơnuk kơna tŏ tui đing nao, kơtưn pôr pơhing hăng tơlơi K’ho kiăng pơgôp djă pioh tơlơi K’ho”.

Ƀơi hơdôm boh plơi pla dŏ lu tơnap tap, bruă ba tơlơi pơhing tơpă sit tơl neh met wa hăng tơlơi djuai ania ƀiă yôm phăn biă. Ƀơi să Đam Rông 4, tơring čar Lâm Đồng, rơbêh 90% mrô mơnuih lĕ djuai ania ƀiă, lu hloh lĕ djuai ania K’ho Cil hăng M’nông. Ơi Lơ Mu Ha Poh, kơ-iăng Khua git gai Ping gah să Đam Rông 4 brơi thâo: hăng neh met wa ƀơi anai, bhơdôm tơlơi pôr pơhing kơ tơlơi črâo trun, hơdră bruă mơng Ping gah, Kơnuk kơna, kơ tơlơi hơdip, tơlơi bơwih ƀong huă hăng gru grua hơmâo pôr pơhing hăng tơlơi djuai ania K’ho, M’nông djru brơi mơnuih ƀôn sang tañ hluh ƀiă dong. “Gong phun jua pơhiăp dêh čar Việt Nam lêng kơ đing nao, gum hrŏm djop gưl, gong gai ƀon lan. Sit biă ñu, să Đam Rông 4 hơmâo lu mơnuih djuai ania K’ho Cil hăng M’nông. Gong phun jua pơhiăp juăt pôr pơhing kơ bruă amăng ƀon lan tơl neh met wa, laih dong lăi pơthâo hơdôm anŏ yôm gru grua mơng mơnuih djuai ania ƀiă tơl mơnuih ƀôn sang đơ đam dêh čar”.

Rơbêh 80 thun rơgao, mơng hrơi Gong phun jua pơhiăp dêh čar Việt Nam pôr pơhing tal blung a, tơlơi pôr pơhing mơng Gong phun jua pơhiăp dêh čar hơmâo ba hyu djop plơi pla. Hăng jơlan hơdră pơtui jua pơhiăp hăng tơlơi K’ho yua anom bruă pơdong ƀơi kual Dap kơdư pơtui găn rơgao 25 thun pôr pơhing brơi ană plơi pla. Hăng lơm tơlơi djuai ania K’ho hơmâo pôr pơhing amăng glông pôr pơhing dêh čar, ba đĭ amăng plang mơnuih mơnam, hơmâo pơgôp ngă lar hyu boh pơhiăp, gru grua mơng djuai ania pô amăng tar ƀar rŏng lŏn tơnah./.