Kiăo tui anun, yap mơ̆ng blan 1/2025 truh abih thun 2027, Việt Nam amra gum hrŏm git gai čih pơkra hăng mă yua hơdôm jơlan gah pơkă mơ̆ng UN Women, pơhlôm hơdôm bruă khom ngă hăng bruă mă mơ̆ng ƀirô anai ha sa hăng hơdôm tơhnal ba tơbiă hăng hơdră bruă abih bang mơ̆ng Sang gum hơbit djop dêh čar kơ pơtrut tơlơi bơkơnar bơnai hăng rơkơi hăng jao tơlơi dưi kơ đah kơmơi.

Hăng sa ding kơna mơ̆ng Khul mă bruă, Việt Nam ăt amra gum hrŏm lơm pơsit hơdôm kơčăo bruă, jơlan hơdră bruă mă ăt kah hăng hơdôm tơlơi pơsit kơ hră pơ-ar, prăk kak hăng ngăn drăp mơ̆ng UN Women. Bruă abih bang ding kơna ECOSOC tŭ ư ruah Việt Nam mut amăng Khul mă bruă UN Women pơdah tơlơi djă pioh hăng pơsit yôm mơ̆ng jar kơmar pioh kơ hơdôm hơdră bruă, bôh than pơtrut dưm kơnar bơnai hăng rơkơi hăng gir run gum hrŏm jar kơmar mơ̆ng Việt Nam amăng bruă anai, hrŏm hăng anun đăo gơnang Việt Nam amra gum hơgôp klă mut amăng bruă git gai mơ̆ng UN Women pơ̆ anăp anai./.