Ƀơi tơdrun kom păn ling tơhan Cam Ranh, ƀing mơgăt ƀat tô mur 189 Tơhan sơlup glăk pơtŏp hrăm blah ngă. Hăng ƀing khua, mơnuih mơgăt ƀat tô, dưi wai lăng, mơgăt ƀat tô mur Kilo 636 rơnuk phrâo ƀu kơnong tơlơi kơdrưh đôč ôh ăt jing bruă gơgrong ngă yom biă mă. Hăng anăn arăng pia “luh jŭ amăng ia rơsĭ”. Ƀat tô mur Kilo 636 jing rơgơi blah ngă, khŏm kiăng ƀing khua, mơnuih mơgăt ƀat tô thâo kjăp, dưi mă yua klă đah mơ̆ng ngă hrŏm hăng ling tơhan, pơgang kjăp kual bul pơtâo plao ia rơsĭ dêh čar ta. Thượng tá Hàn Văn Hiếu, Khua mơgăt ƀat tô Mur 182 - Hà Nội, brơi thâo: “Ƀing gơmơi leng kơ lăng bruă pơtŏp hrăm jing bruă yom phun, pơtŏp rơguăt yơh phun, pơtŏp kiăo tui tơlơi blah ngă sit nik đah mơ̆ng kjăp pran blah ngă tơdah hơmâo tơlơi truh, ngă pô dưi mơgăt, mă yua kiăo tui tơlơi ta či kiăng yơh ƀat tô mur rơgơi anai, amra čơkă hăng ngă truh kih djŏp bruă hơmâo jao, pơgang kjăp kual bul pơtâo plao ia rơsĭ Lŏn ia ta”.

Hăng sa anom bruă yom phara, rim wơ̆t nao rai pơ ia rơsĭ jing sa tơlơi lông prong mơn. Ƀing khua, mơnuih kiăo tui ƀat tô mur lu hrơi mơtăm ƀu thâo ƀuh dong tah yang hrơi. Anih dŏ kơniă, kơƀah angin či suă pran. Tơdah ngă soh djơ̆ đơset đôč ăt ba truh tơlơi hŭi rơhyưt, ƀu rơnuk rơnua kơ sa boh ƀat tô mơtăm. Tui hăng Thượng tá Nguyễn Văn Thuân, Khua apăn bruă kơđi čar Ƀat tô mur 183-ƀôn prong HCM brơi thâo: rơngiao kơ tơlơi apăn bruă, tơhan ƀat tô mur ăt kjăp kơđi čar hăng pran jua khăng khŏp, khin hơtai kah mơ̆ng dưi ngă amăng atur ia rơsĭ: “Bruă ƀing gơmơi jing bruă phara, ƀơi ƀat tô jing abih bang hrŭp sa đôč, abih bang khua, ling tơhan mut hrŏm jing sa khul hơmâo sa tơlơi pơmin. Tơdah hơmâo sa anih ƀudah sa čô đôč pơmin phara, ƀu kjăp amra bơbeč sat kơ abih bang mơnuih amăng ƀat tô mơtăm, ngă rung răng abih bruă mă mơ̆ng anom bruă. Yua hnun, hlâo či nao, abih bang leng kơ hơđong pran, hơmâo hrŏm sa tơlơi pơmin, kjăp bruă kơđi čar, bong kjăp tơlơi gum pơgôp, dŏ hrŏm, pơlir hơbit, hơmâo tơlơi pơmin hrŏm, gir kơtir đah mơ̆ng dưi ngă truh kih djŏp bruă hơmâo jao”.

