Mơguah lơ 21/3/2024, Jơnum ječ ameč lok 6, khua mua pơ ala mơnuih ƀôn sang dêh čar tal XV pơphun laih ƀơi sang jơnum prong khua pơ ala mơnuih ƀôn sang dêh čar, plơi prong jưh jom Hà Nội yua kơ ơi Vương Đình Huệ Khua git gai pơ ala mơnuih ƀôn sang dêh čar pô git gai, kiăng ngă tui sem glăi pơđĭ hăng pơdơi bruă ngă khua mir sir Lŏn ia Cộng hoà xã hội chủ nghĩa Việt Nam rơwang bruă thun 2021-2026 laih anun brơi pơdơi bruă ngă pô pơ ala mơnuih ƀôn sang dêh čar tal XV hăng ơi Võ Văn Thưởng gah Grup khua pơ ala mơnuih ƀôn sang ƀơi ƀôn prong Đà Nẵng.

Tơdơi kơ hmư̆ lăi pơthâo, pơdah đĭ hră lăi pơthâo, pơgôp hiăp mơ̆ng ơi Võ Văn Thưởng, khua mua pơ ala mơnuih ƀôn sang dêh čar hlong pơčrong nao rai plĕ hră hơgŏm laih anun pơsit hĭ Hră pơtrun kơ bruă pơdơi bruă ngă khua mir sir Lŏn ia xã hội chủ nghĩa Việt Nam rơwang bruă thun 2021-2026 laih anun pơdơi ngă pô pơ ala mơnuih ƀôn sang dêh čar tal XV hăng ơi Võ Văn Thưởng gah Grup khua pơ ala mơnuih ƀôn sang dêh čar ƀơi ƀôn prong Đà Nẵng.

Tơdơi kơ pơđut jơnum ječ ameč lok 6, khua mua pơ ala mơnuih ƀôn sang dêh čar tal XV, tui hăng tơlơi pơtrun amăng Phiah phiăn Lŏn ia Cộng hòa xã hội chủ nghĩa Việt Nam laih anun hơdôm pok hră tơlơi phiăn pơdjơ̆ nao, Jơnum min apăn bruă phun pơ ala mơnuih ƀôn sang dêh čar čih hră lăi pơthâo kơ bruă ngă khua mir sir jăng jai. Tui hăng anun, yă Võ Thị Ánh Xuân, Kơ-iăng Khua mir sir đĭ apăn bruă ngă khua mir sir jăng jai Lŏn ia Cộng hoà xã hội chủ nghĩa Việt Nam dơ̆ng mơ̆ng lơ 21/3/2024 truh kơ mông khua mua pơ ala mơnuih ƀôn sang dêh čar plĕ hră ruah glăi Khua mir sir phrâo.