Mơng akŏ thun truh ră anai, bruă pel ĕp kơ bruă pok pơhai ha amăng plĕ, khut khăt, hơmâo tơlơi mut hrŏm mơng djop ding jum: ding jum ia jrao, ngă hmua hăng pơđĭ kyar ƀôn lan, sĭ mơdrô hăng tuh tia pơkra ming, kông ang, boh thâo rơgơi, Jơnum min djop djuai ania mơnuih mơnam Việt Nam hơdôm boh tơring čar, ƀôn prong, Khul mơnuih ngă hmua, khul đah kơmơi…gum hrŏm amăng pel ĕp pơhlôm mơnong ƀong huă hơdjă pơlir djop gơnong bruă, pel ĕp anih pơkra gơnam, anăn apăn gơnam sĭ mơdrô aka ƀu djơ̆ hăng tơlơi pơkă.

Amăng 6 blan akŏ thun anai, gơnong bruă ia jrao hơmâo pel ĕp rơbêh 232 rơbâo anih anom, ĕp ƀuh rơbêh 15 rơbâo anih ngă soh amăng pơhlôm mơnong ƀong huă hơdjă, pơsir hĭ rơbêh 3.300 anih anom ngă soh, amăng anun phak prăk giăm 2.300 anih anom hăng mrô prăk giăm 20 klai prăk, hrŏ trun pơhmu tui tơđar thun 2023. Rơngiao kơ bruă phak prăk ăt mă yua hơdôm hơdră phak pơhrua hăng pơsir hĭ bruă ngă soh, brơi pơdơi bơwih ƀong hăng 16 anih, 745 anih khŏm pơrai hĭ gơnam ƀu pơhlôm hiam hơdjă.

Djop ding jum, gơnong bruă hơmâo gum hrŏm kjăp hăng djop ƀon lan wai lăng, pơsir hĭ anih amuñ ngă sat kơ mơnong ƀong huă, črâo ba ƀon lan pok pơhai krăo lăng hơdôm anih amuñ bơdjơ̆ sat nao mơnong ƀong huă, pơhlôm gơnam ƀong huă hơdjă, pơgang hŭi măt mơnong ƀong huă, pơhlôm gơnam ƀong hơdjă amăng bơyan ngă yang pơprong. Bruă măt mơnong ƀong huă, đơ đam dêh čar ƀuh 70 wŏt ngă măt giăm 3 rơbâo čô mơnuih hăng 12 čô mơnuih djai.

Yă Phạm Khánh Phong Lan, Khua gơnong bruă pơhlôm mơnong ƀong huă hơdjă ƀôn prong Hồ Chí Minh brơi thâo: bruă măt mơnong ƀong huă glăk ngă tơnap tap amăng hơdôm sang tơnă hơbai lu mơnuih, pơdô̆ rơkơi bơnai, ƀong huă amăng hrơi ngă yang, sang sĭ gơnam ƀong huă. Tơlơi ngă tơnap hloh lĕ ƀuh lu sang čơ pok mă ča čot, sĭ gơnam pơkra mă, sit biă ñu sĭ gơnam online:

“Anŏ ngă tơnap tal hloh, sit biă ñu lĕ kiăo tui tlôn klin kman lĕ bruă pok sang čơ ča čot, sĭ mơdrô gơnam ƀơi anih pok mă. Bruă sĭ gơnam online ăt lĕ bruă aka ƀu djơ̆ hăng tơlơi pơkă yua amăng anun ƀing gơñu amra lăi pơthâo djop tơlơi mơ̆ ƀu pơhlôm brơi hơget ôh. Plơi prong ăt akŏ pơjing grup mă bruă yôm phăn, sit biă ñu lĕ jum dar hơdôm boh sang čơ phun pel ĕp, mă gơnam ba pơčrang lăng samơ̆ ƀơi anai arăng sĭ mơdrô lu gơnam, lu gơnam ăt mơng sang čơ mơn, lơm ƀuh arăng nao pel ĕp ƀing gơñu dŏp hĭ, anun ngă kơ bruă pel ĕp bưp lu tơnap tap”.

