Plơi pơkra miến Chi Lăng ƀơi phường Khánh Xuân, plơi prong Buôn Ma Thuột, tơring čar Dak Lak “bơngač apui” wot tơhrơi hăng mlăm pioh hmâo gơnam Tết. Ơi Hà Văn Thích, sa amăng hơdôm bôh sang anô̆ hmâo rơbêh kơ 20 thun kĕ phĭ hăng bruă pơkra miến tui phiăn juăt brơi thâo: Thun anai, hơdôm mrô rơkâo blơi pioh kơ Tết đĭ năng ai ñu 40% bơhmu hăng hrơi tơđar hăng đĭ 10% bơhmu hăng thun hlâo.

Kiăng djop mrô gơnam sĭ, anom ñu khom kơtưn đĭ mrô mơnuih mă bruă, hrơi mông pioh hmao jao gơnam hlâo kơ hrơi Tết tui phiăn juăt. Hăng Sang bruă Ban Mê Green Farm, sa bôh anom bơwih ƀong juăt pla hăng sĭ trong mơxăm ƀơi Dak Lak ăt glăk kơtưn pĕ pơhrui pioh sĭ kơ hrơi Tết. hrŏm hăng sĭ trong mơxăm, sang bruă dô̆ lăi pơthâo gơnam pơkra pơjing kah hăng: ia trong mơxăm dưm amăng get hăng trong mơxăm phang krô, ia măm trong mơxăm, dấm pơkra mơ̆ng trong mơxăm lăp pioh yua kơ hrơi Tết./.