Rơbêh kơ 170.000 čơđai sang hră hơdôm gưl ƀơi tơring čar Kon Tum pơwot glăi sang hră laih. Ƀơi anăp amra hmâo klin ruă ngă, biă ñu hăng duam pơđung drah, djơ̆ hmơi, rơkông đok, gơnong bruă ia jrao Kon Tum glăk pơtrut kơtang bruă pơgang, pơgăn pioh bơyan mut sang hră mơ̆ng ƀing čơđai sang hră pơhlôm dong.

Kiăo tui anun, gơnong bruă ia jrao tơring čar Kon Tum pơphun hơdôm grŭp pel ĕp, lăng tui, ngă tui bruă pơgang, pơgăn klin ruă ngă, biă ñu ƀơi kual hmâo klin ruă ngă, amra gluh đĭ jing klin hăng hơdôm anih anom akă wai lăng klă mơnuih tlâ̆o jrao pơgang hlôm hlâo ƀudah mrô tlâ̆o pơgang ƀiă. Ơi ia jrao chuyên khoa II Đỗ Ngọc Hòa, Kơ-iăng Khua Gơnong bruă ia jrao tơring čar Kon Tum brơi thâo, hăng tơlơi ruă bơbrah rơkông đok ăt kah hăng klin ruă pơkon, Kon Tum hmâo Ding jum ia jrao mă yua djop vaccine hăng ră anai gơnong bruă glăk pơtrut pơsur hơdôm bôh sang anô̆, amĭ ama čơđai nao tlâ̆o pơgang hlôm hlâo pioh pơgang tơlơi suaih pral kơ ƀing čơđai amăng bơyan mut sang hră./.