VOV4.Jarai - Hăng hơdôm bôh tơhnal klă lom yua lông lăng, lu tơlơi čang rơmang vaccine Nanon Covax pơgang Covid-19 blung a Việt Nam pơkra him lăng amra dưi pơsit hră mă yua lom kiăng ječ amăng blan 9 thun anai. vaccine Nanon Covax yua kơ Anom kơsem min bruă ia jrao Khul ling tơhan kơsem min hmâo găn rơgao 2 tal lông lăng. Hlâo kơ anun, tal sa ngă tui amăng blan 12/2020 hăng 560 čô mơnuih gum hrom lông lăng kiăng pơsit pơhlôm ƀơi ană mơnuih, tal 2 mơng blan 2 thun anai lông lăng hăng 554 čô mơnuih rŏng pơyơr drơi kiăng pơsit anô̆ pơhlôm hăng krăp lăng rơnoh dưi kơdŏng glăi kơman klin Sars-CoV-2. Wot dua tal leng kơ ba glăi bôh tơhnal klă. Amăng blan 6 anai pơphun lông lăng tal 3 vaccine Nano covax hăng mrô 13.000 čô mơnuih hăng mă yua liều ƀiă hloh 25mcrogam. Bôh than mơng bruă lông lăng tal 3 kiăng pơsit dong anô̆ pơhlôm, dưi yua pơgang mơng vaccine amăng mơnuih mơnam hmâo kơman tưp. Ră anai, Anom kơsem min bruă ia jrao Khul ling tơhan hăng hơdôm bôh anom bơdjơ̆ nao glăk pơphun tañ hơdôm yak lông lăng tañ. Abih bang hơdôm yak leng kơ ngă tui tơpă tơlơi kiăng, tơhnal pơkă mơng jar kơmar. Kiăng hluai tui anun, Ding jum ia jrao hmâo djop bôh thâo dưi pơsit hră mă yua ječ, mă yua hmâo tơlơi pơkă vaccine Nano covax ƀơi dêh čar ta./.

Siu H’ Prăk: Pô pơblang