Thun hrăm phrâo 2024-2025 tơring glông Kon Plông, tơring čar Kon Tum hmâo rơbêh kơ 7.000 čô čơđai sang hră hăng 29 bôh sang hră. Lơm ƀing čơđai sang hră anih sa pơphun nao sang hră, ƀing čơđai hmâo nai pơtô brơi bôh thâo bŏng glăi lơm hmâo lŏn pơpư̆. Nai Cao Thị Nguyệt, Khua Sang hră gưl sa Măng Đen, brơi thâo:

 “Ƀing čơđai thâo laih hơdră pioh pơgang, bĕ lơm hmâo lŏn pơpư̆. Biă ñu ƀing gơyut hmâo bôh thâo klă biă, pơdah glăi tañ biă. Lơm mơ̆ hmâo tơlơi pơpư̆ thơ ƀing gơmơi hmâo ĕp nao laih pơ̆ anih kơđap pơhlôm hloh”.

Nai Võ Quang Vinh, Kơ-iăng Khua Anom bruă pơtô pơhrăm tơring glông Kon Plông pơtŏng sit, gơgrong hlâo bŏng glăi hăng tơlơi lŏn pơpư̆, hơdôm thun jê̆ hăng anai bruă pơđĭ dlông bôh thâo kơ ƀing čơđai sang hră hăng nai pơtô pioh plai ƀiă răm rai lơm hmâo lŏn pơpư̆ ƀơi anih pô dô̆ lĕ bruă mă na nao mơ̆ng gơnong bruă pơtô pơhrăm tơring glông:

 “Anom bruă pơtô pơhrăm hmâo gum hrŏm laih hăng hơdôm bôh anom pơhrăm pơhlôm hlâo. Hăng čơđai sang hră, nai pơtô hơdôm bôh sang hră lơm hmâo tơlơi lăi pơthâo lŏn pơpư̆ ƀing čơđai lĕ ƀing ta khom tơbiă gah rơngiao, dô̆ gah rơgôp kơƀang ƀudah truh ƀơi yŭ sưng kơđap. Bruă bŏng glăi mơ̆ng nai pơtô hăng čơđai sang lĕ klă biă”.

Bôh nik brơi ƀuh dơ̆ng mơ̆ng blan 4 thun 2024 mơtăm, lơm lŏn pơpư̆ pơphun hmâo hăng rơnoh kơpal hmâo anih phun ƀơi kual tơring glông Kon Plông, tơring čar Kon Tum, Anom kơsem min Vật lý bôh lŏn gum hrŏm hăng gong gai tơring glông tañ pơphun bruă lăi pơhing, hăng lăi pơthâo kiăng mơnuih ƀôn sang pơđĭ dlông bruă bŏng glăi pioh plai ƀiă răm rai. Ơi Phạm Thanh Bình, Kơ-iăng Khua Grŭp git gai pơgang pơgăn ayuh hyiăng ƀu klă ngă, hyu ĕp mơnuih hmâo tơlơi truh hăng pơgang hlôm hlâo mơnuih ƀôn sang, Khua Anom bruă đang hmua hăng pơđĭ kyar ƀôn lan tơring glông Kon Plông, pơtŏng sit:

 “Tơring glông hmâo gơgrong hlâo pơjing jơlan bruă pioh bŏng glăi phara lĕ bruă lăi pơhing hơdôm bôh thâo bŏng glăi. Truh ră anai mrô mơnuih ƀôn sang dưi ngă juăt hơdôm tơlơi pơtô ba, hơdôm bôh thâo hmâo năng ai ñu rơbêh kơ 90%. Hlâo adih pran jua mơ̆ng mơnuih ƀôn sang bơngot biă, ƀu hơđong ôh tơdơi kơ hmâo hmư̆ tơlơi lăi pơthâo mơnuih ƀôn sang thâo laih, hluh rơđah anun huăi bơngot”.

Jê̆ hăng anai, tơdơi kơ hmâo lŏn pơpư̆ kơtang hloh mơ̆ng hlâo truh kơ ră anai hăng 5 đô̆ riter, pơpư̆ lar hyu djop kual Dap Kơdư, Anom kơsem min Vật lý bôh lŏn hăng gong gai tơring glông Kon Plông hmâo pơphun tal lăi pơhing, pơhrăm brơi, pơtô brơi giăm truh 1.000 wot čô mơnuih ƀôn sang hơdră pơgang, bĕ, bŏng glăi hăng lŏn pơpư̆. Hrŏm hăng anun pha brơi rơbêh kơ 26.700 pok hră lăi pơthâo, hră pơtô bôh thâo bŏng glăi hăng lŏn pơpư̆ kơ mơnuih. Nai prin tha Bùi Thị Nhung, juăt bruă kơsem min gah lŏn pơpư̆ Anom kơsem min Vật lý bôh lŏn – Anom kơsem min bôh thâo phrâo hăng hơdră mă yua măi mok Việt Nam brơi thâo, mơ̆ng bôh tơhnal pel ĕp, hơduah lăng bơdjơ̆ nao mơ̆ng lŏn pơpư̆ hăng mơnuih ƀôn sang kual phun tơring glông Kon Plông, tơring čar Kon Tum, anom bruă glăk čih pơkra dong hră pơ-ar pel ĕp hăng bôh nik pioh pơđĭ dlông bruă bŏng glăi kơ mơnuih ƀôn sang amra khom hơdip hrŏm sui thun hăng lŏn pơpư̆:

 “Ƀing gơmơi hmâo thâo laih tơlơi pơmin, tơlơi čang rơmang mơ̆ng neh wa ăt kah hăng hơdôm tơlơi neh wa bưp amăng lŏn pơpư̆. Mơ̆ng anun ƀing gơmơi čih pơkra hră pơ-ar pơtô brơi neh wa kiăng djơ̆ hăng bôh nik ƀơi plơi pla pô”.

Gum hrŏm, djru mơnuih ƀôn sang hăng gong gai kual phun lŏn pơpư̆ tơring glông Kon Plông, tơring čar Kon Tum, truh ră anai Anom kơsem min Vật lý bôh lŏn hmâo dưm truă laih ƀơi tơring glông abih bang 12 bôh anom pơkă lăng kiăng hmao lăng tui tơlơi lŏn pơpư̆ ăt kah hăng djru bruă kơsem min. Ngă tui tơlơi črâo ba mơ̆ng Khua dêh čar, Anom ăt glăk ngă klă mơn bruă pơphun kơsem min dơlăm, ngă rơđah bôh than ba truh lŏn pơpư̆ lu tui ƀơi kual. Kiăng djru mơnuih ƀôn sang kual krah lŏn pơpư̆ Kon Plông pơđĭ dlông bruă bŏng glăi amra ngă juăt hơdip hrŏm sui thun hăng lŏn pơpư̆, Quân khu 5 hmâo pok pơhai laih bruă bŏng glăi hăng lŏn pơpư̆ ƀưi tơring glông. Pơmin sui thun tơring čar Kon Tum ăt hmâo yap truh mơn bruă pơplih pơkra bruă pơđĭ kyar kiăng djơ̆ tui, hrŏm hăng anun amra plai ƀiă răm rai lơm hmâo lŏn pơpư̆./.