Hơdor glăi hơdôm hrơi blan 3 hing ang, ơi Tô Tấn Tài (arăng juăt iâu lĕ ama H’Oanh) khua git gai Ping gah plơi prong Buôn Ma Thuột hơđăp, bơră ruai glăi: ñu hơmâo Ping gah tơring čar Dak Lak jao bruă pơtrut pơsur mơnuih ƀôn sang, sit biă ñu amăng lăm plơi prong, tơgŭ hơkrŭ. Ama H’Oanh brơi thâo, lơm kơsung blah mut nao Buôn Ma Thuột, ling tơhan mơng tơring čar hur har pran jua biă mă, bơ mơnuih ƀôn sang ăt kiăng pơklaih rơngai mơn:

“Ƀing gơmơi hơmâo tơlơi gal lĕ ƀơi Buôn Ma Thuột amăng rơnuk blah ayăt Mi lĕ pơjing anih dŏ hơdip djơ̆ tơlơi phiăn amăng lăm plơi prong ăt hơmâo lu mơnuih, ling tơhan mơnuih ƀon sang mut hrŏm, yua Buôn Ma Thuột sit ñu lĕ tum pơƀut mơnuih mơng hơdôm boh tơring čar gah dơnung kual V hơđăp yua ƀing gơñu juăt ngă hơkrŭ laih. Ƀing gơmơi lăi pơthâo brơi mơnuih ƀôn sang rơđah lĕ tal anai gir pơklaih rơngai, bơ sa čô mơnuih amăng plơi prong jing grup kơđi čar ngă bruă ƀơi anai”.

Anai lĕ mơnuih pơphun hơdôm bruă mă amăng lăm plơi prong Buôn Ma Thuột lơm anun, yă Nguyễn Thị Minh Trinh, Kơ-iăng khua grup ngă bruă kơđi čar hơđăp brơi thâo, grup hơmâo mơnuih amăng hơdôm khul ling tơhan-mơnuih ƀôn sang-kơđi čar, hăng rĭm grup mơnuih ƀôn sang amra hơmâo hơdôm bruă pơtrut pơsur lăp djơ̆. Ol kơdol mơ-it ană anet phrâo 2 thun ƀơi kual wai pơgang, ñu mut nao amăng lăm plơi prong, mut hrŏm pơjing hơdôm anih djru ngă hơkrŭ, amra pơdjai ƀing mơnuih ngă soh săt.

“Hơdôm grup amăng lăm gơmơi gir run biă mă, hăng ling tơhan tơdah gêh gal amra mut hrŏm hăng ƀing gơmơi. Yua anun kâo thâo bruă mă mơng ayăt, hăng pơpha rĭm grup amăng lăm pơlir hăng grup: sa lĕ pơtrut pơsur ling tơhan tơbiă ngă tơhan ayăt, dua lĕ pơdjai ƀing soh sat, tlâo lĕ ba mơnuih ƀôn sang tơgŭ hơkrŭ. Amăng hrơi mông anun, ƀing gơmơi ruah sa, dua mơnuih ngă ang hloh mơ̆ kiăng pơdjai, mơng ngă pơrai tơhan ayăt, hăng ngă gêh gal brơi mơnuih ƀôn sang tơgŭ hơkrŭ”.

Ol kơdol pran jua hơdor glăi hrơi blan dŏ krong kiăng gak blah ƀing ayăt, yă Nguyễn Thị Ngọc Lan ƀlĕ ia mơta: Lu mơnuih djai pơsăn drơi, rơka rơkač kiăng kơ wai pơgang plơi pla lŏn ia ta. Truh hrơi hla kơ por amăng hrơi Buôn Ma Thuột pơklaih rơngai, amăng pran jua hok mơ-ak biă mă:

“Lơ 10/3, kâo hơdor ƀing adơi ayong dŏ krong hơdôm mlăm mơtăm, dŏ gak tơhrơi kah hăng mơmŏt mlăm, tŭi apui kơđen dŏ gak ha mlăm. Ăt ƀu hơmâo hlơi pơmĭn amra pơklaih rơngai amăng bơyan bơnga tui anun. Truh ră anai pơmĭn glăi ăt hŭi ƀu thâo wơr ôh, yua anai lĕ hla kơ kâo čoh hơmâo hla por hăng glông lơm pơklaih rơngai Buôn Ma Thuột”.

Lăi nao tơlơi blah dưi đưm hlâo adih, ơi Lê Chí Quyết, kơ-iăng khua git gai Ping gah ngă rah Kơ-iăng Khua Jơnum min tơhan wai lăng plơi prong Buôn Ma Thuột hơđăp, bơră ruai glăi, 2 tơlơi phun ngă gêh gal brơi hrơi blah dưi, tal sa lĕ ling tơhan hăng mơnuih ƀôn sang ngă tui klă, dua dong lĕ mơnuih djuai ania Yuăn hăng djop djuai ania gum pơgôp. Tơlơi anai ngă pơtrut pran kơtang djop mơta brơi 3 blah ngă phun anun lĕ ling tơhan, bruă kơđi čar, pơtrut mơnuih ƀôn sang. Blah dưi Buôn Ma Thuột yôm phăn biă mă, ngă ayăt tơdu pran, ƀing gơñu ruk đuăi mơng Gia Lai, Kon Tum. Dua dong lĕ pơtrut mơnuih ƀôn sang Dak Lak tơgŭ hơkrŭ. Ơi Lê Chí Quyết brơi thâo, truh lơ 24/3/1975, tơring čar Dak Lak hơmâo pơgiong bruă pơklaih rơngai.

“Tal blah dưi plơi prong Buôn Ma Thuột laih anun djop plơi pla ala ƀôn tơgŭ hơkrŭ. Tơlơi hok mơ-ak lĕ abih bang mơnuih tơgŭ hơkrŭ hăng 3 glông blah wang phun: ling tơhan, kơđi čar, pơtrut mơnuih ƀôn sang. Anai lĕ iâu pơthưr tơhan ayăt tơbiă rai, jao glăi phao kơtuang, hrŏm hăng mơnuih ƀôn sang phă pơrai puih kơđông, hơdôm anih ayăt wai lăng phun, kiăng pơklaih rơngai brơi kơ ta pô”.

50 thun rơgao, tal blah dưi Buôn Ma Thuột ăt dŏ hơdor na nao hăng ƀing mơnuih djru blah wang hrŏm hăng tơlơi pơhrăm glăi mơng pran gum pơgôp. Pran gum pơgôp pơjing rai pran kơtang abih bang mơng ling tơhan, pok rai tal blah dưi kual Dap kơdư, ba glăi tơlơi kơđŏm glăi gru grua yôm phăn, pơtrut tañ bruă anăp nao kơsung blah hăng tơgŭ hơkrŭ bơyan bơnga thun 1975, pơklaih rơngai kual Dơnung, pơlir hơbit lŏn ia./.