Rơđah biă ñu, Khul khua pơ ala mơnuih ƀôn sang tơring čar Dak Nông hmâo pơsit kơ bruă pơmut, pơjing phrâo sa dua bôh gơnong bruă, anom bruă: Pơmut hrŏm Gơnong bruă pôr pơhing hăng Gơnong bruă bôh thâo phrâo măi mok jing Gơnong bruă bôh thâo phrâo kơsem min hăng hơdră phrâo măi mok. Pơmut hrŏm Gơnong bruă kơđi hăng Gơnong bruă wai lăng mơnuih mă bruă, tơhan rơka ruă hăng mơnuih mơnam jing Gơnong bruă kơđi čar. Pơmut hrŏm Gơnong bruă man pơdŏng hăng Gơnong bruă dŭ pơgiăng jơlan nao rai jing Gơnong bruă man pơdŏng.

Pơmut hrŏm Gơnong bruă prăk kak hăng Gơnong bruă tuh pơplai jing Gơnong bruă prăk kak. Pơmut hrŏm Gơnong bruă đang hmua hăng pơđĭ kyar ƀôn lan tơring čar hăng Gơnong bruă kông ngăn glai klô jing Gơnong bruă đang hmua hăng rơhuông adai lŏn mơnai. Pơjing Gơnong bruă djuai ania hăng tơlơi đăo hluai tui Grŭp djuai ania tơring čar tŭ mă hơnong Grŭp wai lăng tơlơi đăo mơ̆ng Gơnong bruă kơđi čar. Tui anun, mrô ƀirô gah Jơnum min mơnuih ƀôn sang tơring čar Dak Nông hmâo hrŏ trun mơ̆ng 18 truh dô̆ 14 bôh ƀirô. Ăt amăng tal jơnum mơn, Khul Khua pơ ala mơnuih ƀôn sang tơring čar Dak Nông hmâo pơlir hơbit pơplih pơkra tơhnal pơkă đĭ kyar GRDP thun 2025 hmâo laih 8,11% (tơhnal pơkă hơđăp lĕ 6,84%)./.