Mơ̆ng akŏ thun truh kơ ră anai, hơdôm anih anom mă bruă amăng Anom pơphun bruă Ping gah tơring čar Dak Lăk lêng kơ ngă bruă hơdeč hmar. Mơ̆ng bruă pơkra hră pơ-ar, pơphun jơnum truh kơ pơsir bruă lêng kơ ngă hmar, huăi soh glăi. Tui hăng amai Kim Thị Hoài Thương, mơnuih apăn bruă ngă hră pơ-ar, tơlơi hơdeč hmar anai ƀrô ngă djơ̆ hăng tơlơi kiăng pơmut hrŏm, dăp glăi anom bruă, ƀrô jing hơnong pơkă pơtŏng glăi anŏ klă bruă mă rim blan:“Lơ̆m ta pơtŏng glăi rim blan lĕ hrơi blan ñu aset ƀiă, jing ta dưi ƀuh rơđah rơđông rim bruă mă, biă ñu tơdah ngă bruă soh djơ̆ glăi lĕ ta ƀuh hlao mơtăm, pơkra glăi hlao, ƀu kiăng tơguan truh rơnuč thun kah mơ̆ng ƀuh, giong anun pơsir. Kâo pơmin ba tơbiă hơnong pơkă ngă bruă tui anai amra djru abih bang lăng glăi hmao kru, pơkra glăi tañ hăng pơtŏng glăi tañ mơ̆ng anun ngă bruă amra djơ̆ sit hloh”.

Ƀu kơnong pơdơi ƀơi bruă pơtŏng glăi rim čô mơnuih, hơnong pơkă mă bruă phrâo ăt hơmâo ngă hăng khul grup dong. Yă Nguyễn Thị Hồng Thúy, khua anom pơphun bruă Ping gah tơring čar lăi, anai jing tơlơi pơplih phrâo, khŏm kiăng khua anom bruă khŏm krăp lăng djŏp bruă mă mơ̆ng mơnuih djru bruă, pơhlôm pơtŏng sit anŏ klă hăng mrô bruă mă hơmâo ngă giong:“Tơdơi kơ tơlơi pơkă hơmâo mă yua ăt lăi pơthâo rơđah rơđông pơ hơdôm čô khua apăn bruă yua anai jing gưl git gai sit nik krăp lăng bruă mă mơ̆ng adơi ayong amăng anih mă bruă. Kiăo tui tơlơi pơtŏng sit anun, lăi pơthâo rơđah hơdôm mơta bruă mă hơmâo ngă giong amăng blan mơ̆ng Khua anih mă bruă tơdơi kơ anun pơtŏng sit hơdôm mơta bruă rơđah rơđông mơ̆ng rim čô mơnuih ăt kah hăng anŏ tŭ yua mơ̆ng bruă hơmâo ngă giong”.

Tui hăng ơi Nguyễn Thượng Hải, Khua anom pơphun bruă Ping gah Dak Lăk, bruă pơtŏng sit mơnuih mă bruă tui hơnong pơkă phrâo, yap wơ̆t hăng mrô bruă mă hăng anŏ tơnap mơ̆ng rim bruă mă, ƀu kơnong djru ƀuh hăng pơtô rơguăt bruă kơ ƀing rơgơi đôč ôh mơ̆ ăt pơplih glăi ƀudah pơtô pơjuăt thim kơ ƀing ngă bruă aka ƀu djơ̆ hăng anŏ pơkă.

Tơdơi kơ 3 blan pơphun ngă, tơlơi phiăn phrâo blung a ba glăi hơdôm tơlơi pơplih phrâo klă. Ƀing khua, mơnuih mă bruă hơmâo tơlơi pơmin gơgrong bruă hloh, krăp lăng akŏ tlôn ngă bruă hăng plai ƀiă ngă soh amăng bruă pơphô, pơtô brơi. Khă hnun, tui hăng tơlơi pơsit mơ̆ng khua mua Anom pơphun bruă Ping gah, tơring čar ăt dŏ hơmâo mơn tơlơi pơmin alah lăi, hŭi ngă kơ arăng ƀu mơak, jing aka ƀu črâo rơđah anŏ ƀu djơ̆, ngă bruă dŏ tơdu mơ̆ng gŏp mă bruă. Yua hnun, amăng hrơi blan pơ anăp, Anom bruă amra lăi pơthâo rơđah ngă bruă lăp djơ̆, tơpă sit, dưm kơnar, pơhlôm lăi glăi djơ̆ tơlơi rơgơi mơ̆ng rim čô khua:“Lăi biă gơ̆, adơi ayong blung a aka ƀu juăt ôh, lăng bruă ngă anai kơtang đơi, ră anai jing juă laih, adơi ayong lêng kơ tŭ ư, pô hlơi ngă bruă rơgơi lĕ rơgơi yơh, pô hlơi ngă bruă aka ƀu dưi lĕ ƀu dưi ôh. Mơ̆ng hlâo ƀing ta ngă bơkơnar soh, lêng kơ klă soh, tui anun pô hlơi ngă bruă klă lĕ ñu ƀu mơak ôh, yua dah pô adih ngă bruă ƀu lu kar hăng pô ta ôh samơ̆ ăt lăi ngă giong bruă kơnar hăng ta mơn, tui anun ƀu djơ̆ ôh, jing adơi ayong tŭ biă hăng tơlơi phiăn phrâo anai, tui anun amăng anom bruă amra dưi ruah mă mơnuih ngă bruă rơgơi”.

Bruă pơplih phrâo bruă pơtŏng glăi tơlơi rơgơi mơ̆ng mơnuih mă bruă ƀơi Anom pơphun bruă Ping gah tơring čar Dak Lak glăk ba glăi boh tŭ yua klă, pơtrut mơnuih mă bruă gir hloh hăng mă bruă rơgơi hloh. Tơdah hơmâo ngă klă mơtăm, hơbô̆ bruă anai amra pok prong djŏp anom bruă amăng tơring čar, djru pơđĭ tui anŏ klă mơ̆ng ƀing khua, mơnuih mă bruă, bơwih brơi klă hloh kơ bruă akŏ pơjing Ping gah hăng anom bruă kơđi čar./.