Ƀơi plơi Mê Ka, să Đam Rông 4, sang anŏ ayong Liêng Hot Ha Ngát hơmâo prăp lui djop hơdrôm hră pơar, sum ao, gai čih kơdung hră kơ dua čô ană ñu, sa čô hrăm anih 11, sa čô hrăm anih 4. Dŏ ƀơi plơi pla kual tơnap tap, tơlơi hơdip dŏ kơƀah lu mơta gơnam tam samơ̆ hăng ayong Ngát, tuh pơ alin kơ ană bă hrăm hră pơar lĕ ƀu thâo djop ôh. Ñu lăi lĕ, amăng mơnuih tơpuôl rơnuk anai, phrâo lu mơta tơlơi či kiăng, tơlơi thâo ia rơgơi yơh anŏ ngă atur dăp brơi kơ čơđai rơnuk anai kiăng kiăo tui tŭ mă anŏ gêh găl hăng huăi arăng lui hĭ gah klôn. “Tơlơi hrăm hră yom biă mă  pioh tơdơi anai kiăng hơmâo anŏ gêh găl kơ ană tơčô pơđĭ kyar. Ƀu dưi lui kơ ană tơčô arăng lui raih hĭ gah klôn ôh. Yua kơ tơdơi anai, boh thâo ia rơgơi mrô dêh čar ta ba yua kiăng thâo lu kah dưi hmao arăng, yua anun kiăng hơmâo lu tơlơi thâo phara soh. Mah tơnap tap hai, samơ̆ ăt khom gir run mơ̆n kiăng ană bă nao hrăm hră truh kih”.

Tơlơi mơ̆ lăp mơak biă mă, pơmin klă anun lĕ jai hrơi, kiăng djop plơi pla ala ƀôn djuai ƀiă ƀơi Lâm Đồng, lu mơnuih thâo hluh pơmin hrup anun. Sit truh bơyan mut thun hrăm phrâo, lu sang anŏ prăp lui prăk kăk blơi hơdrôm hră, sum ao, gơnam yua hrăm hră kơ ană bă; hơdôm sang anŏ tơnap tap lĕ ăt gir run čan ling mơ̆n kiăng hơmâo prăk blơi gơnam yua kơ ană bă hrăm hră. Ƀu kơnong djru ba anŏ kiăng ƀơi anăp đôč ôh, lu sang anŏ dŏ anăp brơi jơlan nao, bruă ngă kơ ană tơčô kơñ pơgi dơ̆ng, hrăm bruă hăng djă pioh gru grua đưm djuai ania. Gơñu thâo hluh laih, hrăm hră yơh mơ̆ng dưi tơbiă đuăi mơ̆ng plơi pla ƀun rin, tơnap tap pơlŭk mơgu đưm đă adih. Ayong Liêng Hot The, djuai ania K’Ho, dŏ ƀơi grup Bắc Tà Nung, phường Cam Ly-Đà Lạt brơi thâo: “Kơnong amăng sang anŏ hă ăt anăp brơi kơ ană bă rơđah rơđong laih, gru grua hiam anun yơh phun. Mơ̆ng anun sit ană bă prô̆ tơdăm prăm dra thâo nao hrăm hră, thâo ngă hrŏm, jĕ giăm gơyut gơyâo amăng sang hră pioh pôr pơthâo, lăi brơi djop pô thâo gru grua hiam.  Tơdơi anai, ƀing ană bă mă bruă pơ anom bruă hơgĕt thâo ăt amra pơ-ư ang mơ̆n kơ gru grua djuai ania ta pô”.

