Tlam lơ 29/5, ƀơi ƀôn prong Hồ Chí Minh, Jơnum min mơnuih ƀon sang tơring čar Hậu Giang, Bình Định, Jơnum min mơnuih ƀon sang plơi prong Thủ Đức hăng Khul boh thâo măi mok ƀôn prong Hồ Chí Minh (HCA) jơnum lăi pơthâo rơwang hrơi tơjuh NASA ƀơi Việt Nam-Vietnam Space Week. Tui Khul boh thâo măi mok ƀôn prong Hồ Chí Minh, anai lĕ tal blung a rơwang hrơi tơjuh NASA hơmâo pok pơhai ƀơi sa boh dêh čar kual ASEAN. NASA lĕ anom bruă rơngĭt adai dêh čar mơng Mi, hơmâo akŏ pơjing amăng thun 1958, gơgrong kơ jơlan hơdră bruă rơngĭt adai hăng kơsem min boh thâo hăng rơhuông adai.

Rơwang hrơi tơjuh NASA ƀơi Việt Nam -Vietnam Space Week amra pơphun ƀơi 3 boh tơring čar hơmâo plơi prong Vị Thanh, tơring čar Hậu Giang amăng lơ 5 hăng 6/6; plơi prong Thủ Đức, ƀôn prong Hồ Chí Minh amăng lơ 7/6; plơi prong Quy Nhơn, tơring čar Bình Định amăng lơ 8 hăng 9/6/2023. Rơwang hrơi tơjuh NASA ƀơi Việt Nam pơdă prưng lu tơlơi dưi hăng tơlơi gum pơgôp mơng NASA amăng bruă kơsem min rơngĭt adai, kơsem min boh thâo phrâo hăng pơđĭ kyar boh thâo măi mok hăng hơdôm tơlơi pơčeh phrâo hloh. Hơdôm bruă mă anai kiăng pơtrut pran ƀing rơnuk tơdơi hăng hơdôm tơlơi bơră ruai glăi mơng ƀing đĭ hăng rơhuông adai mă bruă. Laih dong, pơlăi nao rai hơdôm bruă kơsem min boh thâo kiăng wai pơgang lŏn tơnah, plai ƀiă hơƀak jrak.