Ƀơi plơi Kép, hơdôm tơlơi pioh glăi mơng rơnuk blah wang ăt hơmâo ơi Rčom Kóp bơră ruai glăi hăng pran pơ-ư ang. Thun 1965, ñu mut hrŏm tơhan blah hơdeč; dua thun tơdơi ñu hơmâo pơmut amăng Ping gah hăng arăng jao ngă khua plơi Kép. Lơm anun, bruă jao mơng ñu pô lĕ pơtrut pơsur ƀing hlăk ai mut hrŏm ling tơhan, pơtrut pơsur mơnuih ƀôn sang pơgôp mơnong ƀong huă kiăng djru brơi ling tơhan, rông ba kăn ƀô̆ ngă bruă amăng rưng kưng: “Lơm mut Ping gah thun 1967, laih anun jao ngă khua plơi, wai lăng plơi Kép. Lơm anun, arăng jao kơ kâo lĕ pơtrut pơsur hlăk ai mut hrŏm ling tơhan amăng plơi pla, ƀing tơhan ngă bruă phun; laih dong pơsur neh met wa pơgôp braih, pơdai, laih dong pơphun hyu pơƀut glăi braih pơdai kiăng rông tơhan, rông kăn ƀô̆ ngă bruă amăng glai rưng, pơjing ling tơhan wai pơgang amăng plơi pla tui ră anai”.

Blah wang găn rơgao sui laih, ƀing mơnuih juăt djru wai pơgang amăng plơi pla đưm hlâo adih ăt ƀuh plơi pla glăk pơplih phrâo. Hăng mơnuih ƀôn sang Ia Ly, pran jua anun hơmâo tŏ tui hăng tơlơi gơgrong amăng bơwih ƀong, ngă hmua, khin hơtai pơplih tơlơi pơmĭn, bruă mă kiăng đĭ tui prăk pơhrui.

Ƀơi plơi Ia Ping, tơhan hơđăp Bùi Quang Trung ruah hơbô̆ bruă pla lu phun pla, pla pơplah mơng sầu riêng, kơphê truh pơ hơdôm phun boh troh pơkŏn. Bruă ngă anai kiăng yua klă sa blah lŏn hăng pơhlôm ngă hiam phun pla rah, djru brơi sang anŏ hơmâo dong gơnam pơhrui rĭm thun, pla ƀiă huač lơm gơnam đang hmua đĭ trun. Ơi Trung brơi thâo, hơbô̆ bruă pla pơplah ră anai ba glăi prăk pơhrui giăm 500 klăk prăk rĭm thun. Ƀu djơ̆ kơnong hrưn đĭ tŭ yua amăng mă yua lŏn mơnai, bruă ngă anai djru brơi sang anŏ pơhlôm pơgang hlâo lơm nua gơnam tam đĭ trun: “Kâo pla pơplah kiăng pơhlôm lu gơnam pơhrui, truh bơyan anai pơhrui gơnam anai, bơyan pơkŏn ăt hơmâo mơn gơnam pĕ pơhrui anun ngă tơlơi bơwih ƀong huă amăng sang anŏ jai hơđong”.

Tơdơi kơ pơmut hrŏm anih anom, să Ia Ly hơmâo tơlơi dưi kiăng tŭ mă djop tơlơi gal kơ kual lŏn mơnai hăng gru grua. Bruă tuai čuă ngui amăng plơi pla hơmâo pơsit lĕ jơlan gah kiăng pơhlôm brơi tơlơi bơwih ƀong. Gru grua djuai ania Jarai, kual lŏn mơnai glai čư̆ hrŏm hăng anih čuă ngui hơmâo drai ia Công Chúa, drai ia Đá Cổ hăng ring bruă drai ia apui lơtrik Ia Ly glăk ngă tơkuh nao rai kiăng pơjing rai hơdôm gơnam tuai čuă ngui. Sang rông plơi Kép pơgiong amăng rơwang tal I thun anai ăt pok rai anih čuă ngui amăng plơi pla, laih dong jing anih phun kiăng tuai rơnguai nao ĕp lăng gru grua plơi pla. Ơi Nguyễn Văn Ánh, Khua git gai Ping gah să Ia Ly brơi thâo, ƀon lan pơsit tong pơđĭ kyar bơwih ƀong huă kiăng pơlir hăng djă pioh hăng tŏ tui gru grua djuai ania: “Tŏ tui gru grua să sông kơtang, să đing nao nao bruă djă pioh gru grua djuai ania Jarai, ƀơi anai ƀing gơmơi hơmâo bruă bơwih brơi tuai amăng plơi pla kiăng tŏ tui gru grua djuai ania Jarai. Ră anai tơring čar djru hơdôm jơlan hơdră hơnong pơkă dêh čar yua anun ƀơi plơi Kép hơmâo man pơdong sang rung, tơkuh nao rai anih čuă ngui ƀơi drai ia Công Chúa, drai ia Đá Cổ, drai ia apui lơtrik Ia Ly, hơdôm anih čuă ngui ƀơi drai ia apui lơtrik pơprong amăng dêh čar”.

Mơng thun blan blah wang wai pơgang plơi pla truh pơ bruă pơjing tơlơi hơdip phrâo ră anai, pran jua ngă hơkrŭ ƀơi Ia Ly glăk tŏ tui hăng hơdôm bruă mă tong ten. Anai lĕ bruă djă pioh gru grua, pơplih bơwih ƀong ngă hmua, pơkrem prăk kak, wai pơgang jum dar hăng tŭ mă klă hơdôm gal amăng ƀon lan. Hơdôm bruă mă anai pơgôp pơjing gru grua jing tơlơi pơtrut, ngă atur kiăng Ia Ly pơđĭ kyar hơđong kjăp, kjăp yak nao jơlan pơplih phrâo./.