Tơdah prăp lui hlâo mơ̆ng ƀing amĭ ama ngă atur mơ̆ng sang anŏ lĕ, ƀơi sang hră, anih hrăm, bruă prăp lui kơ thun hrăm phrâo ăt hlăk pok pơhai kơdor kơdor mơ̆n, tañ hloh. Ƀơi hơdôm să tơnap tal hloh kah hăng Dam Rông 4, thun hrăm anai hơmâo 4.300 čô čơđai sang hră mơ̆ng gưl muai truh pơ gưl dua, lêng kơ čơđai sang hră mơnuih djuai ƀiă soh. Hơdôm boh sang hră hơmâo tuh pơ alin man pơdong phrâo hiam, rơgoh; anih hrăm hăng lan sang hră laih anun djop mơta gơnam yua bơwih brơi kơ tơlơi pơtô hăng hrăm prăp lui tong ten biă mă. Nai neh Phạm Thị Ngọc Bích, Khua sang hră gưl muai Dă Tông, să Dam Rông 4 brơi thâo: “Ƀơi sang hrăm ƀing nai pơtô ăt gir run pơjing anih hrăm brơi hiam klă hloh. Lơm nao hrăm hră ƀing čơđai dưi mut hrŏm hơdôm bruă lăp djơ̆ anun ngă ƀing gơñu hor biă. Sang hră čơđai muai Dă Tông ăt juăt pơphun hơdôm tơlơi ngui hơmâo tơlơi mut hrŏm mơng ƀing amĭ ama, nai pơtô hăng čơđai sang hră, mơng anun ƀing amĭ ama jai hơđong pran jua brơi ană bă nao hrăm hră”.

Lâm Đồng ră anai hơmâo 100 boh să dong amăng kual mơnuih djuai ania ƀiă hăng čư̆ siăng; amăng anun hơmâo 27 boh să tơnap tap hloh, 5 boh sang giăm guai hăng kual bul pơtâo Phú Quý. Đơ đam tơring čar hơmâo rơbêh 182.000 čô čơđai djuai ania ƀiă. Ƀơi hơdôm kual tơnap tap, jơlan nao sang hră hơmâo pok phư jing tơlơi gal kiăng čơđai tŭ mă tơlơi thâo thăi, anai lĕ sa amăng hơdôm tơlơi atur phun djru brơi mơnuih ƀôn sang pơplih tơlơi hơdip.

Ơi Ntơr Ha Krong, dŏ amăng plơi Dă Nhinh, să Đam Rông 4, hơmâo 3 čô ană hrăm abih gưl prong. Mơng tơlơi bơră ruai mơng sang anŏ gơñu, ñu jai đăo gơnang, tơdah hơmâo tơlơi thâo thăi ană plơi pla amra dưi pơplih tơlơi hơdip, mơng bruă bơwih ƀong truh pơ tŭ mă hơdôm tơlơi pơplih phrâo. “Đưm hlâo tơlơi hơdip tơnap tap anun hrăm ƀiă đôč, bơ ră anai tơdah ƀu thâo hrăm amra ƀu dưi ngă hơget ôh. Mah ƀing ta ƀu kiăng ngă hơget prong ôh, anai ăt lĕ bruă bơwih brơi phun pla ƀudah thâo mă yua kmơk hơget, ia jrao hơget ăt kiăng thâo hrăm mơn. Ră anai tơdah dưi kiăng ană tơčô hrăm đĭ gưl prong soh. Tơdah thâo hră kah mơng dưi ngă djop mơta bruă amăng tơlơi hơdip anai”.

Jua hơgor teng mơñi pok brơi thun hrăm phrâo tơ-ua đĭ laih djop djang anih, plơi pla ala ƀôn amăng tơring čar Lâm Đồng, djă ba tơlơi hơ̆k mơak ƀơi anăp thun hrăm phrâo truh laih dik dăk. Tơlơi mơak anun, pơƀuh đĭ yua mơ̆ng bruă tuh pơ alin gong gai kơnuk kơna djru, pioh brơi kơ bruă pơtô hrăm, tơlơi djru abih pran jua mơ̆ng ƀing nai neh pơtô hrăm hră, laih anun tơlơi gir run khut khăt mơ̆ng abih bang mơnuih ƀôn sang djuai ƀiă kual ataih. Anai lĕ atur tơlơi kiăng klă hloh, pioh kơ čơđai sang hră mơnuih djuai ƀiă ƀơi tơring čar Lâm Đồng h’ĭn ah pran jua yak nao thun hrăm phrâo, mut amăng anih hrăm kơjăp tơlơi pơmin pran jua čih tŏ tui gru grua nao pơ anăp adih bơngač rơđah hloh ƀơi kual plơi pla pô mơtam./.