Yă H’Ních Niê, djuai ania Êđê dŏ pơ phường Tân An tơdơi kơ hơmâo pơkă lăng tơlơi suaih pral brơi đôč amăng tal blung a yua Jơnum min mơnuih ƀôn sang tơring čar Dak Lăk pơphun ngă, ñu lăi: “Tal blung a hơmâo pơkă lăng brơi đôč tơlơi suaih pral  tui hăng anai, ta khăm pơkă lăng baih, jing thâo laih drơi jăn ta hiư̆m pă. Pô kâo hăng neh met wa amăng plơi hok mơak biă. Čang rơmang mơ̆ng anai pơ tlôn hơmâo Ping gah, Kơnuk kơna lăng ba hloh kiăng neh met wa hơmâo nao pơkă lăng tơlơi suaih pral”.

Tui hăng yă Châu Thị Kim Phụng, Khua sang ia jrao phường Tân An, amăng 2 wơ̆t hrơi tơjuh pơkă brơi, sem lăng brơi đôč tơlơi suaih pral kơ mơnuih ƀôn sang, djru pơmut djŏp hră pơ-ar tơlơi suaih pral điện tử hăng hră pơhlom nua ia jrao ƀơi boh thâo VNeID, phường hơmâo ngă giong 100% hơnong pơkă ngă lăng hlâo, laih dong pok prong khăm pơkă brơi đôč kơ abih bang mơnuih hlao: “Sang ia jrao phường hơmâo pơkă tơlơi ruă amăng dlăm, gah rơngiao, tơgơi - kang - ƀô̆ mơta, amăng tơngia - adung - rơkông đok, pơtŏng lăng hăng kah hĭ phara rim tơlơi suaih pral mơ̆ng neh met wa. Laih dong ba yua hơdôm boh thâo phrâo kah hăng pơčrang drah, pơčrang ia mơañă, ăt kah hăng phun X-quang. Hrŏm hăng pơkă lăng, phường ăt djru mơnuih ƀôn sang dưm pơmut hră pơ-ar amăng hră pơkă tơlơi ruă điện tử”.

Ơi ia jrao CKII Phạm Minh Hữu, Kơ-iăng khua gơnong bruă ia jrao tơring čar Dak Lăk brơi thâo, ngă tui hăng tơlơi git gai mơ̆ng Jơnum min mơnuih ƀôn sang tơring čar hăng Tơlơi pơtrun mrô 72 mơ̆ng Ding jum kơđi čar kơ bruă pơkă lăng tơlơi suaih pral tui tơđar, pơkă lăng brơi đôč kơ mơnuih ƀôn sang, Gơnong bruă hơmâo pok pơhai truh abih bang hơdôm Sang ia jrao ƀơi 102 boh să, phường amăng tơring čar; ngă hrŏm hăng hơdôm boh sang ia jrao prong hăng sang ia jrao mơnuih ƀôn sang ngă pô, prăp lui măi mok, gơnam yua hăng mơnuih mă bruă bơwih brơi mơnuih ƀôn sang. Amăng anun, ngă lăng hlâo ƀơi 4 boh să, phường anun lĕ phường Tân An, Tuy Hòa, hăng hơdôm boh să Đồng Xuân laih anun Krông Bông; 98 boh să, phường dŏ glăi amra pơphun ngă mơ̆ng lơ 1/7 pơ anăp. Truh ră anai, giăm 500 čô mơnuih hơmâo khăm lăng djŏp tui tơlơi pơtô ba mơ̆ng Ding jum ia jrao, laih anun bruă pơkă lăng tơlơi ruă ăt hơmâo ngă brơi hơdôm rơbâo čô mơnuih. Ơi ia jrao Phạm Minh Hữu lăi dlăm anŏ yom mơ̆ng bruă pơkă lăng tơlơi suaih pral kơ abih bang mơnuih ƀôn sang: “Pơkă lăng tơlơi suaih pral kơ mơnuih ƀôn sang hơmâo kah jing 3 khul, anun lĕ khul mơ̆ng nge truh 6 thun, khul mơ̆ng 6-18 thun, dŏ glăi lĕ rơbêh 18 thun. Bruă nao pơkă lăng tơlơi suaih pral djru ta thâo kah phara tơlơi suaih pral rim čô mơnuih, dăp mrô hơget, tui hơdôm rơnoh klă biă, klă, găp ƀrô hăng tơdu, ngă hiư̆m pă kiăng thâo djŏp abih bang, laih anun lơ̆m ƀuh hơmâo tơlơi ruă hơget thơ pơtô brơi neh met wa nao pơjrao tañ”.

Tơring čar Dak Lăk tơdơi kơ pơmut hrŏm hơmâo 3,34 klăk čô. Ngă tui Tơlơi pơtrun mrô 72 mơ̆ng Ding jum kơđi čar, Rơwang thun 2026-2030, Dak Lăk him lăng brơi nao 1.000 klai prăk/thun či pơkă lăng tơlơi suaih pral kơ mơnuih ƀôn sang. Kơnong amăng thun 2026, tơring čar brơi nao 400 klai prăk kơ 102 boh sang ia jrao să, phường, rơnoh prăk mă yua năng ai 350 rơbâo/sa čô/sa wơ̆t pơkă lăng. Ơi Lương Nguyễn Minh Triết, Khua ping gah tơring čar Dak Lăk lăi, hăng anih anom prong biă, mơnuih ƀôn sang dŏ ƀu bơkơnar lơi, sang anŏ rin hăng neh met wa djuai ania ƀiă lu, bruă lăng ba tơlơi suaih pral abih bang mơnuih jing bruă yom biă, thâo pap, hơdor tơngia, pơhlom ƀu hơmâo pioh glăi pô hlơi gah tlôn ôh. Khua ping gah tơring čar Dak Lăk kiăng hơdôm gơnong bruă, tơring ngă bruă hăng pran jua gơgrong hloh: “Hơdôm anom bruă, hăng sang ia jrao khŏm nao tơl sang, phang tơl adring mơtăm yơh, kiăng pơhlom brơi abih bang thâo, nao pơkă lăng tơlơi suaih pral rim tơđar, biă ñu sang anŏ hơmâo anăn kơnuk kơna djru, ƀing tha rơma, mơnuih drơi jăn ƀu klă, rơwen rơwô jô găng, sang anŏ rin, hăng sang anŏ djuai ania ƀiă. Anom bruă ia jrao amăng tơring čar kiăng pơƀut djŏp tơlơi hơmâo, măi mok, gơnam yua, pơphun nao pơkă brơi djŏp plơi, rơgơi mơbruă, pơhlom pơkă tơlơi suaih pral tŭ yua hloh”.

Bruă pơkă tơlơi suaih pral brơi mơnuih ƀôn sang ƀu kơnong djru tañ ƀuh, tañ pơjrao tơlơi ruă đôč ôh, ăt djru neh met wa juăt hĭ hăng bruă wai lăng tơlơi suaih pral mơ̆ng pô. Hăng tơlơi ngă bruă mơ̆ng abih bang anom bruă kơđi čar, bruă kiăng abih bang hơmâo lăng ba tơlơi suaih pral, hơmâo wai lăng gah ia jrao jing tơlơi sit laih, ba Tơlơi pơtrun mrô 72 mơ̆ng Ding jum kơđi čar tañ mut amăng tơlơi hơdip mơda neh met wa kual dap kơdư./.