Hui đôč mơnuih thâo, kiăng dưi nao rai pơ ia rơsĭ rơnuk rơnua tui mông anai, djŏp khul grup khua mua, tơhan ƀat tô mơ̆ng Lữ đoàn 189 Tơhan sơlup găn rơgao lu tơlơi tơnap biă mă. Mơ̆ng bruă hrăm tơlơi tač rơngiao, hrăm boh hră kĭ thuâ̆t tơnap truh kơ mă yua boh thâo rơnuk phrâo rơgơi hloh rŏng lŏn tơnah...abih bang jing tơlơi lông lăng ƀu anet ôh. Trung tá Nguyễn Đình Danh, Ƀat tô mur 186-Đà Nẵng lăi: “Mơ̆ng hrơi hơmâo hrăm tui hơdrôm hră apăn bruă mă yua ƀat tô mur, ƀing gơmơi gir sem lăng, pơčrông sai, hrăm nao rai tơdruă, tơdơi kơ anun kiăo tui hơdôm tơlơi hơmâo hrăm amăng dêh čar ta wơ̆t hăng hră pơtô hrăm mơ̆ng čar rơngiao đah mơ̆ng tañ thâo hluh. Lơ̆m hơmâo hrăm sit nik laih anun ngă lăng hlao ƀơi măi mok, gơmơi pioh mông pơtŏp hrăm, thâo hơdră mă yua, mơgăt ñu, răk pioh klă djŏp măi mok anun. Yua hnun mơn, ƀing khua, tơhan ƀat tô dưi thâo tañ, mă yua phao kơtuang, măi mok rơnuk phrâo”.

Mơ̆ng hrơi hrăm blung a dŏ sư̆ rơbư̆ mơ̆ng ƀing mơgăt ƀat tô mur ƀơi čar Nga, mơ̆ng hrơi dŏ hrăm ƀơi tơdron pơtŏp bruă, anih mơgăt truh pơ Anom bruă pơtŏp mơgăt ƀat tô mur ƀơi Cam Ranh hăng amăng lăm tur ia rơsĭ, truh ră anai ƀing khua, tơhan ƀat tô Lữ đoàn 189 dưi laih mơgăt, mă yua ƀat tô mur Kilo 636 rơnuk phrâo tui hluai či kiăng. Thượng tá Phan Thanh Quang, Kơ-iăng khua Lữ đoàn, Khua pơphô bruă, Lữ đoàn ƀat tô mur 189 Tơhan sơlup brơi thâo: “Hơdôm thun rơgao, Lữ đoàn hơmâo pơtrut bruă pơtô kơđi čar, kjăp tơlơi pơmin, ngă phun atur či pơđĭ tui pran jua hăng gir run ngă bruă, pơƀut pơtô pơblang gru grua hing ang, tơlơi kơdrưh kơ-ang, pơ-ư pơ-ang lơ̆m hơmâo bơwih, pơyơr pran jua; râu mơdư pran jua hor kơ bruă, tơlơi pơmin, tơlơi gơgrong mơ̆ng ƀing khua, tơhan mơgăt ƀat tô amăng mông hrăm hăng mă bruă. Pơtrut tui gru grua “Gum pơgôp, ngă djơ̆ tơlơi phiăn, hơgŏm, khŏm dưi” mơ̆ng anom bruă Tơhan sông kơtang mơnuih ƀôn sang, ƀing khua, tơhan Lữ đoàn Ƀat tô mur 189 amra gum pơgôp, pơklaih hĭ anŏ tơnap, gir ngă truh kih djŏp bruă hơmâo jao, djru pơgang kjăp tơlơi dưi ngă pô ƀơi bul pơtâo plao ia rơsĭ Dêh čar ta”.

Amăng rơnuk anai, bruă pơgang ba tơlơi dưi ngă pô wai lăng lŏn ia mơ̆ng lăm atur ia rơsĭ mơ̆ng Lữ đoàn ƀat tô mur 189 Tơhan sơlup jai glêh tơnap. 15 thun - aka ƀu sui ôh samơ̆ ăt dưi pơsit tơlơi kơdrưh, hmư̆ hing mơ̆ng sa khul tơhan phara rơgơi, hơdeč mơ̆ng Tơhan sơlup mơnuih ƀôn sang Việt Nam. Amăng lăm atur ia rơsĭ, tơhan ƀat tô mur ăt gum ngă bruă, dŏ wai pơgang rim kual ia rơsĭ mơ̆ng Lŏn ia. Ƀing tơhan yom phara amăng anom bruă phara - glăk čih tŏ tui “Tơlơi ră ruai bơni kơ bruă wai pơgang ia rơsĭ” mơ̆ng amăng lăm atur ia, pơgang kjăp bul pơtâo plao ia rơsĭ mơ̆ng Lŏn ia./.