Glăk bơyan adai pơ-iă hơ-uh kơtang, anih Brač pơjrao, anih mă glăi pran, anih wai lăng ƀing ană kơmơi ƀă pi tơkeng weng - Sang ia jrao tơring glông Kon Braih, ăt hơ-uh hloh, glêh glar hloh mơn. Thâo hluh, thâo pap kơ mơnuih ruă, ơi ia jrao Y Hồng Nga, djom rơnang pơkă brơi tơlơi suaih pral kơ rim čô mơnuih. Ñu brơi thâo, kiăng khăm djơ̆ tơlơi ruă, pơjrao tañ grăng, hrŏm hăng tơlơi apăn bruă, yôm hloh lĕ hơmâo pô ruă kơnang kơ ta mơn:“Kâo jing sa čô ơi ia jrao djuai ania Sêdang thâo hluh lu mơnuih rai pơ anai khăm, pơjrao lêng kơ tơnap tap soh yơh, samơ̆ kâo ăt gir khăm pơjrao brơi klă hloh kơ mơnuih djuai ƀiă. Jing sa čô ơi ia jrao kâo pơmin, blung a ta khŏm ngă giong bruă hơmâo jao, hăng ƀing ruă kâo lăng ba abih pran, gir pơjrao klă hloh brơi ƀing gơñu”.

Tơkeng amăng sang anŏ hơmâo ama lĕ mơnuih djuai ania Sêdang, amĭ Yuan, ơi ia jrao Y Hồng Nga thâo pap biă hăng mơnuih djuai ƀiă. Kiăng djru ba ƀing duăm ruă, hăng bruă ngă Khua grup hlăk ai Sang ia jrao tơring glông Kon Braih, Y Hồng Nga iâu pơthưr hlăk ai amăng sang ia jrao, giong anun iâu pơthưr lu anom bruă gum djru dong či pơphun akŏ pơdong anih tơnă hơbai asơi añăm khăp pap, sum ao hiam rơgoh ƀơk brơi đôč kơ ƀing ruă. Rơngiao kơ anun, amăng hrơi akŏ pơdong khul hlăk ai mut phung rơnuk Hồ Chí Minh 26/3, Hrơi pơklaih rơngai kual Dơnung 30/4, Hrơi pơpŭ kơ tơhan rơka, djai pơsăn drơi 27/7..., Grup hlăk ai hơmâo pơphun bruă pơpŭ bơni, thâo pap hăng tơlơi tơnap tap mơ̆ng ană plơi pla. Điều dưỡng Nguyễn Trần Mỹ Hạnh brơi thâo, amăng djŏp bruă mă mơ̆ng hlăk ai Sang ia jrao tơring glông Kon Braih lêng kơ hơmâo Khua grup hlăk ai gum ngă:“Amai Nga jing sa čô mơnuih thâo pơmin biă, ngă bruă gir, pơjrao brơi mơnuih ruă klă mơn. Rơngiao kơ bruă juăt mă, amai Nga lêng kơ hrăm thim kiăng thâo lu hloh. Amai Nga lêng kơ abih pran jua, gir ngă bruă yua Grup hlăk ai pơphun. Amai Nga jing sa čô mơnuih kiăng ayong amai adơi amăng grup hlăk ai sang ia jrao hla tui”.

Tui hăng ơi ia jrao Nguyễn Luận, Kơ-iăng khua Sang ia jrao prong tơring glông Kon Braih, yua dŏ kơƀah 15 čô ơi ia jrao anun jing hơdôm hrơi mă bruă pơ sang ia jrao tơnap biă. Ơi ia jrao dŏ krăp lăng, ƀrô ngă bruă hyu khăm gah anih pơjrao mơnuih duam, mơnuih rơka rơkač, ƀing tơkeng weng, ƀing čơđai, djru pơjrao mơnuih ruă kraih, ƀrô git gai mơ̆ng ataih hăng ƀing hơmâo ba nao pơjrao ječ ƀơi hơdôm boh sang ia jrao să hai. Tui anun, ơi ia jrao Y Hồng Nga ƀu kơnong ngă klă bruă khăm pơjrao đôč ôh mơ̆ ăt lêng kơ nao hlâo amăng djŏp bruă mă mơ̆ng sang ia jrao. Ơi ia jrao Nguyễn Luận brơi thâo:“Ơi ia jrao Y Hồng Nga lêng kơ lăng ba tơlơi suaih pral, khăm pơjrao brơi mơnuih ruă, pơtô brơi ƀing duăm ruă thâo pơgang tơlơi suaih pral mă pô amăng hrơi dŏ đih pơ sang ia jrao wơ̆t hăng lơ̆m glăi pơ sang. Kơ bruă pơkŏn lĕ ơi ia jrao Y Hồng Nga jing sa čô Khua grup hlăk ai hur har ngă bruă, biă ñu pơyơr drah, khăm, pơjrao brơi đôč kơ mơnuih ƀôn sang”.

Ơi ia jrao Y Hồng Nga pơƀuh tơlơi apăn bruă hăng hơmâo tơlơi khăp ƀu-eng mơ̆ng ƀing duăm ruă wơ̆t hăng ƀing gŏp ngă bruă hrŏm ƀơi Sang ia jrao tơring glông Kon Braih, tơring čar Kon Tum. Ñu čang rơmang dưi hrăm chuyên khoa I- gah mơnuih tơkeng weng đah mơ̆ng pơđĭ tui tơlơi rơgơi, djru ba mơnuih ruă klă hloh ƀơi Sang ia jrao tơring glông Kon Braih./.