Mrô čơđai djai yua kơ hơdôm tơlơi ruă ta dưi pơgang hlâo hăng jrao vắc xin hrŏ trun lu laih dơ̆ng mơ̆ng hrơi Việt Nam pơphun Jơlan hơdră Tlâ̆o pơgang pok prong dêh čar amăng thun 1981, hăng tơlơi anăp nao abih bang čơđai amăng lŏn ia anai lêng kơ hơmâo tlâ̆o vắc xin hlâo. Tlâ̆o pơgang hlâo hơmâo pơgang ba hơdôm klăk čô čơđai ƀơi Việt Nam dưi bĕ hĭ lu tơlơi duăm ruă amăng rơbêh 40 thun rơgao. Anai jing tơlơi pơhing yua Anom bruă ia jrao rŏng lŏn tơnah (WHO) hăng Keh prăk djru čơđai muai Sang gum hơbit djŏp dêh čar (UNICEF) brơi thâo ƀrô hrơi ngă lơphet Rơwang hrơi tơjuh tlâ̆o pơgang Rŏng lŏn tơnah (24-30/4).

Rim thun Việt Nam hơmâo năng ai 1,7 klăk čô čơđai hơmâo tơkeng rai, laih anun rơbêh 95% čô čơđai amăng mrô anai hơmâo tlâ̆o vắc xin brơi đôč pơgang 10 tơlơi ruă ƀă hyu hŭi rơhyưt. Rơwang hrơi tơjuh tlâ̆o pơgang thun anai pơphun mơ̆ng lơ 24-30/4/2024 hrŏm hăng hrơi ngă lơphet 50 thun pơphun Jơlan hơdră Tlâ̆o pơgang pok prong đơ đam rŏng lŏn tơnah, anai jing hrơi mông kiăng pơpŭ bơni kơ hơdôm tơlơi dưi ngă mơ̆ng Tlâ̆o pơgang pok prong, lăi nao tơlơi bơdjơ̆ nao mơ̆ng Jơlan hơdră Tlâ̆o pơgang pok prong amăng bruă djru hơdip, pơgang ba tơlơi suaih pral ană mơnuih, pơčeh phrâo đah mơ̆ng pơđĭ tui bruă tlâ̆o pơgang yôm anai.