Ayong Y Sim Kƀuôr dŏ ƀơi să Hòa Xuân, plơi prong Ƀuôn Ma Thuôt, mơnuih mă bruă amăng sang bruă kông ty pơčruh ngăn pơkea pơsơi ASEAN amăng anom tuh tia pơkra ming sa ƀut Hòa Phú mơ̆ng thun 2020. Ƀơi anih mă bruă anai hơmâo khul ping gah, ñu gir run ƀu pơdơi ôh pioh kơtưn kiăng dưi mut ping gah truh blan 9/2024. Y Sim Kƀuôr hơ̆k mơak biă mă ƀu kơnong kơ drơi jăn ñu pô ôh, wơ̆t kơ sang anŏ ñu hai.

“Ta mă bruă amăng kông ty pơčruh ngăn mơ̆ dưi mut ping gah lĕ sang anŏ dŏ kơtuă soh, hok mơak hăng pơ-ư ang biă mă. Jing sa čô mơnuih ping gah laih khom gir run ngă giong bruă jao, ba gru hlâo amăng bruă mă”.

Mă bruă hrŏm amăng kông ty pơčruh ngăn Pơsơi ASEAN mơ̆n, mơnuih ping gah Y Hoan Ktŭl arăng ruah ñu ngă ding kơna apăn bruă amăng ping gah kông ty rơwang bruă thun 2020-2025. Ba gru hlâo amăng bruă mă, Y Hoan ping gah anom bruă ñu jao djru ba kơ sa čô mơnuih ping gah pơkŏn, hlơi pô ñu tơpă, mă bruă hur har kiăng pơmut ping gah pơ anăp anai.

“Kâo pơtô lăi, pơtă pơtăn na nao ƀing adơi ayong mă bruă amăng grup, biă mă ñu djuai ania Êđê, khom gir run hloh pơhrăm ta pô, kiăng ngă hrŏm lu bruă mă mơnuih tơpuôl amăng kông ty, ngă klă hơdôm bruă jao, mă bruă pơkra ming bơwih brơi gơnam sĭ mơdrô dưi djơ̆ hrơi blan jao. Tơdah hơmâo tơlơi gir run klă, laih anun hơmâo tơlơi kiăng mut ping gah, ƀing adơi ayong nao hlâo djru pơmut mơtam”.

Khul ping gah amăng kông ty pơčruh ngăn Pơsơi ASEAN dưi akŏ pơjing thun 2017, blung a hơmâo 5 čô mơnuih ping gah đôč, truh  ră anai hơmâo 25 čô mơnuih ping gah. Ơi Trần Trung Tiến, Khua git gai ping gah brơi thâo, dưi hơmâo khua mua amăng kông ty, bruă mă pơmut ping gah gêh găl mơ̆n. Hơdôm thun giăm anai, rim thun hơmâo pơmut mơnuih mut ping gah soh, sa thun 3-4 čô mơnuih ping gah phrâo, lu hloh rơnoh jao. Ơi Trần Trung Tiến lăi, khul ping gah gơñu gir run kiăng pơmut ping gah, djop laih anun akŏ pơjing anom bruă ping gah amăng thun 2026:

“Amăng thun 2025, khul ping gah amra pơmut mơ̆ng 3-5 čô mơnuih ping gah phrâo, tui hăng tơhnal pơkă mơ̆ng Anom bruă wai lăng khul ping gah sang bruă mơdrô hăng anom bruă kơnuk kơna tơring čar Dak Lak jao. Ƀing gơmơi hơmâo pơtô hrăm kơ ƀing hơmâo pran jua tơpă, mă bruă thâo laih anun hur har hloh, brơi čih hră ră ruai glăi sang anŏ drơi jăn pô, pơsit hră pơar ñu hăng tơguan truh hrơi jơnum pơmut đôč yơh amăng klâo blan tal I thun 2025 kơ dua čô mơnuih”.

Ơi Trần Quang Tân, Kơ-iăng Khua ping gah Khul djop sang bruă mơdrô hăng anom bruă kơna amăng tơring čar Dak Lak brơi thâo, đơ đam tơring čar ră anai hơmâo 11 khul grup ping gah amăng anom bruă mơdrô gah rơngiao kơnuk kơna, hơmâo 537 čô mơnuih ping gah. Thun blan rơgao, bruă mă pơđĭ kyar ping gah ƀơi djop sang bruă mơdrô gah rơngiao kơnuk kơna wai lăng hơmâo boh tơhnal klă tŭ yua mơ̆n, djru hrŏm ngă hơđong bruă mă amăng sang bruă sĭ mơdrô, djru ping gah nao jĕ giăm hloh mơnuih mă bruă, ding kơna bơwih ƀong huă. Ơi Trần Quang Tân kah pơpha:

“Rim thun, ƀing gơmơi gir run pơmut mơ̆ng 16 čô mơnuih ping gah pơngŏ amăng anom bruă wai lăng sĭ mơdrô gah rơngiao kơnuk kơna, amăng anun mơ̆ng 1-2 čô mơnuih ping gah  wai lăng anom bruă sĭ mơdrô. Truh thun 2030, ƀing gơmơi amra akŏ pơdong mơ̆ng 2-3 khul, ƀudah anom bruă ping gah pơ kual yŭ hăng 1-2 grup mơnuih tơpuôl kah hăng khul tơdăm dra mut phung, khul tơhan hơđăp. Boh ƀiă ñu 8% mrô anom bruă gah mơnuih ƀôn sang ngă pô amăng tơring čar amra hơmâo anom bruă ping gah, hơmâo mơnuih ping gah git gai sang bruă mơdrô ngă hrŏm”.

Bruă mă pơđĭ kyar ping gah amăng khul anom bruă sĭ mơdrô gah rơngiao kơnuk kơna, yua mơnuih ƀôn sang ngă pô ƀơi Dak Lak hơmâo lu boh tơhnal hiam klă, djru hrŏm ngă gêh găl amăng anih mă bruă dưi hơđong, tŭ yua, djru pơđĭ kyar bruă mă kơđi čar, bơwih ƀong huă mơnuih mơnam ƀơi tơring čar Dak Lak jai hrơi pơđĭ kyar tui.