Gơnong bruă ia jrao tơring čar Kon Tum glăk gir run pok pơhai bruă pơgang kman glăk lar hyu kơtang. Blan 8 rơgao gơnong bruă ia jrao tơring čar Kon Tum jŭ yap hơmâo 71 čô mơnuih duam đung drah, đĭ 20 čô pơhmu hăng blan hlâo. Anih hơmâo lu mơnuih duam đung drah hloh lĕ tơring glông Kon Rẫy hăng 26 čô hăng 8/10 boh tơring glông, plơi prong amăng tơring čar ƀuh mơnuih duam đung drah.

Tui ơi ia jrao Chuyên khoa II Đỗ Ngọc Hoà, kơ-iăng khua gơnong bruă ia jrao tơring čar Kon Tum, duam đung drah ƀuh amăng tơring čar ƀu djơ̆ tui tơđar 3 thun ha wŏt hơđuh đĭ kơtang dong tah mơ̆ rĭm thun lêng kơ ƀuh hăng ƀu djơ̆ tui bơyan dong tah. Ră anai tơring čar Kon Tum glăk amăng bơyan hơjan hlim, ayuh hyiăng gêh gal brơi keč amoaih čeh čar, tơlơi anai amra ngă kman lar hyu kơtang. Gơnong bruă ia jrao glăk kơtưn amăng pơgang duam đung drah, pơphun pruih ia jrao pơdjai keč amoaih.