Ƀing pơ ala hơdôm ding jum, gơnong bruă ăt bơngŏt mơn kơ bruă tŏ tui pel ĕp lơm ƀu djop mơnuih mă bruă, hơdôm hơdră kơtưn pel ĕp ƀơi sang sĭ mơnong ƀong huă anet, gơnam sĭ rôk jơlan glăk jao brơi anom bruă ƀon lan. Sit biă ñu, hơdôm gơnam anun lĕ ia tơsâo rơmô, tơpai ƀiêr tơnap wai lăng, bơdjơ̆ nao tơlơi dưi yua gơnam mơng anih anom pơkra gơnam hăng mơnuih blơi yua. Hrŏm hăng anun, ƀing pơ ala ăt bơngŏt mơ̆n kơ bruă lăi hlao đơi anŏ tŭ yua mơng hơdôm gơnam pơkra mă, ngă soh amăng lăi pơthâo, anai lĕ kiăng pơhưč mơnuih blơi gơnam. Ƀing pơ ala mơng ding jum pôr pơhing brơi thâo, kiăng pơgăn bruă lăi pơthâo hyu djop anih, pơgăn sĭ ča čot, pơsir djơ̆ mơnuih, đĭ tui prăk phak. Rơkâo anăm brơi hơdôm plang sĭ gơnam điện tử livestream sĭ gơnam bơbuă drơi jăn pơkra mă…

Tui Thiếu tướng Nhữ Thị Minh Nguyệt, Kơ-iăng Khua anom bruă tơhan pôlih pơgăn ƀing ngă soh ngă hơƀak jrak, Ding jum kông ang, bruă sĭ mơdrô gơnam aka ƀu thâo tong ten anih pơkra, djă pioh mơnong ƀong huă ƀu hơdjă, sĭ gơnam aka ƀu thâo tong ten anih pơkra, ƀu pơƀuh brơi rơđah rơđong bruă pơhlôm gơnam hơdjă. Hơdôm bruă hluai tui plang internet, plang sĭ mơdrô điện tử, glăk ƀuh lu biă mă. Ƀing mơnuih blơi yua gơnam aka ƀu thâo tong ten anih pơkra, sut hĭ thun blan pơkra…bruă sĭ mơdrô online ba glăi lu tơnap tap amăng wai lăng, pơsir hĭ. Thiếu tướng Nhữ Thị Minh Nguyệt brơi thâo:

“Ƀing gơmơi ăt rơkâo Kơnuk kơna tañ pơplih djop hơbô̆ bruă wai lăng kơnuk kơna kơ bruă pơhlôm mơnong ƀong huă hơdjă tui jơlan gah mut hrŏm mơng gơnong glông truh pơ ƀon lan, kiăng pơhlôm tong ten tơlơi gơgrong amăng wai lăng mơng rĭm gơnong bruă, djop gưl hăng sit biă ñu lĕ tơlơi gơgrong tong ten amăng wai lăng hăng sa, dua anih pơkra pơjing, sĭ mơdrô mơnong ƀong huă dŏ lu tơlơi ngă soh hăng amra ƀu pơhlôm hơdjă mơnong ƀing huă tui ră anai. Anai lĕ gơnam anih pơkra pơjing sĭ mơdrô gơnam anet, sĭ gơnam rôk jơlan glông hăng kŏng tơpai, amăng hrơi blan rơgao ƀuh lu mơnuih mă mơnong ƀong huă, đa ƀuh djai mơnuih yua mơñum tơpai kŏng mă”.

Amăng mông jơnum, Kơ-iăng Khua dêh čar ơi Lê Thành Long lăng yôm, bruă pel ĕp pơhlôm mơnong ƀong huă hơdjă hơmâo lu tơlơi gir run hăng ba glăi boh tŭ yua sit nik. Hơdôm hơdră ba tơbiă glăk djơ̆ hăng jơlan gah hăng djơ̆ hăng tơlơi dưi. Samơ̆ ăt dŏ lu anŏ aka ƀu klă, anai lĕ bruă ƀu pơhlôm mơnong ƀong huă hơdjă, bruă măt mơnong ƀong huă, mrô mơnuih ngă soh lu tui, bruă phak bơtơhmal aka ƀu kơtang. Kơ-iăng khua dêh čar ơi Lê Thành Long rơkâo:

“Kâo ƀuh bruă pơhlôm mơnong ƀong huă hơdjă lĕ bruă bơdjơ̆ nao tơlơi răng kơđiăng mơng rĭm čô mơnuih, pơjing tơlơi juăt hăng hơnong pơkă arăng juăt iâu lĕ gru grua yua gơnam, ngă tui anun kah hơđong, mơ̆ tơdah ƀing ta pơhrua dong giăm 10 wŏt mơnuih hyu pel ĕp djop anih ăt aka ƀu dưi lơi. Ngă hiưm pă jing tơlơi juăt hăng jơlan gah blơi yua gơnam rơgơi lĕ yôm hloh, anai lĕ tơlơi kiăng ƀơi anăp hăng sui pơ anăp dong. Samơ̆ djop ding jum, gơnong bruă hluai tui bruă jao mơng ƀing gơñu hăng gơgrong amăng pel ĕp tô̆ tơnô̆ hăng lơm ĕp ƀuh kiăng pơsir hĭ khut khăt, laih dong pơtô pơblang brơi tơlơi anai kiăng arăng răng kơđiăng”./.