Ơi Lê Trọng Yên, Kơ-iăng Khua Jơnum min mơnuih ƀôn sang tơring čar Dak Nông brơi thâo, tơring čar hmâo thâo tơlơi pơhing kơ tơlơi lŏn tơhroh ƀơi ia krông Krông Nô črăn găn să Quảng Phú, tơring glông Krông Nô. Mơng anun, Jơnum min mơnuih ƀôn sang tơring čar hmâo črâo ba hơdôm gơnong bruă bơdjơ̆ nao hăng gong gai tơring glông Krông Nô pơjing grŭp pel ĕp, ngă rơđah tơlơi lŏn tơhroh hăng lăi pơthâo glăi. Ơi Lê Trọng Yên pơtŏng sit, tơdah pioh hmâo tơlơi lŏn tơhroh ƀơi hơdôm anih hmâo pơsit laih hră brơi anom bơwih ƀong, tơring čar amra khom pơdơi bruă mă čuah.

Rơngiao kơ anun, tơring čar Dak Nông ăt glăk črâo ba ngă rơđah mơn bruă anom bơwih ƀong mă čuah blơi lŏn ngă đang hmua mơng mơnuih ƀôn sang ƀơi kual lŏn tơhroh. Lŏn ngă đang hmua ƀơi kơtuai ia krông pơjing biă ñu mơng čuah, tơdah anom bơwih ƀong mă tŭ tơlơi anun blơi sĭ lŏn pioh gêh gal mă čuah ƀu djơ̆ phiăn, tơring čar amra črâo ba hơdôm gơnong bruă pơphun pơsir tơpă./.